ଅନୁଗୋଳ ଅଫିସ, ୭।୮: ନାବାଳିକାଙ୍କ ଗର୍ଭରେ ବଢୁଥିଲା ସନ୍ତାନ। ହେଲେ ଏ କଥା ଜାଣି ନ ଥିଲେ ପରିବାର ସଦସ୍ୟ। ହଠାତ୍ ପେଟରେ ଅସହ୍ୟ ଯନ୍ତ୍ରଣା ଅନୁଭବ କରିବାରୁ ଟ୍ୟୁମର ହୋଇଥିବା ସନ୍ଦେହରେ ଘର ଲୋକେ ତାଙ୍କୁ ନେଇ ଯାଉଥିଲେ ଡାକ୍ତରଖାନା। ହେଲେ ରାସ୍ତାରେ ଅଟୋରିକ୍ସାରେ ନାବାଳିକା ଜଣକ ପ୍ରସବ କଲେ ଏକ କନ୍ୟା ସନ୍ତାନ। ଗୋପନ ପ୍ରେମ ଏବଂ ଶାରୀରିକ ସମ୍ପର୍କରୁ ସମ୍ପୃକ୍ତ ସେ କୁଆଁରୀ ମା’ ସାଜିଥିବା ଚର୍ଚ୍ଚା ଜୋର୍ ଧରିଛି। ଅନୁଗୋଳ ଜିଲାରେ ଶୁକ୍ରବାର ଘଟିଥିବା ଏଭଳି ଏକ ଘଟଣା ଆଲୋଡ଼ନ ସୃଷ୍ଟି କରିଛି।
ସୂଚନାଯୋଗ୍ୟ, ଛେଣ୍ଡିପଦା ବ୍ଲକ ଜରପଡ଼ା ଥାନା ଅଞ୍ଚଳର ସମ୍ପୃକ୍ତା ନାବାଳିକା ଜଣକ ଶୁକ୍ରବାର ସକାଳେ ପେଟରେ ଯନ୍ତ୍ରଣା ଅନୁଭବ କରିଥିଲେ। ସମ୍ପର୍କୀୟମାନେ ତାଙ୍କୁ ଏକ ଅଟୋରିକ୍ସାରେ ଜିଲା ମୁଖ୍ୟ ଚିକିତ୍ସାଳୟକୁ ଆଣୁଥିବାବେଳେ ରାସ୍ତାରେ ପ୍ରସବ ହୋଇଥିଲା। ଏହା ଦେଖିବା ପରେ ପରିବାର ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ, କାରଣ ଟ୍ୟୁମର ପାଇଁ ଝିଅ ପେଟରେ ଯନ୍ତ୍ରଣା ହେଉଥିବା ସେମାନେ ଅନୁମାନ କରିଥିଲେ। ପରେ ମା’ ଏବଂ ଶିଶୁଙ୍କୁ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଦୁଇଜଣଙ୍କ ଚିକିତ୍ସା ଚାଲିଥିବାବେଳେ ଉଭୟ ସୁସ୍ଥ ଥିବା ଡାକ୍ତରଖାନା କର୍ତ୍ତୃପକ୍ଷ କହିଛନ୍ତି। ଅନ୍ୟପଟେ ନାବାଳିକା ଜଣକ ବାରମ୍ବାର ଘରକୁ ଚାଲିଯିବା ପାଇଁ ଜିଦ୍ କରୁଥିବାରୁ ତାଙ୍କୁ କଡ଼ା ସୁରକ୍ଷା ଭିତରେ ରଖାଯାଇଛି। ଘଟଣା ସମ୍ପର୍କରେ ନାବାଳିକା ମୁହଁ ଖୋଲୁନାହାନ୍ତି। ପରିବାର ପକ୍ଷରୁ ଥାନାରେ ଅଭିଯୋଗ ମଧ୍ୟ ହୋଇନାହିଁ। ତେଣୁ ପୋଲିସ ଘଟଣା ସମ୍ପର୍କରେ ଅବଗତ ଥିଲେ ମଧ୍ୟ ତଦନ୍ତ ଆରମ୍ଭ କରିନାହିଁ। ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଟାଉନ୍ ଥାନାକୁ ମୌଖିକ ଭାବେ ଅବଗତ କରାଯାଇଥିବାବେଳେ ଅନୁଗୋଳ ପୋଲିସ ଜରପଡ଼ା ଥାନାକୁ ଘଟଣା ବିଷୟରେ ସୂଚିତ କରାଇଛି। ନାବାଳିକାଙ୍କ ଚିକିତ୍ସାରେ ନିୟୋଜିତ ଜଣେ ଡାକ୍ତର କହିଛନ୍ତି, କନ୍ୟା ସନ୍ତାନ ପ୍ରସବ କରିଥିବା ଝିଅଙ୍କୁ ଦେଖିଲେ ସେ ନାବାଳିକା ବୋଲି ଜଣାପଡୁଛନ୍ତି। ପୋଲିସ ତଦନ୍ତରୁ ଏହାର ସ୍ପଷ୍ଟ ହେବ।