ଭୁବନେଶ୍ୱର, ୯।୯: ଜିନ୍ଦଲ ଷ୍ଟେନଲେସ ଲିମିଟେଡ (ଜେଏସ୍ଏଲ୍)ର ଓଡ଼ିଶା ୟୁନିଟ (ଜେଏସ୍ଏଲ୍, ଯାଜପୁର) ଷ୍ଟିଲ ମେଲଟିଂ ସ୍କ୍ରାପରେ କାର୍ଯ୍ୟରତ ମିନୁ ମହନ୍ତ ପ୍ରଥମ ଓଭରହେଡ କ୍ରେନ ଅପରେଟର (ଓସିଓ) ଭାବେ ମାନ୍ୟତା ଲାଭ କରିଛନ୍ତି। ଉଲ୍ଲେଖଯୋଗ୍ୟ, ବହୁ ଘାତ ପ୍ରତିଘାତ ମଧ୍ୟରେ ମିନୁ ମହନ୍ତ ମନରେ ସାହସ ଓ ଆଗ୍ରହ ଏବଂ ପ୍ରଚେଷ୍ଟା ଜାରି ରଖି ଏହି ସଫଳତା ପାଇଛନ୍ତି। ଏପରି କି ସେ ପ୍ରଥମେ ଏକ ଘରୋଇ ପଥର ଭଙ୍ଗା କ୍ରଶରରେ କାର୍ଯ୍ୟ ଆରମ୍ଭ କରି ଶେଷରେ କାରଖାନାର ଏକମାତ୍ର ମହିଳା ଓସିଓ (ଓଭର ହେଡ୍ କ୍ରେନ ଅପରେଟର) ହୋଇପାରିଥିଲେ। ବିଶେଷ କରି ମିନୁଙ୍କ ଜୀବନର ଏହି କାହାଣୀ ପଛରେ ଅସୀମ ପ୍ରେରଣା ଓ ସାହସ ରହିଥିଲା। ଯାହାଫଳରେ ସେ କଠିନ ପରିଶ୍ରମ ଓ ପରିସ୍ଥିତି ସତ୍ତ୍ୱେ ନିଜର କର୍ତ୍ତବ୍ୟକୁ ଠିକ ଭାବେ ପାଳନ କରି ବେଶ୍ ସଫଳ ହୋଇପାରିଛନ୍ତି। ମିନୁଙ୍କ ଜୀବନ କାହାଣୀ ଅନେକ ମହିଳାଙ୍କୁ ପ୍ରଭାବିତ କରିଛି, ଏପରି କି ସୁନିତା ହେମ୍ବ୍ରମ ଓ ବବିତା ଦଳାଇ ମିନୁଙ୍କ ପଥ ଅନୁସରଣ କରି କ୍ରେନ ଅପରେଟର ଭାବେ କାର୍ଯ୍ୟ କରୁଛନ୍ତି। ସେ ସମସ୍ତଙ୍କୁ ନିଷ୍ଠାର ସହ କାର୍ଯ୍ୟ କରିବା ଓ ଅନ୍ୟମାନଙ୍କ ନୈରାଶ୍ୟରେ ସାନ୍ତ୍ୱନା ମଧ୍ୟ ଦେଇଥାନ୍ତି। ଅପରପକ୍ଷରେ ମିନୁ ମହନ୍ତ ଯାଜପୁର ଜିଲାର ଟମକା ଗ୍ରାମର କିଆ ଝରରେ ଜନ୍ମ ଗ୍ରହଣ କରିଥିଲାବେଳେ କମ୍ ବୟସ ଏବଂ ଗୋଷ୍ଠୀର ନିୟମ ଅନୁସାରେ ତାଙ୍କୁ ୧୪ ବର୍ଷ ବୟସରେ ବିବାହ କରି ଦିଆଯାଇଥିଲା।
