ନୂଆଦିଲ୍ଲୀ, ୨୩।୮ : ପାକିସ୍ତାନରେ ଭୁଲରେ ବ୍ରହ୍ମୋସ ସୁପରସୋନିକ କ୍ରୁଜ କ୍ଷେପଣାସ୍ତ୍ର ଖସି ପଡିଥିଲା। ଏହି ଘଟଣାର ତଦନ୍ତ ପରେ ତିନିଜଣ ଅଧିକାରୀଙ୍କୁ ଦାୟୀ କରାଯାଇଛି। ଭାରତୀୟ ବାୟୁସେନା ଏହି ସୂଚନା ଦେଇଛି। ବାୟୁସେନା ପକ୍ଷରୁ ସୂଚନା ପ୍ରଦାନ କରାଯାଇଛି ଯେ ତୁରନ୍ତ ସମ୍ପୃକ୍ତ ଅଧିକାରୀଙ୍କୁ ଚାକିରିରୁ ବାହାର କରାଯାଇଛି। ଅଧିକାରୀମାନଙ୍କୁ ମଙ୍ଗଳବାର ଅର୍ଥାତ ୨୩ ଅଗଷ୍ଟରେ ବରଖାସ୍ତ କରିବାକୁ ନିର୍ଦ୍ଦେଶ ଦିଆଯାଇଛି।
ଜଣେ ଭାରତୀୟ ବାୟୁସେନା ଅଧିକାରୀ କହିଛନ୍ତି ଯେ ଏହି ଘଟଣାରେ ସେବାରୁ ବରଖାସ୍ତ ହୋଇଥିବା ଅଧିକାରୀଙ୍କ ମଧ୍ୟରେ ଜଣେ ଗ୍ରୁପ କ୍ୟାପଟେନ, ୱିଙ୍ଗ କମାଣ୍ଡର ଏବଂ ସ୍କ୍ବାଡ୍ରନ ଲିଡର ଅଛନ୍ତି। ତଦନ୍ତରୁ ଜଣାପଡିଥିଲା ଯେ ଅଧିକାରୀମାନେ ଷ୍ଟାଣ୍ଡାର୍ଡ ଅପରେଟିଂ ପ୍ରକ୍ରିୟାରେ ବିଫଳ ହୋଇଥିଲେ। ଯେଉଁଥିପାଇଁ କ୍ଷେପଣାସ୍ତ୍ରଟି ଭୁଲରେ ପାକିସ୍ତାନରେ ଖସି ପଡ଼ିଥିଲା।
ଏହି ଘଟଣା ୯ ମାର୍ଚ୍ଚ ୨୦୨୨ରେ ଘଟିଥିଲା। ବୈଷୟିକ ତ୍ରୁଟି ଯୋଗୁ ହରିୟାଣାର ସିର୍ସା ଠାରୁ ଉତ୍କ୍ଷେପଣ ହୋଇଥିବା କ୍ଷେପଣାସ୍ତ୍ରଟି ସନ୍ଧ୍ୟା ପ୍ରାୟ ୬ଟା ୪୩ ସମୟରେ ସୁରତଗଡ ଦେଇ ପାକିସ୍ତାନ ସୀମା ଭିତରେ ୧୨୪ କିଲୋମିଟର ଦୂରରେ ଖସି ପଡିଥିଲା। ଏହି ଦୁର୍ଘଟଣାରେ କେହି ମୃତାହତ ହୋଇ ନଥିଲେ।
ଏହି ମାମଲାରେ ପାକିସ୍ତାନ ଭାରତକୁ ଦୋଷାରୋପ କରିଥିଲା। ପାକିସ୍ତାନର ଜାତୀୟ ସୁରକ୍ଷା ପରାମର୍ଶଦାତା ମୋଇଦ ୟୁସୁଫ ଏହି ସମ୍ବେଦନଶୀଳ ଘଟଣାର ତଦନ୍ତ ଦାବି କରିଥିଲେ। ଏହି ପ୍ରସଙ୍ଗରେ ପାକିସ୍ତାନ ମଧ୍ୟ ଭାରତକୁ ବିଶ୍ୱବ୍ୟାପୀ ଘେରିବାକୁ ଚେଷ୍ଟା କରିଥିଲା। ପାକିସ୍ତାନର ଅଭିଯୋଗକୁ ନେଇ ଭାରତ ମଧ୍ୟ ଦୁଃଖ ପ୍ରକାଶ କରିଥିଲା।
ପାକିସ୍ତାନ ସରକାର ଭାରତ ସରକାରଙ୍କୁ ସ୍ପଷ୍ଟୀକରଣ ଦେବାକୁ କହିଥିଲେ। ଏହା ପରେ ଭାରତ ସରକାର ଉତ୍ତର ଦେଇଥିଲେ ଯେ ପାକିସ୍ତାନରେ ଭୁଲରେ ଏହି କ୍ଷେପଣାସ୍ତ୍ରଟି ଖସି ପଡ଼ିଥିଲା। ଏଥି ସହ ଭାରତର ପ୍ରତିରକ୍ଷା ମନ୍ତ୍ରଣାଳୟ କହିଥିଲା ଯେ ସରକାର ଏହି ଘଟଣାକୁ ଗୁରୁତର ସହ ନେଇଛନ୍ତି ଏବଂ ତଦନ୍ତ ପାଇଁ କୋର୍ଟ ଅଫ ଇନକ୍ୱାରୀର ନିର୍ଦ୍ଦେଶ ଦେଇଛନ୍ତି।
