ସମ୍ବଲପୁର,୧୪ା୧୦(ବ୍ୟୁରୋ):ସମ୍ବଲପୁର ଜିଲା ତଲାବିରା କୋଇଲା ଖଣିରେ କୋଇଲା ପରିବହନ ଓ ଚୋରା ଚାଲାଣକୁ ନେଇ ନିୟମିତ ଆପରାଧିକ କାର୍ଯ୍ୟ ଘଟୁଛି। ଏପରିସ୍ଥଳେ ବୁଧବାର ରାତିରେ ଆଦାନୀ କମ୍ପାନୀର ଜଣେ ଡାଟା ଅପରେଟର ରାଜ କିଶୋର ସାହୁଙ୍କୁ ମାରପିଟ ଓ ହତ୍ୟା ଧମକ ଦିଆଯାଇଥିବା ଅଭିଯୋଗ ହୋଇଛି। ଆର଼୍ୟାନ ଇସ୍ପାତ କମ୍ପାନୀ ଏବେ ଆଦାନୀ କମ୍ପାନୀର କୋଇଲା ସାଇଡିଂରେ କୋଇଲା ବଦଳରେ ମାଟି ଖାଲି କରିବାକୁ ନେଇ ଏହି ଘଟଣା ଘଟିଛି। ଅଭିଯୋଗ ଆଧାରରେ ଠେଲକୋଲୋଇ ଥାନା ପୋଲିସ ଏକ ମାମଲା (ନଂ.୨୫୨/୨୨) ରୁଜୁକରି ତଦନ୍ତ ଆରମ୍ଭ କରିଛି। ଲପଙ୍ଗା ଗ୍ରାମର ଆୟୁଷ ବେହେରା ଓ ତାଙ୍କ ଦୁଇ ସହଯୋଗୀଙ୍କ ନାମରେ ମାମଲା ରୁଜୁ ହୋଇଥିବା ପୋଲିସ କହିଛି। ନିୟମିତ ଭାବେ ଆର଼୍ୟାନ ଇସ୍ପାତ ସାଇଡିଂ ଓ ଓଜନ ସ୍ଥାନରେ ଗଣ୍ଡଗୋଳ ଘଟୁଛି। ଅଭିଯୋଗ ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ଥିଲା। ହେଲେ କୋଇଲା ମାଫିଆଙ୍କ ସହ ଆଲୋଚନା ପରେ ଫେରିଆସିଥିଲା। ପରେ ଦୁର୍ବୃତ୍ତମାନେ କମ୍ପାନୀ ଭିତରକୁ ବଳପୂର୍ବକ ପ୍ରବେଶ କରି କୋଇଲା ସାଇଡିଂରେ ମାଟି ବୋଝେଇ ହୋଇଥିବା କୋଇଲା ଖାଲିକରି ଫେରାର ହୋଇଯାଇଥିଲେ।
କିଛିଦିନ ପୂର୍ବରୁ ଜଣେ କର୍ମଚାରୀଙ୍କ ମୃତଦେହ ପୋଲିସ ଉଦ୍ଧାର କରିଥିଲା। ଏହାକୁ ଆତ୍ମହତ୍ୟାର ରୂପ ଦିଆଯାଇଥିଲା। ସେହିପରି ପ୍ରାୟ ୩ମାସ ପୂର୍ବରୁ ଏକ କୋଇଲା ବୋଝେଇ ଟ୍ରକ୍ରେ ଜଣେ ଓଜନ କରିବା ସୁପରଭାଇଜରଙ୍କ ମୃତ୍ୟୁ ଘଟିଥିଲା। ଏହି ଘଟଣାକୁ ମଧ୍ୟ ପୋଲିସ ଦୁର୍ଘଟଣାର ରୂପ ଦେଇ ମାମଲା ଚାପି ଦେଇଥିଲା। ବାରମ୍ବାର ଆର଼୍ୟାନ ଇସ୍ପାତ ସାଇଡିଂରେ ଏଭଳି ଘଟଣା ଘଟୁଛି। ଏହାକୁ ନେଇ କୋଇଲା ମାଫିଆଙ୍କ ସମ୍ପୃକ୍ତି ଥିବା ସନ୍ଦେହ ହେଉଛି । ପୂର୍ବଘଟଣା ଓ ଗତକାଲି ରାତିର ଘଟଣାକୁ ଦେଖିଲେ ସାମଞ୍ଜସ୍ୟ ରହିଛି। ଏହି ଘଟଣାରେ ରାଜନୈତିକ ବ୍ୟକ୍ତିବିଶେଷ, ନେତା, ମନ୍ତ୍ରୀଙ୍କ ପରୋକ୍ଷ ସମ୍ପୃକ୍ତି ରହୁଛି ବୋଲି ଅଭିଯୋଗ ହେଉଛି। କୋଇଲା ପରିବହନକୁ ନେଇ ପୂର୍ବରୁ ଗାଡ଼ି ପୋଡ଼ିବା, ହତ୍ୟା ଧମକ, ଫାଙ୍କା ଗୁଳିଚାଳନା କରିବା ଭଳି ଘଟଣାର ଥାନାରେ ମାମଲା ରହିଛି। ଅନ୍ୟପଟେ ଆଦାନୀ କମ୍ପାନୀ, ଟ୍ରାନ୍ସପୋର୍ଟର ମିଳିମିଶି କୋଇଲା ଲୁଟ କରୁଥିବା ନେଇ ଅଞ୍ଚଳବାସୀ ଅଭିଯୋଗ କରିଛନ୍ତି। ପରିବହନ ସଂସ୍ଥା ଉପରେ କୌଣସି କାର୍ଯ୍ୟାନୁଷ୍ଠାନ ନ ହେବାରୁ କୋଇଲା ଚୋରା ଚାଲାଣ ବୃଦ୍ଧି ହେବାରେ ଲାଗିଛି। ଗତ ମାସରେ ଶାସନ ଥାନା ପୋଲିସ ଏକ କୋଇଲା ବୋଝେଇ ଟ୍ରକ୍ ଜବତ କରିଥିଲା। ଘଟଣାସ୍ଥଳରେ କୋଇଲା ମାଫିଆ, ରାଜନେତା ପହଞ୍ଚତ୍ ମାମଲାକୁ ରଫାଦଫା କରିଥିଲେ। ପୋଲିସକୁ ନକଲି କାଗଜପତ୍ର ଦାଖଲ କରି ଫେରାର ହେବାରେ ସକ୍ଷମ ହୋଇଥିଲେ। ପୋଲିସ ମଧ୍ୟ ଏହି ଘଟଣାକୁ ହାଲକା ଭାବେ ନେଇ ଚୁପ ବସିଯାଇଥିଲା। ଏ ସମ୍ପର୍କରେ ଠେଲକୋଲୋଇ ଥାନାଧିକାରୀ ବି. ମିଶ୍ର କହିଛନ୍ତି, ଆଦାନୀ କମ୍ପାନୀର ଡାଟା ଅପରେଟର ରାଜକିଶୋର ସାହୁଙ୍କ ଅଭିଯୋଗ କ୍ରମେ ମାମଲା ରୁଜୁ ହୋଇଛି। ଆୟୁଷ ବେହେରା ଓ ତାଙ୍କ ଦୁଇ ସମର୍ଥକଙ୍କ ନାମରେ ପୋଲିସ ମାମଲା ରୁଜୁକରି ଘଟଣାର ତଦନ୍ତ କରୁଛି। ଟ୍ରକ୍ ଜବତ ସହ ଡ୍ରାଇଭରଙ୍କୁ ଗିରଫ କରିବା ପରେ ଘଟଣାର ପର୍ଦ୍ଦଫାଶ ହୋଇପାରିବ। ଅନ୍ୟପଟେ କୋଇଲା ବଦଳରେ ମାଟି ପକାଇବା ଘଟଣାରେ ଟ୍ରାନ୍ସପୋର୍ଟର ଓ କମ୍ପାନୀ ପକ୍ଷରୁ କୌଣସି ଅଭିଯୋଗ କରାଯାଇ ନ ଥିବା ସେ ସୂଚନା ଦେଇଥିଲେ।
