କୋହ୍ଲାପୁର,୩।୧: ମହାରାଷ୍ଟ୍ରର କୋହ୍ଲାପୁରରେ ଏକ ଚମତ୍କାର କଲା ଭଳି ଘଟଣା ଘଟିଛି। ଏଠାରେ ଜଣେ ବୃଦ୍ଧ ଖାଲ ଯୋଗୁ ପୁନର୍ଜନ୍ମ ପାଇଛନ୍ତି। ଡାକ୍ତରଖାନାରେ ହୃଦ୍ଘାତରେ ତାଙ୍କ ମୃତ୍ୟୁ ହୋଇଥିବା କହି ଡାକ୍ତର ଫେରାଇ ଦେଇଥିଳେ। ହେଲେ ବାଟରେ କିଛି ଏଭଳି ଘଟିଥିଲା ଯାହା ଫଳରେ ସେ ଜୀବିତ ହୋଇ ଉଠିଥିଲେ। ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
କସ୍ବା ବାଓ୍ବଡା ଅଞ୍ଚଳର ୬୫ ବର୍ଷୀୟ ପାଣ୍ଡୁରଙ୍ଗ ତାତ୍ୟା ଉଲ୍ପେଙ୍କ ମୁଣ୍ଡ ବୁଲାଇବା ଯୋଗୁ ସେ ଘରେ ପଡ଼ି ଯାଇଥିଲେ। ତାଙ୍କୁ ଡାକ୍ତରଖାନା ନିଆଯାଇଥିଲା। ସେଥିରେ ପାଣ୍ଡୁରଙ୍ଗଙ୍କୁ ହୃଦଘାତ ହୋଇଥିବା ଡାକ୍ତର କହିବା ସହ ମୃତ ଘୋଷଣା କରିଥିଲେ। ପରେ ପରିବାରଲୋକେ ତାଙ୍କ ମୃତଦେହକୁ ଅନ୍ତିମ ସଂସ୍କାର ଲାଗି ଆମ୍ବୁଲାନ୍ସରେ ନେଇ ଘରକୁ ଫେରୁଥିଲେ।
ଫେରିବା ବାଟରେ ଗାଡ଼ିଟି ଏକ ଖାଲରେ ପଶି ଯାଇଥିଲା। ଫଳରେ ଏକ ପ୍ରକାର ଝଟ୍କା ଲାଗିଥିଲା। ପରେ ପାଣ୍ଡୁରଙ୍ଗ ହାତ ହଲାଉଥିବା ଦେଖିବାକୁ ମିଳିଥିଲା। ଶରୀର ହଲଚଲ ହେବା ପରେ ତାଙ୍କୁ ପୁଣିଥରେ ଡାକ୍ତରଖାନା ନିଆଯାଇଥିଲା।
ଏନେଇ ପଚରାଯିବାରେ ପାଣ୍ଡୁରଙ୍ଗଙ୍କ ପରିବାରଲୋକେ କହିଛନ୍ତି, ଆମେ ଅନ୍ତିମ ସଂସ୍କାର ପାଇଁ ପ୍ରସ୍ତୁତି କରି ସାରିଥିଲୁ।
ଡାକ୍ତରମାନେ ମୃତ ଘୋଷଣା କରିବା ପରେ ୩ ଘଣ୍ଟା ଯାଏ ଜରୁରୀ ପ୍ରକ୍ରିୟା ପୂରଣ କରିଥିଲୁ। ପରେ ଆମ୍ବୁଲାନ୍ସ ବୁକ୍ କରି ଘରକୁ ଫେରିଥିଲୁ। ରାସ୍ତାରେ ଝଟ୍କା ଲାଗିବା ପରେ ତାଙ୍କ ନିଃଶ୍ୱାସ ଚାଲୁଥିବା ଜାଣିବାକୁ ପାଇଥିଲୁ। ତୁରନ୍ତ ତାଙ୍କୁ ଡାକ୍ତରଖାନା ନେଇଥିଲୁ। ସେ ଜୀବିତ ଥିବା ଡାକ୍ତର କହିବା ପରେ ବହୁତ ଖୁସି ହେବା ସହ ଚକିତ ହୋଇଯାଇଥିବା ସେମାନେ କହିଛନ୍ତି।
