କାଏମା,୨୬ା୬(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ ଅନ୍ତର୍ଗତ ମିର୍ଜାପୁରଠାରେ ଥିବା ଇଣ୍ଡିଆନ୍ ବ୍ୟାଙ୍କ୍ ଶାଖା ଅବ୍ୟବସ୍ଥା ମଧ୍ୟରେ ଚାଲିଥିବା ଅଭିଯୋଗ ହୋଇଛି। ଏହି ଶାଖାରେ ୪୦ ହଜାରରୁ ଊର୍ଦ୍ଧ୍ୱ ଗ୍ରାହକଙ୍କ ଜମାଖାତା ରହିଛି। ଫଳରେ ଏଠାରେ ସବୁଦିନ ଭିଡ଼ ରହୁଛି। କିନ୍ତୁ ଉକ୍ତ ଶାଖାରେ ଗ୍ରାହକଙ୍କୁ ଉପଯୁକ୍ତ ସୁବିଧା ମିଳୁ ନ ଥିବା ଅନେକ ଗ୍ରାହକ ଅଭିଯୋଗ କରିଛନ୍ତି। ଏହାପ୍ରଥମେ ଆଲାହାବାଦ ବ୍ୟାଙ୍କଥିବାଳ ବେଳେ ପରେ ମିଶ୍ରଣ ହୋଇ ଇଣ୍ଡିଆନ ବ୍ୟାଙ୍କ ଭାବେ ପରିଚିତ ହୋଇଛି। ସେବେଠୁ ଆଜିଯାଏ ଉକ୍ତ ଶାଖାରେ ସୁରକ୍ଷାକର୍ମୀ ନାହାନ୍ତି। ଏଠାରେ ପୂର୍ବରୁ ୩ଜଣ କର୍ମଚାରୀ ଥିବାବେଳେ କିଛିଦିନ ତଳେ ଜଣକର ବଦଳି ହୋଇଛି। ତାଙ୍କ ସ୍ଥାନରେ ଆଉ କାହାରିକୁ ନିଯୁକ୍ତି ଦିଆଯାଇନାହିଁ। ଏବେ କେବଳ ବ୍ୟାଙ୍କ ଶାଖା ପରିଚାଳକ ଓ କ୍ୟାଶିୟରଙ୍କୁ ନେଇ କାର୍ଯ୍ୟ ଚାଲୁଛି। ଜଣେ କର୍ମଚାରୀଙ୍କ ଅଭାବରୁ ପାସ୍ ବୁକ୍ ପ୍ରିଣ୍ଟ କରିବାକୁ ଗଲେ ତାହା ପ୍ରିଣ୍ଟ୍ ହେବାକୁ ୨ ଦିନ ଲାଗୁଛି। ଜମା ଖାତା ବ୍ୟାଙ୍କରେ ଦାଖଲ କରିବାର ୨ ଦିନ ପରେ ପ୍ରିଣ୍ଟ୍ କରି ଦିଆଯାଉଛି। କେତେବେଳେ ଯଦି ଜଣେ କର୍ମଚାରୀ ଛୁଟିରେ ରହୁଛନ୍ତି ସେଦିନ ବ୍ୟାଙ୍କ୍ ସେବା ଏକ ପ୍ରକାର ଠପ୍ ହୋଇଯାଇଛି। ବ୍ୟାଙ୍କରେ ଏସି ନ ଥିବାରୁ ଗ୍ରାହକ ଓ ବ୍ୟାଙ୍କ କର୍ମଚାରୀ ଖରା, ଗରମ ସମୟରେ ଛଟପଟ ହେଉଛନ୍ତି।
ଉକ୍ତ ବ୍ୟାଙ୍କ୍ ଶାଖାଟି ଗାଁ ମଝିରେ ଥିବାରୁ କେତେଜଣ ସ୍ଥାନୀୟ ଟ୍ରକ୍ ମାଲିକ ଅନେକ ସମୟରେ ବ୍ୟାଙ୍କ ସମ୍ମୁଖରେ ବେଆଇନ ଭାବେ ଗାଡ଼ି ପାର୍କିଂ କରୁଛନ୍ତି। ସେହିପରି ବ୍ୟାଙ୍କ୍ ଶାଖାକୁ ଲାଗି ବିଭିନ୍ନ ସମୟରେ ଇଟାଭାଟି ଜଳୁଛି। ଫଳରେ ଇଟାଭାଟି ଧୂଅଁାରେ ଲୋକେ ଅଣନିଃଶ୍ୱାସୀ ହୋଇପଡୁଛନ୍ତି। ଇଟା ତିଆରି ପାଇଁ କୁଢ଼କୁଢ଼ ମାଟିଗଦା ହୋଇଛି। ଏନେଇ ଅଭିଯୋଗ ହେଲେ ମଧ୍ୟ ତହସିଲ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। କେତେଜଣ ରାଜସ୍ବ କର୍ମଚାରୀ ହାତଗୁଞ୍ଜା ନେଇ ବେଆଇନ ଇଟାଭାଟିକୁ ଅନୁମତି ଦେଉଥିବାରୁ ଅଞ୍ଚଳରେ ବାୟୁ ପ୍ରଦୂଷଣ ବଢ଼ିବାରେ ଲାଗିଛି। ବେଆଇନ ଇଟାଭାଟି ବନ୍ଦ କରିବା ପାଇଁ ନିର୍ଦ୍ଦେଶ ଥିଲେ ସୁଦ୍ଧା ଧର୍ମଶାଳା ଅଞ୍ଚଳରେ ଏହା କାର୍ଯ୍ୟକାରୀ ହୋଇପାରୁ ନାହିଁ ବୋଲି ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ସାଲେପୁର ଆର୍ଆଇ ରାମେଶ୍ୱରୀ ଜେନାଙ୍କୁ ପଚାରିବାରେ ସେ କହିଛନ୍ତି, ବେଆଇନ ଇଟାଭାଟି ସମ୍ପର୍କରେ ତାଙ୍କ ନିକଟରେ କୌଣସି ଖବର ନାହିଁ। ଖବର ମିଳିଲେ ସେ ତହସିଲଦାରଙ୍କୁ ଜଣାଇ କାର୍ଯ୍ୟାନୁଷ୍ଠାନ ଗ୍ରହଣ କରିବେ। ଅନ୍ୟପକ୍ଷରେ ବ୍ୟାଙ୍କର ନାନା ଅବ୍ୟବସ୍ଥା ସମ୍ପର୍କରେ ଶାଖା ପରିଚାଳକ ଜଗଦୀଶ ଚନ୍ଦ୍ର ବେହେରାଙ୍କୁ ପଚାରିଥିଲେ ମଧ୍ୟ ସେ କୌଣସି ପ୍ରତିକ୍ରିୟା ଦେଇନାହାନ୍ତି।