ବାଲେଶ୍ୱର ଅଫିସ,୨।୩: ବାଲେଶ୍ୱର ଜିଲା ରେମୁଣା ବ୍ଲକ ଅଧୀନ ନୂଆଗାଁ ପଞ୍ଚାୟତରେ ଥିବା ପୋଖରୀଗୁଡ଼ିକରୁ ବେଆଇନ ଭାବେ ମାଟି ଚୋରି ହେଉଛି। ପରେ ଏହାକୁ ଏମ୍ଜିଏନଆରଇଜିଏସ୍ରେ ସାମିଲ କରି ଜାଲ୍ ଜବ୍କାର୍ଡ଼ଧାରୀଙ୍କ ସହ ସଲାସୁତରା କରି ଲକ୍ଷ ଲକ୍ଷ ଟଙ୍କା ସରକାରୀ ଅର୍ଥକୁ ହଡ଼ପ କରାଯାଉଛି। ଏନେଇ ନୂଆଗାଁ ପଞ୍ଚାୟତର ପୂର୍ବତନ ସରପଞ୍ଚ ଅମୂଲ୍ୟ କୁମାର ପରିଡ଼ା ଅଭିଯୋଗ କରି ଜିଲାପାଳଙ୍କ ସମେତ ଜିଲା ପରିଷଦ ମୁଖ୍ୟ ଉନ୍ନୟନ ତଥା କାର୍ଯ୍ୟନିର୍ବାହୀ ଅଧିକାରୀ, ରେମୁଣା ବିଡିଓ ଓ ୫-ଟି ସଚିବଙ୍କୁ ଲିଖିତ ଅବଗତ କରାଇଛନ୍ତି।
ନୂଆଗାଁ ପଞ୍ଚାୟତ ଅଧୀନ ୧୩ ନଂ. ୱାର୍ଡ଼ ଭୂଇଁପଡ଼ା ମୌଜାର ଲକ୍ଷ୍ମଣ ପୋଖରୀ ଓ ଭଣ୍ଡାରିଆ ପୋଖରୀରୁ ଜେସିବି ମେସିନ୍ ଦ୍ୱାରା ମାଟି ଉତ୍ତୋଳନ କରି ବେଆଇନ ଭାବରେ ଶହ ଶହ ଟ୍ରିପ୍ ମାଟି ବିକ୍ରି କରାଯାଉଛି। ପରବର୍ତ୍ତୀ ସମୟରେ ଉକ୍ତ ପୋଖରୀକୁ ଏମ୍ଜିଏନଆରଇଜିଏସ୍ରେ ସାମିଲ୍ କରି ଜବକାର୍ଡ଼ଧାରୀଙ୍କ ସହ ସଲାସୁତରା ହୋଇ ସରକାରୀ ଅଧିକାରୀ ଏବଂ ନେତାମାନେ ଲକ୍ଷ ଲକ୍ଷ ଟଙ୍କା ହଡ଼ପ କରିଥିବା ଅଭିଯୋଗ ହୋଇଛି। କେବଳ ଏହି ଦୁଇ ପୋଖରୀ ନୁହେଁ, ଉକ୍ତ ପଞ୍ଚାୟତରେ ବିଭିନ୍ନ ରାଜସ୍ବ ମୌଜାରେ ଥିବା ପୋଖରୀ, ନାଳ, ଅନାବାଦୀ ଉପରେ ଜେସିବି ଲଗାଇ ଏନ୍ଆର୍ଇଜିଏସ୍ କାମକୁ ସମ୍ପୂର୍ଣ୍ଣ ହୋଇଛି ବୋଲି ରୂପାନ୍ତରିତ କରିବାକୁ ଯୋଜନା କରାଯାଉଛି। ବେଆଇନ କାର୍ଯ୍ୟକୁ ରୋକିବା ପାଇଁ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି ହୋଇଛି।
ଏନେଇ ଜିଲା ପରିଷଦ ମୁଖ୍ୟ ଉନ୍ନୟନ ତଥା କାର୍ଯ୍ୟନିର୍ବାହୀ ଅଧିକାରୀ ରବୀନ୍ଦ୍ର କୁମାର ସାହୁ କହିଛନ୍ତି, ଅଭିଯୋଗ ପାଇବା ପରେ ବିଭାଗୀୟ ଅଧିକାରୀଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ମିଳିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।