ନୂଆଦିଲ୍ଲୀ, ୨୨।୯ : କେନ୍ଦ୍ର ସରକାର ତିନୋଟି ପୁରସ୍କାର ବନ୍ଦ କରି ଦେଇଛନ୍ତି। କେନ୍ଦ୍ରୀୟ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସିଏପିଏଫ୍) କର୍ମଚାରୀ ଏବଂ ଅନ୍ୟାନ୍ୟ ପୋଲିସ ସଂଗଠନକୁ ଆଭ୍ୟନ୍ତରୀଣ ସୁରକ୍ଷା ଦାୟିତ୍ୱ ଏବଂ ସେବାରେ ଉନ୍ନତ ପ୍ରଦର୍ଶନ ପାଇଁ ଦିଆଯାଇଥିବା ୩ ପୁରସ୍କାର ବନ୍ଦ କରିଦିଆଯାଇଛି। ସ୍ବରାଷ୍ଟ୍ର ମନ୍ତ୍ରଣାଳୟର ଜଣେ ଅଧିକାରୀ ଏ ସମ୍ପର୍କରେ ସୂଚନା ଦେଇଛନ୍ତି।
ଏ ସମ୍ପର୍କରେ ଦୁଇଟି ବିଜ୍ଞପ୍ତି ପ୍ରକାଶ କରି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ଏହି ପୁରସ୍କାର ବନ୍ଦ କରିବାକୁ ଘୋଷଣା କରିଛି। କୁହାଯାଉଛି ଯେ ପୁରସ୍କାର ବ୍ୟବସ୍ଥାରେ ଉନ୍ନତି ଆଣିବା ପ୍ରକ୍ରିୟାର ଏକ ଅଂଶ ଭାବରେ ଏହି ନିଷ୍ପତ୍ତି ନିଆଯାଇଛି।
ବନ୍ଦ କରିବାକୁ କେନ୍ଦ୍ର ସରକାର ଘୋଷଣା କରିଥିବା ତିନୋଟି ପୁରସ୍କାର ହେଉଛି ପୋଲିସ ଆଭ୍ୟନ୍ତରୀଣ ସୁରକ୍ଷା ସେବା ପଦକ (ଜମ୍ମୁ-କଶ୍ମୀର / ମାଓବାଦୀ ପ୍ରବଣ ଅଞ୍ଚଳ କିମ୍ବା ଉତ୍ତର-ପୂର୍ବ ଅଞ୍ଚଳ), ଉତ୍କୃଷ୍ଟ ସେବା ପଦକ ଏବଂ ଅତି ଉତ୍କୃଷ୍ଟ ସେବା ପଦକ ।
କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ଦ୍ୱାରା ଜାରି ବିଜ୍ଞପ୍ତିରେ କୁହାଯାଇଛି ଯେ ୦୧.୦୧.୨୦୨୩ ରୁ ପୋଲିସ ଆଭ୍ୟନ୍ତରୀଣ ସୁରକ୍ଷା ସେବା ପଦକ(ଜମ୍ମୁ କଶ୍ମୀର) ବନ୍ଦ ହୋଇଯାଇଛି। ଏହା ସହିତ ଅନ୍ୟ ଏକ ବିଜ୍ଞପ୍ତିରେ କୁହାଯାଇଛି ଯେ ଉତ୍କୃଷ୍ଟ ସେବା ପଦକ ଏବଂ ଅତି ଉତ୍କୃଷ୍ଟ ସେବା ପଦକ ମଧ୍ୟ ତୁରନ୍ତ ବନ୍ଦ ହୋଇଯାଇଛି।