ପାରଳାଖେମୁଣ୍ଡି,୯ା୧୦(ଡି.ଏନ୍.ଏ.): ଗଜପତି ଜିଲା ମୋହନା ଥାନା ଡିମ୍ବିରିଝୁଳି ଗାଁରେ ଅଘଟଣ ଘଟିଛି। ଏକ ଦୋକାନରୁ ଲଲିପପ୍ ଖାଇ ଜଣେ ନାବାଳକଙ୍କ ମୃତ୍ୟୁ ଘଟିଛି। ମୃତ ନାବାଳକ ହେଲେ ଡିମ୍ବିରିଝୁଳି ଗାଁର ବାସୁଦେବ ଶବରଙ୍କ ପୁଅ ବୈକୁଣ୍ଠ(୧୦)। ଏନେଇ ପୋଲିସ ଏକ ମାମଲା(ନଂ. ୧୨/୨୨)ରୁଜୁ କରିଛି। ପରେ ସମ୍ପୃକ୍ତ ଦୋକାନୀଙ୍କୁ ଅଟକ ରଖି ପଚରାଉଚରା କରିବା ସହ ଲଲିପପ୍ ଜବତ କରିଛି।
ବୈକୁଣ୍ଠ ଶୁକ୍ରବାର ସନ୍ଧ୍ୟାରେ ଗାଁର ଏକ ଦୋକାନକୁ ଯାଇ ଲଲିପପ୍ ମାଗିଥିଲେ। ହେଲେ ଦୋକାନୀ ଜଣକ ତାଙ୍କୁ ଲଲିପପ୍ ନ ଦେଇ ନିଜ ଘରକୁ ନେଇ ଲଲିପପ୍ ଖାଇବାକୁ ଦେଇଥିଲେ। ଶନିବାର ହଠାତ୍ ନାବାଳକଙ୍କ ନାକ ଓ ପାଟିରୁ ଫେଣ ବାହାରି ତାଙ୍କର ମୃତ୍ୟୁ ଘଟିଥିଲା। ଗୁଣି କରି ପୁଅକୁ ମାରି ଦେଇଥିବା ସନ୍ଦେହ କରି ମୃତକଙ୍କ ପରିବାର ଲୋକେ ଦୋକାନୀଙ୍କ ଘର ସମ୍ମୁଖରେ ମୃତଦେହ ରଖି ହୋହଲ୍ଲା କରିଥିଲେ। ଏଥିସହ ଲଲିପପ୍ରେ କିଛି ମିଶାଇ ଖାଇବାକୁ ଦେଇଥିବାରୁ ପୁଅର ମୃତ୍ୟୁ ଘଟିଛି ବୋଲି ପରିବାର ପକ୍ଷରୁ ମୋହନା ଥାନାରେ ଲିଖିତ ଅଭିଯୋଗ କରାଯାଇଥିଲା। ଥାନା ଅଧିକାରୀ ପ୍ରଶାନ୍ତ କୁମାର ନିଶିକା, ଅତିରିକ୍ତ ତହସିଲଦାର ହିମାଂଶୁ ପଲାଇ, ଚନ୍ଦ୍ରଗିରି ଫାଣ୍ଡି ଅଧିକାରୀ ପ୍ରତାପ ବେହେରା, କୃଷ୍ଣ ମଲିକ ଓ ପୋଲିସ ଟିମ୍ ଗାଁରେ ପହଞ୍ଚି ମୃତଦେହ ଜବତ କରିଥିଲେ। ତଦନ୍ତ ପରେ ଘଟଣାର ସତ୍ୟାସତ୍ୟ ଜଣାପଡିବ ବୋଲି ଥାନା ଅଧିକାରୀ ନିଶିକା ପ୍ରକାଶ କରିଛନ୍ତି।
