ବ୍ରହ୍ମପୁର ଅଫିସ, ୩୧।୧: ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କୁ ଗତ ୨୯ ତାରିଖରେ ପୋଲିସ ଏଏସ୍ଆଇ ଗୋପାଳକୃଷ୍ଣ ଦାସ ଗୁଳିକରି ହତ୍ୟା କରିଥିଲେ। ମୁଖ୍ୟମନ୍ତ୍ରୀ ଉକ୍ତ ଘଟଣାର କ୍ରାଇମବ୍ରାଞ୍ଚ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ହତ୍ୟାକାରୀ ପୋଲିସ ଏଏସ୍ଆଇଙ୍କ ଘର ଗଞ୍ଜାମ ଜିଲା ବ୍ରହ୍ମପୁର ବୈଦ୍ୟନାଥପୁର ଥାନା ଅଧୀନ ଜଳେଶ୍ବରଖଣ୍ଡିରେ। ମନ୍ତ୍ରୀଙ୍କ ହତ୍ୟା ଘଟଣା ପଛରେ ହତ୍ୟାକାରୀ ପୋଲିସ ଗୋପାଳକୃଷ୍ଣଙ୍କ ବ୍ରହ୍ମପୁରରେ ରହୁଥିବା ତାଙ୍କ ପରିବାରଙ୍କ ସହ କ’ଣ ଲିଙ୍କ୍ ରହିଛି କି ନାହିଁ ସେ ନେଇ ଅଧିକ ତଥ୍ୟ ହାସଲ କରିବା ପାଇଁ ବ୍ରହ୍ମପୁରରେ କ୍ରାଇମବ୍ରାଞ୍ଚ ଟିମ୍ ମଙ୍ଗଳବାର ମଧ୍ୟାହ୍ନରେ ପହଞ୍ଚିଛି।
ଡିଏସ୍ପି ଶିଶିର ମିଶ୍ରଙ୍କ ଅଧ୍ୟକ୍ଷତାରେ ୪ଜଣିଆ କ୍ରାଇମବ୍ରାଞ୍ଚ ଟିମ୍ ଜଳେଶ୍ୱରଖଣ୍ଡିରେ ରହୁଥିବା ଗୋପାଳକୃଷ୍ଣଙ୍କ ସ୍ତ୍ରୀ ଜୟନ୍ତୀଙ୍କୁ ଭେଟି ପ୍ରାଥମିକ ତଦନ୍ତ ଆରମ୍ଭ କରିଛି। ଜୟନ୍ତୀଙ୍କ ସହ, ତାଙ୍କ ଝିଅ ଓ ପୁଅ ମଧ୍ୟ ସେଠାରେ ରହୁଛନ୍ତି। ଉକ୍ତ ଟିମ୍ ମନ୍ତ୍ରୀ ହତ୍ୟାକାଣ୍ଡ ଘଟଣାର ବିଭିନ୍ନ ଦିଗକୁ ଆଧାର କରି ଜୟନ୍ତୀଙ୍କୁ ପଚାରିଥିଲେ। ଏପରିକି ଜୟନ୍ତୀଙ୍କ ସ୍ବାମୀ ଘଟଣା ଦିନ କେଉଁ ସମୟରେ ତାଙ୍କୁ ଫୋନ କରିଥିଲା ଓ ସେ ତାଙ୍କ ସହ କଣ କଣ କଥାବର୍ତ୍ତା ହୋଇଥିଲେ ସେ ନେଇ ପଚରାଉଚରା ଚାଲିଥିବା ଜଣାପଡିଛି। ଘରେଥିବା ସମସ୍ତ ସଦସ୍ୟଙ୍କୁ ଠାରୁ ପୃଥକ ପୃଥକ ଭାବେ ଉକ୍ତ ଟିମ୍ ତଥ୍ୟ ହାସଲ କାରିଛି। ଏ ନେଇ କ୍ରାଇମବ୍ରାଞ୍ଚ ଡିିଏସ୍ପି ଦାସ ଖବରଦାତାଙ୍କୁ କହିଛନ୍ତି ଯେ, ମନ୍ତ୍ରୀଙ୍କ ହତ୍ୟା ଘଟଣାର ବ୍ରହ୍ମପୁର ଲିଙ୍କ ସମ୍ପର୍କରେ ତଥ୍ୟ ସଂଗ୍ରହ କରାଯାଉଛି।