ଆନନ୍ଦପୁର,୧୭ା୫(ସ୍ବ.ପ୍ର.): ଆନନ୍ଦପୁର ଉପଖଣ୍ଡ ହାଟଡିହୀ ବ୍ଲକ ବିଏଲ୍ଏଫ୍ ଆକାଉଣ୍ଟରୁ ଟଙ୍କା ଆତ୍ମସାତ୍ ଘଟଣାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି। ରାଜନୈତିକ ବ୍ୟକ୍ତିବିଶେଷଙ୍କ ବାହୁ ଛାୟା ତଳେ ରହିଥିବା ସମ୍ପାଦିକା ପୂର୍ବତନ ସଭାପତିଙ୍କ ପ୍ରରୋଚନାରେ ବିଭିନ୍ନ ଅନିୟମିତତା କାର୍ଯ୍ୟ କରିବା, ଅର୍ଥ ଆତ୍ମସାତ୍ କରିବା ଭଳି ଗୁରୁତର ଅଭିଯୋଗ ଆଣିଛନ୍ତି ସଭାନେତ୍ରୀ ସାବିତ୍ରୀ ସା। ବିଏଲ୍ଏଫ୍ରେ ହୋଇଥିବା ଅନିୟମିତତା ପ୍ରସଙ୍ଗର ଦାବି କରି ସଭାନେତ୍ରୀ ଓ ସଦସ୍ୟ ସଞ୍ଜୁଲତା ମଲ୍ଲିକ, ମନୋଜାମଞ୍ଜରୀ ପାତ୍ର, ଉଷାରାଣୀ ସାହୁ, ସସ୍ମିତା ଜେନା, ଆରତି ମହାପାତ୍ର, ଭାଗ୍ୟଶ୍ରୀ ରାଉତ, ତିଳୋତ୍ତମା ରାଉତ, ପଦ୍ମାବତୀ ଶତପଥୀ, ପୁଷ୍ପଲତା ସ୍ବାଇଁଙ୍କ ସମତେ ଅନ୍ୟ ସଦସ୍ୟମାନେ ଆନନ୍ଦପୁର ଉପଜିଲାପାଳଙ୍କଠାରୁ ଆରମ୍ଭ କରି ଜିଲାପାଳ, ପି.ଡି.କେନ୍ଦୁଝର, ଡିପିସି ମିଶନଶକ୍ତି କେନ୍ଦୁଝର, ମିଶନ ଶକ୍ତି ସଚିବ ଭୁବନେଶ୍ୱରଙ୍କୁ ଅବଗତ କରାଯାଇଥିଲେ ବି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବା ଅଭିଯୋଗ ହୋଇଛି। ହାଟଡିହୀ ବିଏଲ୍ଏଫ୍ରେ ହୋଇଥିବା ଦୁର୍ନୀତି ପ୍ରସଙ୍ଗରେ ଗତ ୨୯.୩.୨୦୨୩ରେ ସଭାପତି ସାବିତ୍ରୀ ସାଙ୍କ ନେତୃତ୍ୱରେ ସଦସ୍ୟମାନେ ଆନନ୍ଦପୁର ଉପଜିଲାପାଳଙ୍କୁ ଦାବିପତ୍ର ଦେଇଥିଲେ ସୁଦ୍ଧା ଅଦ୍ୟାବଧି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବାରୁ ଉପଜିଲାପାଳଙ୍କୁ ସାକ୍ଷାତ କରିବା ଅବସରରେ ଆସିଥିବା ସଭାପତି ସା ସ୍ଥାନୀୟ ଗଣମାଧ୍ୟମ ପ୍ରତିନିଧିଙ୍କ ସମ୍ମୁଖରେ ତାଙ୍କର ଅଭିଯୋଗ ପ୍ରକାଶ କରିଛନ୍ତି। ଗତ ୧୩.୧.୨୦୨୧ରେ ଶାଢ଼ି କିଣା ବାବଦକୁ ସିଡିପିଓ ଓ ବିପିସିଙ୍କ ଅଗୋଚରରେ ସମ୍ପାଦିକାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅର୍ଥ ଉଠାଣ କରିବା, ଅଭିଯୋଗ ପରେ ବିଏଲ୍ଏଫ୍ ଆକାଉଣ୍ଟକୁ ଅର୍ଥ ଫେରସ୍ତ କରିବା ଏବଂ ଅଦ୍ୟାବଧି ସମ୍ପୂର୍ଣ୍ଣ ଫେରସ୍ତ ହୋଇ ନ ଥିବାର ଅଭିଯୋଗ ସହିତ ସେପ୍ଟେମ୍ବର ୨୦୨୨ରେ ଲୋନ୍ରୁ ଆଦାୟ ହୋଇଥିବା ୩୦୮୭୧ ଟଙ୍କା କିସ୍ତି ୨୦୨୩ ଜାନୁୟାରୀରେ ଜମା କରିବା, କ୍ଷମତାର ଅପବ୍ୟବହାର କରି ଓଡ଼ିଶା ଗ୍ରାମ୍ୟ ବ୍ୟାଙ୍କ ନନ୍ଦପଦା ଶାଖାରେ କଳିଙ୍ଗା ଜିପିଏଲ୍ଏଫ୍ ଜମାଖାତାରେ ଟଙ୍କା ନେଣଦେଣକୁ ବନ୍ଦ ରଖିବାକୁ ଦରଖାସ୍ତ ଦେବା,ବ୍ୟାଙ୍କ ମିତ୍ର ସିଆରପି ଓ ଏମ୍ବିକେ ଚୟନରେ ଅନିୟମିତତା ପାଇଁ ବାଧ୍ୟ କରାଯିବା ଭଳି ବହୁ ଅନିୟମିତତା ସମ୍ପର୍କରେ ଅଭିଯୋଗ ହୋଇଥିବା ସଭାପତି ସା ପ୍ରକାଶ କରିଛନ୍ତି। ଏପରିକି ଘଟଣାର ତଦନ୍ତ କରାଯାଇ ଆଇନ ଅନୁଯାୟୀ ପଦକ୍ଷେପ ଗ୍ରହଣ କରିବାକୁ ମଧ୍ୟ ଦାବି କରିଛନ୍ତି।