ରଘୁନାଥପୁର,୧୧।୩(ଡି.ଏନ୍.ଏ.): ଜଗତ୍ସିଂହପୁର ଜିଲା ରଘୁନାଥପୁର ଥାନା ଅନ୍ତର୍ଗତ ସାଦେଇପୁର ପଞ୍ଚାୟତ ରାଉତ ନୂଆଗାଁର ନାରାୟଣ ପାଣି ଶନିବାର ଏକ ଗୁରୁତର ଅଭିଯୋଗ ଆଣିଛନ୍ତି। ଗୁପ୍ତଧନ ପାଇବା ଆଶାରେ ତାଙ୍କ ନାବାଳିକା ଝିଅକୁ ବଳିଦେବା ଉଦ୍ଦେଶ୍ୟରେ ସନ୍ଦିଗ୍ଧ ବ୍ୟକ୍ତି ଟାର୍ଗେଟ କରିଥିବା ଅଭିଯୋଗରେ ଉଲ୍ଲେଖ କରିଛନ୍ତି। ନାରାୟଣଙ୍କ ଅଭିଯୋଗ ଅନୁଯାୟୀ, ତାଙ୍କ ଘରେ ନାବାଳିକା ଝିଅ, ସ୍ତ୍ରୀ, ନାବାଳକ ପୁଅ ଏବଂ ୨ ଅବିବାହିତା ଭଉଣୀ ରୁହନ୍ତି। କିଛି ଦିନ ହେବ ଜଣେ ଅଜଣା ବ୍ୟକ୍ତି କଳା ପୋଷାକ ପିନ୍ଧି ରାତିରେ ଘର ସମ୍ମୁଖରେ ଠିଆ ହେବା ସହ ଗ୍ରୀଲ୍କୁ ବାଡ଼ାଉଛନ୍ତି। ଏନେଇ ପରିବାର ଲୋକେ ଭୟଭୀତ ହୋଇପଡ଼ିଛନ୍ତି। ସ୍ଥାନୀୟ ଅଞ୍ଚଳର କେତେଜଣ ବ୍ୟକ୍ତି ସମ୍ପୃକ୍ତ ସନ୍ଦିଗ୍ଧଙ୍କୁ ଗୋଡ଼ାଇବାରୁ ସେ ଏକ ନମ୍ବର ବିହୀନ ବାଇକରେ ଫେରାର ହେଇଯାଇଛନ୍ତି। ଏହାର ପ୍ରଭାବ ନାରାୟଣଙ୍କ ନାବାଳିକା ଝିଅ ଉପରେ ପଡ଼ିଛି। ଭୟରେ ସେ ଏକ ସପ୍ତାହ ହେବ ସ୍କୁଲ୍ ଯିବା ବନ୍ଦ କରି ଦେଇଥିବା ନାରାୟଣ କହିଛନ୍ତି।
ଜଗତ୍ସିଂହପୁର ଥାନା ସମଙ୍ଗ ଗ୍ରାମର ମୃତ ନନ୍ଦାବ୍ରତ ନଦୀ ଉପରେ ଥିବା ଏକ ପରିତ୍ୟକ୍ତ ଜଙ୍ଗଲିଆ ସ୍ଥାନରେ ଉଇ ହୁଙ୍କା ରହିଛି। ସେଠାରୁ ଗୁପ୍ତଧନ ପାଇବା ଆଶାରେ କେତଜଣ ବ୍ୟକ୍ତି ରାତ୍ରିରେ ତନ୍ତ୍ରପୂଜା କରୁଛନ୍ତି। ଏଥିପାଇଁ କୁଆଡ଼େ ବ୍ରାହ୍ମଣ ପରିବାରର ଜଣେ ନାବାଳିକା ଆବଶ୍ୟକ ବୋଲି ଗୁଜବ ହେଉଛି। ଏନେଇ ନାରାୟଣଙ୍କ ପରିବାରକୁ ଭୟ ଘାରିଛି। ତୁରନ୍ତ ଏନେଇ କାର୍ଯ୍ୟାନୁଷ୍ଠାନ ସହ ପରିବାରକୁ ସୁରକ୍ଷା ଦେବାକୁ ନାରାୟଣ ଦାବି କରିଛନ୍ତି। ଏ ସମ୍ପର୍କରେ ଥାନା ଏସ୍ଆଇ ଅନୀଲ କୁମାର ସାହୁ କୁହନ୍ତି, ସନ୍ଧ୍ୟାରେ ଅଭିଯୋଗ ମିଳିଛି। ଖୁବ୍ଶୀଘ୍ର ଏନେଇ ତଦନ୍ତ କରାଯିବ।
