ନୂଆଦିଲ୍ଲୀ,୨୩।୧୧ : କର୍ମଚାରୀଙ୍କୁ ବାଧ୍ୟତାମୂଳକ ଛଟେଇ କରୁଥିବାରୁ କେନ୍ଦ୍ର ଶ୍ରମ ମନ୍ତ୍ରଣାଳୟ ପକ୍ଷରୁ ଆମାଜନ ଇଣ୍ଡିଆକୁ ନୋଟିସ ଜାରି କରାଯାଇଛି। ବୁଧବାର ବେଙ୍ଗାଲୁରୁରେ ଡେପୁଟି ଲେବର କମିଶନରଙ୍କ ନିକଟରେ ହାଜର ହେବାକୁ ମନ୍ତ୍ରଣାଳୟ କହିଛି। ମନ୍ତ୍ରଣାଳୟ ଏହାର ବିଜ୍ଞପ୍ତିରେ ଲେଖିଛି, ତୁମକୁ ସମସ୍ତ ପ୍ରମାଣ ସହିତ ଏହି ତାରିଖ ଏବଂ ସମୟରେ ବ୍ୟକ୍ତିଗତ ଭାବରେ କିମ୍ବା ଏହି କାର୍ଯ୍ୟାଳୟରେ ଜଣେ ପ୍ରତିନିଧୀଙ୍କ ମାଧ୍ୟମରେ ହାଜର ହେବାକୁ ଅନୁରୋଧ କରାଯାଉଛି।
କର୍ମଚାରୀ ସଂଘ ନାସେଣ୍ଟ ଇନଫରମେଶନ ଟେକ୍ନୋଲୋଜି କର୍ମଚାରୀ ସିନେଟ(ଏନଆଇଟିଇଏସ) ଆମାଜନ ଇଣ୍ଡିଆ ବିରୋଧରେ ଶ୍ରମ ଆଇନର ଉଲ୍ଲଂଘନ କରାଯାଇଥିବା ନେଇ ମନ୍ତ୍ରଣାଳୟରେ ଅଭିଯୋଗ କରିଛି। ଏହା ପରେ ଶ୍ରମ ମନ୍ତ୍ରଣାଳୟ ଆମାଜନ ଇଣ୍ଡିଆକୁ ଏକ ବିଜ୍ଞପ୍ତି ଜାରି କରିଛି। ଶ୍ରମ ମନ୍ତ୍ରୀ ଭୁପେନ୍ଦ୍ର ଯାଦବଙ୍କୁ ଏନଆଇଟିଇଏସ ଏକ ଚିଠି ଲେଖି କହିଛି ଯେ ଆମାଜନ କର୍ମଚାରୀମାନଙ୍କୁ ଜୋର ଜବରଦସ୍ତ କମ୍ପାନୀରୁ ଛଟେଇ କରୁଛି। ତଦନ୍ତ ଦାବି କରି ୟୁନିୟନ କହିଛି ଯେ ସ୍ବେଚ୍ଛାକୃତ ଅବସର ଗ୍ରହଣ କାର୍ଯ୍ୟକ୍ରମ ଅନ୍ତର୍ଗତ କମ୍ପାନୀ ଦ୍ୱାରା କର୍ମଚାରୀମାନଙ୍କୁ ଛଟେଇ କରାଯାଉଛି ଏବଂ ଏହାକୁ ସମ୍ପୂର୍ଣ୍ଣ କରିବା ପାଇଁ ୩୦ ନଭେମ୍ବର ୨୦୨୨ ସମୟସୀମା ଦିଆଯାଇଛି।
କର୍ମଚାରୀ ସଂଘ ଅନୁଯାୟୀ, ଆମାଜନ ଇଣ୍ଡିଆର ଏହି ନିଷ୍ପତ୍ତି ଦ୍ୱାରା ଅନେକ କର୍ମଚାରୀଙ୍କ ଜୀବିକା ବିପଦରେ ପଡିଛି। ଇଣ୍ଡଷ୍ଟ୍ରିଜ ବିବାଦ ଆଇନକୁ ଦର୍ଶାଇ ସଂଘ କହିଛି ଯେ ସରକାରଙ୍କ ଅନୁମତି ବିନା ନିଯୁକ୍ତିଦାତା ତାଙ୍କ କର୍ମଚାରୀଙ୍କୁ ଛଟେଇ କରିପାରିବେ ନାହିଁ। ଏନଆଇଟିଇଏସର ସଭାପତି ହରପ୍ରୀତ ସାଲୁଜାଙ୍କ ଅନୁଯାୟୀ ଏହି ପ୍ରସଙ୍ଗରେ କର୍ମଚାରୀଙ୍କ ପାଇଁ ନ୍ୟାୟ ପାଇଁ ସଂଘ ନିବେଦନ କରୁଛି। ଆମାଜନ ଇଣ୍ଡିଆ ଦ୍ୱାରା ବେଆଇନ ଭାବେ ଜାରି କରାଯାଇଥିବା ସ୍ବେଚ୍ଛାକୃତ ଅବସର ନୀତିକୁ ସରକାର ତୁରନ୍ତ ବାତିଲ କରିବାକୁ ସେ ଦାବି କରିଛନ୍ତି। ସେ କହିଛନ୍ତି ଯେ କମ୍ପାନୀକୁ ସରକାର ଦେଇଥିବା ବିଜ୍ଞପ୍ତି କର୍ମଚାରୀଙ୍କୁ ଆଶ୍ୱସ୍ତି ମିଳିଛି।
ଗଣମାଧ୍ୟମର ରିପୋର୍ଟ ଅନୁଯାୟୀ, ଆମାଜନ ବର୍ତ୍ତମାନ ସୁଦ୍ଧା ଏହାର ୧୦ ହଜାର କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇଛି ଏବଂ ଏହା ୨୦୨୩ରେ ମଧ୍ୟ ଜାରି ରହିବ।