ଭୁବନେଶ୍ୱର,୧୭।୭ (ଅନୁରାଧା ମହାରଣା): ଜାତୀୟ ପରିବହନକାରୀ ଭାରତୀୟ ରେଳପଥ ନବସୃଜନ (ଇନୋଭେଶନ) କ୍ଷେତ୍ରରେ ଷ୍ଟାର୍ଟଅପ୍ ଓ ଅନ୍ୟାନ୍ୟ ସଂସ୍ଥାର ସହଯୋଗ ପାଇବା ପାଇଁ ରେଳ ମନ୍ତ୍ରଣାଳୟ ‘ଷ୍ଟାର୍ଟଅପ୍ ଫର୍ ରେଲଓ୍ବେଜ୍’ କାର୍ଯ୍ୟକ୍ରମ ଆରମ୍ଭ କରିଥିଲା। ରେଳ ନେଟ୍ୱର୍କରେ କାର୍ଯ୍ୟକ୍ଷମତା ଏବଂ ନିରାପତ୍ତା ବଢ଼ାଇବା ପାଇଁ ୨୦୨୨ ଜୁନ୍ରେ ଏହି ଷ୍ଟାର୍ଟଅପ୍ ଫର୍ ରେଲଓ୍ବେଜ୍ ଆରମ୍ଭ କରାଯାଇଥିଲା। ଏହି ପଦକ୍ଷେପର ଏକ ଅଂଶ ଭାବରେ, ଭାରତୀୟ ରେଳ ଇନୋଭେଶନ ପୋର୍ଟାଲ https://innovation.indianrailways.gov.in/ କାର୍ଯ୍ୟକ୍ଷମ କରାଯାଇଥିଲା। ୨୦୨୪ ଜୁଲାଇ ସୁଦ୍ଧା ଅଭିନବ କାର୍ଯ୍ୟରେ ନିୟୋଜିତ ମୋଟ ୧୯୪୨ ସଂସ୍ଥା ଏହି ପୋର୍ଟାଲରେ ପଞ୍ଜୀକରଣ କରିଛନ୍ତି। ଇନୋଭେଶନ ପୋର୍ଟାଲରେ ଖୋଲାଯାଇଥିବା ୨୮ଟି ସମସ୍ୟା ବିବୃତି ପାଇଁ ରେଳ ମନ୍ତ୍ରଣାଳୟ ବର୍ତ୍ତମାନ ପର୍ଯ୍ୟନ୍ତ ମୋଟ ୪୨୩ଟି ପ୍ରସ୍ତାବ ଗ୍ରହଣ କରିଛି। ୧୫ଟି ସମସ୍ୟା ବିବରଣୀ ପାଇଁ ଏ ପର୍ଯ୍ୟନ୍ତ ମୋଟ ୨୩ଟି ଅଭିନବ ପ୍ରକଳ୍ପ ପ୍ରଦାନ କରାଯାଇଛି। ୨୩ଟି ପ୍ରକଳ୍ପର ମୂଲ୍ୟ ପ୍ରାୟ ୪୩.୮୭ କୋଟି ଟଙ୍କା, ଯେଉଁଥିରୁ ରେଳପଥର ଅନୁଦାନର ଅଂଶ ପ୍ରାୟ ୧୦.୫୨ କୋଟି ଟଙ୍କା ରହିଛି।
ସୂଚନା ଥାଉ କି, ଏହି ନୀତି ବା ଯୋଜନା ରେଳପଥର ବିଭିନ୍ନ ଡିଭିଜନ, ଜୋନ୍ର ଆଦିରୁ ମିଳୁଥିବା ସମସ୍ୟା ସମାଧାନ କରିବାକୁ ସୂତ୍ର ବାହାର କରିବା ଦାୟିତ୍ୱ ଷ୍ଟାର୍ଟଅପ୍ ଗୁଡ଼ିିକୁ ଦିଆଯାଉଛି। ସେମାନେ ନିଜର ଇନୋଭେଟିଭ ଟେକ୍ନୋଲୋଜି ମାଧ୍ୟମରେ ତାହାର ସମାଧାନ କରୁଛନ୍ତି। ଷ୍ଟାର୍ଟଅପ୍-ଇନୋଭେଟର/ଏମ୍ଏସ୍ଏମ୍ଇ ଓ ଉଦ୍ୟୋଗୀଙ୍କ ମନୋନୟନ ପ୍ରକ୍ରିୟା ଅନ୍ଲାଇନ ବ୍ୟବସ୍ଥାରେ କରାଯାଉଛି। ଏଥିରେ ଭାଙ୍ଗିଯାଇଥିବା ରେଳଧାରଣାକୁ ଚିହ୍ନଟ କରିବା, ରେଲ-ଷ୍ଟ୍ରେସ୍ ମନିଟରିଂ ବ୍ୟବସ୍ଥା, ସହରତଳି ରେଳ ଚଳାଚଳରେ ଭାରତୀୟ ରେଳପଥର ଜାତୀୟ ଏଟିପି ବ୍ୟବସ୍ଥା ମାଧ୍ୟମରେ ଇଣ୍ଟର ଅପରେବଲ ସିଷ୍ଟମର ବିକାଶ, ଟ୍ରାକ୍ ନିରୀକ୍ଷଣ ତଥା ପରିଦର୍ଶନ ଆଦି କାମକୁ ସ୍ବୟଂକ୍ରିୟ କରିବା, ଅଧିକ ଓଜନର ମାଲବାହୀ ୱାଗନ ପାଇଁ ଅତି ଉନ୍ନତ ଇଲାଷ୍ଟୋମେରିକ ପ୍ୟାଡ୍ର ଡିଜାଇନ ପ୍ରସ୍ତୁତି, ଲୁଣ ଭଳି ସାମଗ୍ରୀ ପରିବହନ ପାଇଁ ହାଲୁକା ୱାଗନ ନିର୍ମାଣ, ଥ୍ରୀ-ଫେଜ୍ ବିଦ୍ୟୁତ୍ଚାଳିତ ଇଞ୍ଜିନରେ ବ୍ୟବହୃତ ଟ୍ରାକ୍ସନ ମୋଟର ପାଇଁ ଅନ୍ଲାଇନ ସ୍ଥିତି ନିରୀକ୍ଷଣ ବ୍ୟବସ୍ଥାର ବିକାଶ ଦିଗରେ ଏହି ସବୁ ଷ୍ଟାର୍ଟଅପ୍ ସଂସ୍ଥା କାର୍ଯ୍ୟ କରୁଛି। ଏହାସହ ଯାତ୍ରୀସେବାରେ ଉନ୍ନତି ପାଇଁ ଡିଜିଟାଲ ଡାଟା ବ୍ୟବହାରକରି ଆନାଲିଟିକାଲ ଟୁଲର ବିକାଶ କରିବା, ରେଳପଥ ସଫେଇ ମେଶିନ ଉପତ୍ାଦନ, ତାଲିମ ପରବର୍ତ୍ତୀ ରିଭିଜନ ଓ ସେଲ୍ଫ ସର୍ଭିସ୍ ରିଫ୍ରେସର କୋର୍ସ ପାଇଁ ଆପ୍ ପ୍ରସ୍ତୁତି, ରେଳ ସେତୁର ସ୍ଥିତି ଅନୁଧ୍ୟାନ ପାଇଁ ଜିଓ ମେଟ୍ରିକ୍ସ ଏବଂ ଜିଆଇଏସ୍ ବ୍ୟବସ୍ଥାର ଉପଯୋଗ ଆଦି କାର୍ଯ୍ୟ ଅନ୍ତର୍ଭୁକ୍ତ ରହିଛି।