ମୁମ୍ବାଇ: ଚଣ୍ଡିଗଡ଼ର ଝିଅ ୨୨ ବର୍ଷୀୟା ଶ୍ୱେତା ଶ୍ରଦ୍ଧା ମିସ୍ ଦିଭା ୟୁନିଭର୍ସ ୨୦୨୩ ବ୍ୟୁଟି ପିଜାଣ୍ଟର ବିଜେତା ହୋଇଛନ୍ତି। ରବିବାର ମୁମ୍ବାଇସ୍ଥିତ ଆୟୋଜିତ ଇଭେଣ୍ଟରେ ଶ୍ୱେତା ଏହି ମୁକୁଟ ଜିତିଛନ୍ତି। ଏହି ପ୍ରତିଯୋଗିତା ଗତବର୍ଷ ନଭେମ୍ବରରେ ଏଏଲ୍ ସାଲଭାଡରେ ଆୟୋଜିତ ହୋଇଥିଲା। ଶ୍ୱେତା ଏଥିରେ ୭୨ତମ ମିସ୍ ଦିଭା ୟୁନିଭର୍ସ ଭାବେ ଇଣ୍ଡିଆରୁ ପ୍ରତିନିଧିତ୍ୱ କରୁଥିଲେ। ମିସ୍ ଦିଭା ୟୁନିଭର୍ସ ୨୦୨୨ ମୁକୁଟ ଅଧିକାରୀ ଦିଭିତା ରାଏ ଶ୍ୱେତାଙ୍କୁ ମୁକୁଟ ପିନ୍ଧାଇଥିଲେ। ଇଭେଣ୍ଟରେ ଦିଲ୍ଲୀର ସୋନଲ କୁକକେଜା ମିସ୍ ଦିଭା ସୁପରନ୍ୟାଶନାଲ ୨୦୨୩ ଟାଇଟଲ ଜିତିଥିଲେ। ସୋନଲ ୧୨ତମ ମିସ୍ ଦିଭା ସୁପରନ୍ୟାଶନାଲ ୨୦୨୩ ଭାବେ ଇଣ୍ଡିଆରୁ ପ୍ରତିନିଧିତ୍ୱ କରୁଥିଲେ। ମିସ୍ ଦିଭା ୨୦୨୩ ରନର୍ସ ଅପ୍ ଭାବେ କର୍ନାଟକର ତ୍ରିଶା ସେଟ୍ଟୀ ମୁକୁଟ ପିନ୍ଧିଥିଲେ। ମା’ ଓ ନିଜ ସ୍ବପ୍ନ ପୂରଣ କରିବାକୁ ଶ୍ୱେତା ୧୬ ବର୍ଷ ବୟସରେ ମୁମ୍ବାଇକୁ ଯାଇଥିଲେ। ସେ ଡିଆଡି, ଡ୍ୟାନ୍ସ ଦିୱାନେ, ଝଲକ ଦିଖ ଲାଜା ଏବଂ ଡ୍ୟାନ୍ସ ପ୍ଲସ୍ ଭଳି ଶୋ’ରେ ନିଜ ନୃତ୍ୟ ପରିବେଷଣ କରିବା ସହ ଝଲକ ଦିଖ ଲାଜାରେ କୋରିଓଗ୍ରାଫର ଭୂମିକା ତୁଲାଇଥିଲେ। ଶ୍ୱେତାଙ୍କ ମା’ ଏକାକୀ ହୋଇଥିବାବେଳେ ସେ ତାଙ୍କ ପାଇଁ ପ୍ରେରଣାଦାୟୀ ଥିଲେ। ଶ୍ୱେତା ଇଭେଣ୍ଟରେ ନିକିତା ମାହିସଲକର୍ଙ୍କ ପ୍ରସ୍ତୁତ ଏକ ସୁନେଲି ରଙ୍ଗର ଗାଉନ ପିନ୍ଧିଥିଲେ।