କେନ୍ଦୁଝର,୧ା୪(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ବ୍ଲକ ଅନ୍ତର୍ଗତ ନୂଆଗାଁ ପଞ୍ଚାୟତ ନୂଆଗାଁ ଗ୍ରାମର ସହିଦ ରାଜକିଶୋର ମୁଣ୍ତାଙ୍କ ଘରକୁ ଆଜି ମଧ୍ୟାହ୍ନରେ ରାଜ୍ୟ ଜଙ୍ଗଲ ବିଭାଗ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ, ତେଲକୋଇ ବିଧାୟକ ଫକୀର ମୋହନ ନାୟକ, ପାଟଣା ବିଧାୟକ ଅଖିଳଚନ୍ଦ୍ର ନାଏକ, ଭାଜପା ଜିଲା ସଭାପତି ଶୁକଦେବ ମହାନ୍ତ ସମେତ ପହଞ୍ଚି ତାଙ୍କ ଫଟୋରେ ପୁଷ୍ପମାଲ୍ୟ ଅର୍ପଣ କରିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ଶୁଦ୍ଧିକ୍ରିୟା ପାଇଁ ଜଙ୍ଗଲ ବିଭାଗମନ୍ତ୍ରୀ ଖୁଣ୍ଟିଆ ରାଜକିଶୋରଙ୍କ ସ୍ତ୍ରୀ ଅମିତା ମୁଣ୍ତାଙ୍କୁ ୪୦ହଜାର ଟଙ୍କା ପ୍ରଦାନ କରିଥିଲେ। ପରେ ରାଜକିଶୋରଙ୍କ ସ୍ତ୍ରୀ ଅମିତା ମୁଣ୍ତା,ବଡ଼ଝିଅ ସୁନିଆଁ ମୁଣ୍ତା ସାନଝିଅ ରିଙ୍କି ମୁଣ୍ତା ସମେତ ପରିବାରଙ୍କ ସହିତ ଭଲମନ୍ଦ ସୁବିଧା ବିଷୟରେ ଆଲୋଚନା କରିଥିଲେ। ଅନ୍ୟମାନଙ୍କ ମଧ୍ୟରେ କେନ୍ଦୁଝର ବନଖଣ୍ତ ଅଧିକାରୀ ଡିଏଫ୍ଓ ଧନରାଜ ଏଚ୍ଡି,ସଦର ପୋଲିସ ଏସ୍ଆଇ ସ୍ବରୂପରଞ୍ଜନ ନାୟକ ଓ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ। ଏହାଛଡ଼ା ପଦ୍ମପୁରଠାରୁ ନୂଆଗାଁ ପର୍ଯ୍ୟନ୍ତ,ନୂଆଗାଁ ପଞ୍ଚାୟତକୁ ପ୍ରବେଶ ରାସ୍ତା ମରାମତି ଅଭାବରୁ ଅତି ଶୋଚନୀୟ ହୋଇଛି। ଶହୀଦ ରାଜକିଶୋରଙ୍କ ସାହିକୁ ପାନୀୟଜଳ ସୁବିଧା ପାଇଁ ଗ୍ରାମବାସୀ ମନ୍ତ୍ରୀଙ୍କୁ ଅଭିଯୋଗ କରିଥିଲେ। ମନ୍ତ୍ରୀ ଜିଲା ପ୍ରଶାସନ ଅଧିକାରୀଙ୍କ ସହିତ ସମ୍ପର୍କ କରି ତୁରନ୍ତ ସମସ୍ୟାଗୁଡିକୁ ସମାଧାନ କରିବାକୁ ପ୍ରତଶ୍ରୁତି ଦେଇଛନ୍ତି।
