ସାରସକଣା,୨।୧୨(ଡି.ଏନ.ଏ.) ମୟୂରଭଞ୍ଜ ଜିଲା ଝାରପୋଖରିଆ ଥାନା ଅଞ୍ଚଳରୁ ନିଖୋଜ ଥିବା ଜଣେ ଯୁବତୀଙ୍କୁ ଭୁବନେଶ୍ୱରର ତମାଣ୍ଡୋସ୍ଥିତ ଏକ ହୋଟେଲରୁ ମଙ୍ଗଳବାର ରାତିରେ ଉଦ୍ଧାର କରାଯାଇଛି। ଏହି ଘଟଣାରେ ପୋଲିସ ସମ୍ପୃକ୍ତ ଯୁବତୀଙ୍କ ପ୍ରେମିକଙ୍କୁ ଅଟକ ରଖିଛି। ଅଟକ ଯୁବକ ଜଣକ ହେଲେ କେନ୍ଦ୍ରାପଡ଼ା ଜିଲା ରାଜକନିକା ଅଞ୍ଚଳର ରୁଦ୍ର ପ୍ରତାପ ବିଶ୍ୱାଳ।
ସୂଚନା ଅନୁଯାୟୀ, ଗତ ୨୩ ତାରିଖ ଅପରାହ୍ନରେ ଯୁବତୀ ଜଣକ ନିଖୋଜ ହୋଇ ଯାଇଥିଲେ। ପରିବାର ବର୍ଗ ବିଭିନ୍ନ ସ୍ଥାନରେ ଖୋଜାଖୋଜି କରି ନ ପାଇବାରୁ ତାଙ୍କୁ କେହି ଅପହରଣ କରିନେଇଥିବା ସନ୍ଦେହ କରି ଥାନାରେ ଏତଲା ଦେଇଥିଲେ। ଯୁବତୀ ଜଣକ ଘରୁ ଗଲା ବେଳେ ୨ ଲକ୍ଷ ଟଙ୍କାର ସୁନା ଗହଣା ନେଇ ଯାଇଥିବା ଏତଲାରେ ଦର୍ଶାଯାଇଥିଲା। ଏହି ନିଖୋଜ ଘଟଣାରେ ସ୍ଥାନୀୟ ଏକ କଲେଜର ଜଣେ ଛାତ୍ର ସମ୍ପୃକ୍ତ ଥିବା ପରିବାର ଲୋକେ ପୋଲିସକୁ ସୂଚନା ଦେଇଥିଲେ। ପୋଲିସ ଏକ ମାମଲା(ନଂ.୨୪୫/୨୧) ରୁଜୁ କରି ସମ୍ପୃକ୍ତ ଛାତ୍ରଙ୍କୁ ଥାନାରେ ଅଟକ ରଖି ପଚରା କରୁଥିଲା। ତେବେ ମୋବାଇଲ ଟ୍ରାକିଂରୁ ଯୁବତୀ ଜଣକ ଭୁବନେଶ୍ୱରର ତମାଣ୍ଡୋ ଅଞ୍ଚଳର ଏକ ହୋଟେଲରେ ଥିବା ଜଣାପଡ଼ିବାରୁ ମଙ୍ଗଳବାର ପୋଲିସ ସେଠାରେ ଚଢ଼ାଉ କରି ସମ୍ପୃକ୍ତ ଯୁବତୀ ଓ ତାଙ୍କ ପ୍ରେମିକ ରୁଦ୍ର ପ୍ରତାପଙ୍କୁ ଠାବ କରିଥିଲା। ଅନ୍ୟପକ୍ଷରେ ନିଖୋଜ ଯୁବତୀଙ୍କ ବିବାହ ସ୍ଥାନୀୟ ଜଣେ ଯୁବକଙ୍କ ସହ ସ୍ଥିର ହୋଇଥିଲା। ଉକ୍ତ ଯୁବକ ଜଣକ ତାଙ୍କ ଭାବି ସ୍ତ୍ରୀଙ୍କୁ ଚାକିରି କରାଇବା ପାଇଁ ସମସ୍ତ ଖଚ୍ଚର୍ର୍ କରି ଭୁବନେଶ୍ୱର ସ୍ଥିତ ଏକ ଶିକ୍ଷାନୁଷ୍ଠାନରେ ନର୍ସିଂ ପାଠ ପଢ଼ାଉଥିଲେ। ପ୍ରାୟ ୩ରୁ ୪ଲକ୍ଷ ଟଙ୍କା ସେ ଯୁବତୀଙ୍କ ପାଠପଢ଼ାରେ ଖର୍ଚ୍ଚ କରି ସାରିଥିଲେ। କିଛି ଦିନ ପୂର୍ବେ ଉଭୟଙ୍କ ପରିବାର ମଧ୍ୟରେ ଆଲୋଚନା ପରେ ବିବାହ ତାରିଖ ଠିକ୍ ହେବା ସହ ନିର୍ବନ୍ଧ କାର୍ଯ୍ୟ ସମ୍ପାଦନ ହୋଇଥିଲା। ତେବେ ଅପହର୍ତ୍ତା ସନ୍ଦେହରେ ଜଣେ କଲେଜ ଛାତ୍ରଙ୍କୁ ପୋଲିସ ଧରି ଆଣି ଅଟକ ରଖିଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
