ଭୁବନେଶ୍ୱର,୨୯।୬(ବ୍ୟୁରୋ): ରାଜ୍ୟ ସରକାର ଆଇଏଏସ୍ ଅଫିସର ସ୍ତରରେ ଛୋଟ ଧରଣର ଅଦଳବଦଳ କରିଛନ୍ତି। କେନ୍ଦ୍ରୀୟ ଡେପୁଟେଶନରୁ ଫେରିଥିବା ସତ୍ୟବ୍ରତ ସାହୁଙ୍କୁ ଅଣୁ, କ୍ଷୁଦ୍ର ଏବଂ ମଧ୍ୟମ ଶିଳ୍ପ ବିଭାଗର ପ୍ରମୁଖ ସଚିବଭାବେ ନିଯୁକ୍ତ କରିଛନ୍ତି। ଏହି ବିଭାଗର ଅତିରିକ୍ତ ଦାୟିତ୍ୱରେ ରହିଥିବା ପ୍ରମୁଖ ସଚିବ ହେମନ୍ତ ଶର୍ମାଙ୍କୁ ଏହି ସ୍ଥାନରୁ ହଟାଇ ତାଙ୍କ ସ୍ଥାନରେ ସତ୍ୟବ୍ରତଙ୍କୁ ଦାୟିତ୍ୱ ଦେଇଛନ୍ତି। ସତ୍ୟବ୍ରତ ସାହୁ ଦାୟିତ୍ୱ ନେବାପରେ ଏହି ଦାୟିତ୍ୱରେ ରହିଥିବା ହେମନ୍ତ ଶର୍ମା ଏହି ପଦରୁ ହଟିବେ। ସେହିପରି ଯୋଜନା ଓ ସଂଯୋଜନ ବିଭାଗ ସ୍ବତନ୍ତ୍ର ସଚିବ ଗୋପବନ୍ଧୁ ଶତପଥୀଙ୍କୁ ଓଡ଼ିଶା କୋପରେଟିଭ ବ୍ୟାଙ୍କ ଭୁବନେଶ୍ୱରର ମ୍ୟାନେଜିଂ ଡାରେକ୍ଟର(ଏମ୍ଡି) ଭାବେ ଦାୟିତ୍ୱ ମିଳିଛି। କୋପରେଟିଭ ବ୍ୟାଙ୍କ ଭୁବନେଶ୍ୱରର ଏମ୍ଡି ଥିବା ଦେବେନ୍ଦ୍ର କୁମାର ଜେନାଙ୍କୁ ଏହି ପଦରୁ ହଟାଇ ଦିଆଯାଇଛି। ଗୋପବନ୍ଧୁ ଶତପଥୀ ପାଇଥିବା ମ୍ୟାନେଜିଂ ଡାଇରେକ୍ଟର ଦାୟିତ୍ୱ ସ୍ବତନ୍ତ୍ର ସଚିବ ପାହ୍ୟାର ର଼୍ୟାଙ୍କ ସହିତ ସମାନ, ଏହା ସରକାରଙ୍କ ଆଇଏଏସ୍ କ୍ୟାଡରର ପଦବୀ। ସେହିପରି ଓଡ଼ିଶା କୋପରେଟିଭ ବ୍ୟାଙ୍କ, ଭୁବନେଶ୍ୱର ଏମ୍ଡି ଥିବା ଦେବେନ୍ଦ୍ର କୁମାର ଜେନାଙ୍କୁ ଯୋଜନା ଓ ସଂଯୋଜନ ବିଭାଗ ଅତିରିକ୍ତ ସଚିବ ପଦରେ ଦାୟିତ୍ୱ ମିଳିଛି।