ଭୁବନେଶ୍ୱର,୭ା୧୨ (ବ୍ୟୁରୋ): ନାବାଳିକାଙ୍କୁ ଘରେ ରଖି ଖଟାଉଥିଲେ। ପ୍ରତ୍ୟେକ ଦିନ ତାଙ୍କୁ ଲୁହା ରଡ୍ରେ ମାଡ଼ ମାରିବା ସହ ଅକଥନୀୟ ନିର୍ଯାତନା ଦେଉଥିଲେ। ମାଡ଼ରେ ଗୁରୁତର ହେବା ପରେ ମଙ୍ଗଳବାର ଅପରାହ୍ନରେ ୧୧ ବର୍ଷୀୟା ନାବାଳିକାଙ୍କୁ ମାଲିକ ଜଣକ ନୟାପଲ୍ଲୀ ଥାନା ଅନ୍ତର୍ଗତ ସାଲିଆସାହିରେ ଫୋପାଡ଼ି ଦେଇ ପଳାଇ ଯାଇଛନ୍ତି। ଏଭଳି ସମ୍ବେଦନଶୀଳ ଘଟଣାକୁ ନେଇ ରାଜଧାନୀରେ ଆଲୋଡ଼ନ ସୃଷ୍ଟି ହୋଇଛି। ଖବରପାଇ ଚାଇଲ୍ଡଲାଇନ ସହଯୋଗରେ ପୋଲିସ ଗୁରୁତର ନାବାଳିକାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛି। ନାବାଳିକାଙ୍କ ଶରୀରର ବିଭିନ୍ନ ସ୍ଥାନରେ ଏକାଧିକ କ୍ଷତ ଚିହ୍ନ ରହିଛି। ତାଙ୍କର ଅଧିକ ଚିକିତ୍ସା କରାଯାଉଥିବା ବେଳେ ଚାଇଲ୍ଡଲାଇନ ପକ୍ଷରୁ ଘଟଣା ସଂକ୍ରାନ୍ତରେ ନୟାପଲ୍ଲୀ ଥାନାରେ ଏତଲା ଦିଆଯାଇଛି। ପୋଲିସ ଏକ ମାମଲା (ନଂ.୭୫୨/୨୦୨୨) ରୁଜୁ କରି ଅଭିଯୁକ୍ତ ମାଲିକଙ୍କୁ ଗିରଫ କରିଛି। ସେ ହେଲେ ଇନ୍ଫୋଭ୍ୟାଲି ଥାନା ଅନ୍ତର୍ଗତ କାଇମାଟିଆରେ ରହୁଥିବା ବିଭୂତି ପଟ୍ଟନାୟକ। ଅଭିଯୁକ୍ତ ବିଭୂତିଙ୍କୁ ପୋଲିସ ପଚରାଉଚରା କରୁଛି। ଥାନାଧିକାରୀ ବିଶ୍ୱରଞ୍ଜନ ସାହୁ କହିଛନ୍ତି, ଗିରଫ ଅଭିଯୁକ୍ତ ବିଭୂତିଙ୍କୁ ବୁଧବାର କୋର୍ଟ ଚାଲାଣ କରାଯିବ। ମାମଲାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କ ବିରୋଧରେ ଆଗକୁ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି। ତେବେ ଏହି ଘଟଣା ସଂକ୍ରାନ୍ତରେ ସିଡବ୍ଲ୍ୟୁସି ଓ ଭୁବନେଶ୍ୱର ଡିସିପିଙ୍କୁ ଜଣାଯାଇଥିବା ଚାଇଲ୍ଡଲାଇନ ଅଧ୍ୟକ୍ଷ ବେଣୁଧର ସେନାପତି କହିଛନ୍ତ।
ସୂଚନା ଅନୁଯାୟୀ, ସାଲିଆସାହିରେ ନାବାଳିକାଙ୍କ ମା’ ରହୁଛନ୍ତି। ତାଙ୍କ ବାପା ପରିବାରକୁ ଛାଡ଼ି କେଉଁଆଡ଼େ ଚାଲିଯାଇଛନ୍ତି। ପରିବାରରେ ୪ଟି ଝିଅ ଓ ଗୋଟିଏ ଦେଢ଼ବର୍ଷର ପୁଅ। ନିର୍ଯାତନାର ଶିକାର ହୋଇଥିବା ନାବାଳିକା ଜଣକ ତାଙ୍କର ତୃତୀୟ ଝିଅ। ପରିବାରରେ ଆର୍ଥିକ ଅନଟନ ଲାଗି ରହିଥିବାରୁ ନାବାଳିକା ଜଣକ ଅଧାରୁ ପାଠପଢ଼ା ଛାଡ଼ି ଦେଇଥିଲେ। ୩ ମାସ ହେଲା ଜଣେ ମଧ୍ୟସ୍ଥ ତାଙ୍କୁ ନେଇ ସମ୍ପୃକ୍ତ ମାଲିକଙ୍କ ଘରେ ଛାଡ଼ି ଦେଇଥିଲେ। ପ୍ରତି ମାସରେ ନାବାଳିକାଙ୍କ ଘରକୁ ୧ ହଜାର ଟଙ୍କା ଆସୁଥିବା ସୂଚନା ମିଳିଛି।