କେନ୍ଦୁଝର,୧୮ା୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ତହସିଲ ପଳାଶପଙ୍ଗା ରାଜସ୍ବ ସର୍କଲ ଅନ୍ତର୍ଗତ ମୁରୁସୁଆଁ ପଥର ଖଣି ପରିବେଶ ଓ ଖଣି ପ୍ଲାନ୍ ନୀତିନିୟମ ଉଲ୍ଲଂଘନ କରି ଖନନ କରୁଥିବା ଅଭିଯୋଗ ହେଉଛି। ମାଇନିଂ ପ୍ଲାନ୍ ଉଲ୍ଲଂଘନ କରାଯାଇ ଅସୁରକ୍ଷିତ ପ୍ରଣାଳୀରେ ଖନନ ହେଉଥିବାରୁ ପରିବେଶ ବହୁ ମାତ୍ରାରେ କ୍ଷତିଗ୍ରସ୍ତ ହେଉଛି। ଏଥିସହ ଏହା ବନ୍ୟପ୍ରାଣୀ, ଗୃହପାଳିତ ପଶୁ ଏବଂ ଲୋକଙ୍କ ପାଇଁ ବିପଦ ସୃଷ୍ଟି କରିଛି। ସେହିପରି ପଥର ଖଣିରେ ବର୍ଷାପାଣି ଜମାହୋଇ ବିପଦପୂର୍ଣ୍ଣ ଅବସ୍ଥାରେ ରହିଛି।
ଖଣି ଚାରିପାଖରେ ୭.୫ ମିଟର ସେଫ୍ଟି ଜୋନ୍ ବା ସୁରକ୍ଷା ବଳୟ ରହିବା କଥା। କିନ୍ତୁ ଏଠାରେ ତାହାକୁ ନଷ୍ଟକରି ବେଧଡ଼କ ଖନନ କରାଯାଇଛି। ଏପରିକି ବ୍ରାଣ୍ଡ୍ ଷ୍ଟିଲ୍ କାରଖାନା ପାଚେରିକୁ ସଂଲଗ୍ନ ଏହି ପଥର କ୍ୱାରି ବିପଦପୂର୍ଣ୍ଣ ଭାବେ ଗଭୀର ଭାବେ ପଥର ଖୋଳାଯାଇଥିବାରୁ କାରଖାନା ପାଇଁ ବିପଦ ସୃଷ୍ଟି କରୁଛି। ଏହାର ପରିସୀମାକୁ ଚିହ୍ନଟକରି ପିଲାର ପୋତିବା ସହ ଚାରିପାଖରେ ବନୀକରଣ କରିବା ନିୟମ ରହିଥିଲେ ହେଁ ପିଲାର ପୋତାଯାଇ ନାହିଁ କିମ୍ବା ବନୀକରଣ କରାଯାଇନାହିଁ। ଫଳରେ ପଥର ଖଣି ସୀମା ଅସୁରକ୍ଷିତ ହୋଇ ରହିବା ସହ ଭୁଶୁଡ଼ିବା ଆଶଙ୍କା ରହିଛି। ଖଣିକୁ ନିୟମିତ ରାଜସ୍ବ କିମ୍ବା ଖଣି ବିଭାଗ ଯାଞ୍ଚକରୁ ନ ଥିବାରୁ ଏଭଳି ଅବସ୍ଥା ଉପୁଜିଛି ବୋଲି ସ୍ଥାନୀୟ ମତପ୍ରକାଶ ପାଉଛି। ବଡ଼ ମେଶିନରେ ଖଣି ଖନନ ହେଉଛି। ଖଣିର ବର୍ଜ୍ୟ ବା ଓଭର ବର୍ଡନ ରଖିବା ପାଇଁ ସ୍ଥାନ ନିର୍ଦ୍ଧାରିତ ହୋଇ ନ ଥିବାରୁ ପରିବେଶ ପ୍ରଦୂଷଣ ହେବା ସହ ଖଣି ପରିସର ଅସୁରକ୍ଷିତ ହୋଇପଡ଼ିଛି। ନିୟମ ଅନୁସାରେ ଖନନ ପରେ ପଥର ଖଣ୍ଡକୁ ନିର୍ଦ୍ଦିଷ୍ଟ ଜାଗାରେ ଷ୍ଟକ୍ କରି ତାହାର ମାପଚୁପ ପରେ ପରିବହନ କରାଯିବ। ମାତ୍ର ପୂର୍ବରୁ ଏହି ଖଣିରେ ରାଜସ୍ବ ବିଭାଗର କୌଣସି କର୍ମଚାରୀ ଯାଉ ନ ଥିବାରୁ ଅଦ୍ୟାବଧି କେତେ ଖନନ ହୋଇଛି ଓ କେତେ ପରିବହନ ହୋଇଛି ତାହାର ହିସାବ ରହୁନାହିଁ। ମାଇନିଂ ପ୍ଲାନ୍ ଉଲ୍ଲଂଘନ କରି ବ୍ୟାପକ ପରିମାଣର ଲଘୁ ଖଣିଜ ସମ୍ପଦ ଉତ୍ତୋଳନ ହୋଇଥିବାରୁ ଖଣି ବିଭାଗ ଏହାର ଯାଞ୍ଚ କରି ପଦକ୍ଷେପ ନେବାକୁ ଦାବି ହୋଇଛି। ଏ ନେଇ କେନ୍ଦୁଝର ସର୍କଲ ଖଣି ଉପନିର୍ଦ୍ଦେଶକ ବିଷ୍ଣୁପଦ ରାଉତ କହିଛନ୍ତି, ପଥର ଖଣି ପୂର୍ବରୁ ରାଜସ୍ବ ବିଭାଗ ପାଖରେ ଥିଲା। ଏବେ ଏହା ଖଣି ବିଭାଗକୁ ହସ୍ତାନ୍ତର ହୋଇଛି। ଯେଉଁସବୁ ଅଭିଯୋଗ ହେଉଛି ଏହାର ଯାଞ୍ଚ ପରେ ପଦକ୍ଷେପ ନିଆଯିବ। ଖଣିର ପରିଚାଳକ ପ୍ରହଲ୍ଲାଦ ତ୍ରିପାଠୀ କହିଛନ୍ତି, ଖଣିରେ ପାଣି ଭର୍ତ୍ତି ହୋଇଥିବାରୁ କାମ ବନ୍ଦ ରହିଛି। ସରକାରୀ ନୀତିନିୟମ ଅନୁଯାୟୀ କାମ କରାଯାଉଛି।