ପୋଲସରା,୬ା୧(ଡି.ଏନ୍.ଏ.): ଲୋକଙ୍କୁ ସ୍ବାସ୍ଥ୍ୟ ସେବା ପହଞ୍ଚାଇବା ଉଦ୍ଦେଶ୍ୟରେ ଶୁକ୍ରବାର ପୋଲସରା କାଳୀ ମନ୍ଦିର ସାହି ରାସ୍ତା ନିକଟରେ ସହରାଞ୍ଚଳ ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ରକୁ ଶ୍ରମ ଓ କର୍ମଚାରୀ ବୀମା ମନ୍ତ୍ରୀ ଶ୍ରୀକାନ୍ତ ସାହୁ ମୁଖ୍ୟଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଛନ୍ତି। ଗ୍ରାମାଞ୍ଚଳ ସମେତ ସହରାଞ୍ଚଳରେ ସୁଲଭ ସ୍ବାସ୍ଥ୍ୟ ସେବାକୁ ଲୋକଙ୍କ ନିକଟରେ ପହଞ୍ଚାଇବା ପାଇଁ ରାଜ୍ୟ ସରକାର ସର୍ବଦା ଗୁରୁତ୍ୱ ଦେଇ ଆସିଛନ୍ତି। ଜିଲା ସ୍ବାସ୍ଥ୍ୟ ବିଭାଗ ଅଧୀନରେ ପୋଲସରା ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ଆର୍ଥିକ ସହାୟତା ଯୋଗାଇ ଦିଆଯାଇଥିବା ଏହି ସ୍ବାସ୍ଥ୍ୟ କେନ୍ଦ୍ରଟି ସ୍ବେଛାସେବୀ ସଂସ୍ଥା ଦ୍ୱାରା ପରିଚାଳିତ ହେବ।
ସ୍ବାସ୍ଥ୍ୟ କେନ୍ଦ୍ରରେ ରୋଗୀଙ୍କୁ ଗୁଣାତ୍ମକମାନର ସୁବିଧା ଯୋଗାଇ ଦିଆଯିବ। ଏହା ସହିତ ରୋଗୀଙ୍କୁ ବୌଦ୍ଧିକ ତଥା ଯୋଗ ଓ ଫିଜିଓଥେରାପି ଚିକିତ୍ସା ମଧ୍ୟ ପ୍ରଦାନ କରାଯିବ। ସ୍ବାସ୍ଥ୍ୟ କେନ୍ଦ୍ର ସକାଳ ୮ଟାରୁ ପୂର୍ବାହ୍ନ ୧୧ଟା ଏବଂ ଓ ସନ୍ଧ୍ୟା ୫ଟାରୁ ରାତି ୮ଟା ପର୍ଯ୍ୟନ୍ତ ଚିକିତ୍ସା ସେବା ଯୋଗାଇ ଦିଆଯିବ। ଏହା ସହିତ ରବିବାର ସମେତ ସରକାରୀ ଛୁଟି ଦିବସରେ ସକାଳ ୮ଟାରୁ ୧୧ଟା ପର୍ଯ୍ୟନ୍ତ ବହିଃଚିକିତ୍ସା ସେବା ଯୋଗାଇ ଦିଆଯିବ। ଉକ୍ତ ସ୍ବାସ୍ଥ୍ୟ କେନ୍ଦ୍ରରେ ବହିଃଚିକିତ୍ସା ସେବା ମଧ୍ୟରେ ନିରାମୟ ଔଷଧ ବିତରଣ, ରକ୍ତ ମଳମୁତ୍ର ପରୀକ୍ଷା ସମେତ ସଚେତନତା କର୍ମଶାଳା ବ୍ୟବସ୍ଥା କରାଯାଇଛି।
ଉଦ୍ଘାଟନୀ ଉତ୍ସବରେ ସମ୍ମାନିତ ଅତିଥି ଭାବେ ପୋଲସରା ବିଡିଓ ତଥା ନଗର କାର୍ଯ୍ୟନିର୍ବାହୀ ଅଧିକାରୀ କୈଳାଶ ଚନ୍ଦ୍ର ମୁର୍ମୁ, ଡାକ୍ତର ଲଳିତ ମୋହନ ରଥ, ଡାକ୍ତର ପଙ୍କଜ ପ୍ରଭା ସାହୁ, ଫିଜିଓଥେରାପିଷ୍ଟ ଲିପ୍ସା ସାହୁ, ଯୋଗ ଶିକ୍ଷକ କୃଷ୍ଣଚନ୍ଦ୍ର ପ୍ରଧାନ, ଫାର୍ମାସିଷ୍ଟ ସିତାଂଶୁ କୁମାର ନାୟକ, ନଗରପାଳିକା ସଙ୍ଗୀତା ବେହେରା, ପୂର୍ବତନ ନଗରପାଳ ପ୍ରଫୁଲ୍ଲ କୁମାର ପ୍ରଧାନ, ଉପାଧ୍ୟକ୍ଷ ସନ୍ତୋଷ କୁମାର ବେହେରା, ଏମ୍ପିଙ୍କ ପ୍ରତିନିଧି ମୋତିରାମ୍ ସାହୁ ପ୍ରମୁଖ ଉପସ୍ଥିତ ଥିଲେ।