ରିଆମାଳ,୧୬।୧୨(ଡି.ଏନ୍.ଏ)- ଦେବଗଡ଼ ଜିଲା ରିଆମାଳ ଥାନା ଅଧିନ ରେଙ୍ଗାଳବେଡା ହନୁମାନ ମନ୍ଦିର ନିକଟରେ ୫୩ ନମ୍ବର ଜାତୀୟ ରାଜପଥରେ ମଙ୍ଗଳବାର ସନ୍ଧ୍ୟାରେ ଦୁର୍ଘଟଣା ଘଟିଛି। ମିନିଟ୍ରକ ଏକ ବାଇକ୍କୁ ଧକ୍କା ଦେବା ଫଳରେ ଧୀରେନ୍ଦ୍ର ସାହୁ (୩୫) ନାମକ ଜଣେ ଗୃହରକ୍ଷୀଙ୍କର ମୃତ୍ୟୁ ଘଟିଛି। ଗୃହରକ୍ଷୀଙ୍କ ସହିତ ବାଇକ୍ରେ ବସିଥିବା ତାଙ୍କର ଶିଶୁ କନ୍ୟା ସ୍ନେହାରାଣୀ (୫) ଓ ବଡ଼ବାପା ନାଥ ସାହୁ (୬୩) ଗୁରୁତର ଆହତ ହୋଇଛନ୍ତି। କୁଣ୍ଢେଇଗୋଳା ଥାନା ଅଧିନ କଣ୍ଟାବାହାଳ (ରତାଖଣ୍ଡି) ଗ୍ରାମରେ ସେମାନଙ୍କ ଘର।
ଧୀରେନ୍ଦ୍ର କୌଣସି କାମରେ ଶିଶୁକନ୍ୟା ଓ ବଡ଼ବାପାଙ୍କ ସହ ଏକ ବାଇକ୍ ଯୋଗେ ଦେବଗଡ଼କୁ ଆସିଥିଲେ। ସନ୍ଧ୍ୟାରେ ସେମାନେ ନିଜ ଘରକୁ ଫେରୁଥିଲେ। ୫୩ ନମ୍ବର ଜାତୀୟ ରାଜପଥରେ ଏକ ମିନିଟ୍ରକ ସେମାନଙ୍କୁ ଧକ୍କା ଦେଇଥିଲା। ଫଳରେ ବାଇକ୍ରୁ ତିନିଜଣ ଯାକ ଛିଟିକି ପଡିଥିଲେ। ଧୀରେନ୍ଦ୍ରଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ସେହିପରି ସ୍ନେହାରାଣୀ ଓ ନାଥ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ଦେବଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ସୂଚନା ପାଇ ରିଆମାଳ ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଏକ ମାମଲା ରୁଜୁ କରିଛି। ଦୁର୍ଘଟଣାଗ୍ରସ୍ତ ମିନିଟ୍ରକ ଓ ବାଇକ୍କୁ ଜବତ କରି ତଦନ୍ତ କରୁଛି।
