ବରଗଡ଼ ଅଫିସ୍/ବରପାଲି,୧୭।୩(ଡି.ଏନ.ଏ): ବରଗଡ଼ ଜିଲାରେ ଆସନ୍ତା ୨୪ତାରିଖରେ ପୌର ନିର୍ବାଚନ ପାଇଁ ମତଦାନ ଗ୍ରହଣ ହେବ। ମତଦାନ ତାରିଖ ଯେତିକି ପାଖେଇ ଆସୁଛି, ନିର୍ବାଚନ ପ୍ରଚାର ଜମିବାରେ ଲାଗିଛି। ଜିଲାର ବରଗଡ଼ ମ୍ୟୁନିସିପାଲିଟି ସମେତ ବିଜେପୁର, ବରପାଲି ଏବଂ ପଦ୍ମପୁରରେ ଏହି ନିର୍ବାଚନ ଅନୁଷ୍ଠିତ ହେଉଥିବା ବେଳେ ସବୁଦଳ ଏବେ ପୌର ପରିଷଦ ଦଖଲ ପାଇଁ ଲାଗି ପଡ଼ିଛନ୍ତି। ଏହି କ୍ରମରେ ଦଳୀୟ ନେତୃବୃନ୍ଦ ଏବେ ନିର୍ବାଚନୀ ପ୍ରଚାରରେ ମାତିଛନ୍ତି। ଗୁରୁବାର ଗ୍ରାମ୍ୟ ଉନ୍ନୟନ ଓ ଶ୍ରମ ମନ୍ତ୍ରୀ ସୁଶାନ୍ତ ସିଂ ବରପାଲି ଗସ୍ତରେ ଆସି ଦଳୀୟ ଅଧ୍ୟକ୍ଷ ପ୍ରାର୍ଥୀ ପ୍ରଦ୍ୟୁମ୍ନ କୁମାର ତ୍ରିପାଠୀ ଏବଂ ଅନ୍ୟ କାଉନସିଲର ପ୍ରାର୍ଥୀଙ୍କ ପ୍ରଚାର କରିଥିଲେ। ସେହିପରି ବରଗଡ଼ ଏମ୍ପି ସୁରେଶ ପୂଜାରୀ ମଧ୍ୟ ବରପାଲି ଦଳର ଅଧ୍ୟକ୍ଷ ପ୍ରାର୍ଥୀ ଅଜିତ ଦାଶ ଏବଂ ଅନ୍ୟ କାଉନସିଲର ପ୍ରାର୍ଥୀଙ୍କ ପାଇଁ ପ୍ରଚାର କହିଥିଲେ।
ସେହିପରି ବରଗଡ଼ ବିଧାୟକ ଦେବେଶ ଆଚାର୍ଯ୍ୟ ଆରମ୍ଭରୁ ଦଳୀୟ ପୌରାଧ୍ୟକ୍ଷା ପ୍ରାର୍ଥିନୀ କଳ୍ପନା ମାଝି ଏବଂ ଅନ୍ୟ କାଉନସିଲର ପ୍ରାର୍ଥୀଙ୍କ ପ୍ରଚାରରେ ଲାଗି ପଡ଼ିଛନ୍ତି। ଏପରିକି ବିଧାୟକଙ୍କ ଗୋଟିଚାଳନାରେ ନିର୍ବାଚନୀ ମଇଦାନକୁ ଓହ୍ଲାଇଥିବା ବିଦ୍ରୋହୀ ପ୍ରାର୍ଥୀ ମଧ୍ୟ ବିଜେଡ଼ିରେ ସାମିଲ ହୋଇ ଦଳୀୟ ପ୍ରାର୍ଥୀଙ୍କ ପ୍ରଚାରରେ ଲାଗିଥିବା ପରିଲକ୍ଷିତ ହୋଇଛି। ବୁଧବାର ସ୍ବାଧୀନ ଅଧ୍ୟକ୍ଷା ପ୍ରାର୍ଥିନୀ ରାଜକୁମାରୀ ଦାସ ଭାଜପା ନେତା ବିଜୟ ଦାସ ଓ ସମର୍ଥକଙ୍କ ଗହଣରେ ବିଜେଡ଼ିରେ ଯୋଗଦାନ କରିଥିଲେ। ସେମାନେ ଗୁରୁବାର ବିଜେଡ଼ି ପ୍ରାର୍ଥୀଙ୍କ ପ୍ରଚାରରେ ବାହାରିଛନ୍ତି। ଅନ୍ୟପକ୍ଷେ ୨୦୧୩ ପୌର ନିର୍ବାଚନରେ କଂଗ୍ରେସର ନେତୃତ୍ୱ ନେଇଥିବା ପୂର୍ବତନ ବିଧାୟକ ସାଧୁ ନେପାକ ଗତ ୨୦୧୯ ସାଧାରଣ ନିର୍ବାଚନ ସମୟରୁ ବିଜେଡ଼ିରେ ସାମିଲ ହୋଇ ସାରିଛନ୍ତି। ସେ ମଧ୍ୟ ଏବେ ବିଜେଡ଼ି ପ୍ରାର୍ଥୀଙ୍କ ବିଜୟ ପାଇଁ ପ୍ରଚାର କରୁଛନ୍ତି। ବରଗଡ଼ ମ୍ୟୁନିସିପାଲିଟି ଅଧୀନ ୱାର୍ଡ଼ ନଂ-୧୧ରେ ନେପାକ ଗୁରୁବାର ବିଜେଡ଼ି ପ୍ରାର୍ଥୀଙ୍କ ପାଇଁ ପ୍ରଚାର କରିଥିଲେ।
