ନୂଆଦିଲ୍ଲୀ,୨୭।୬ : ମିଶନ ୨୦୨୪ ଅନ୍ତର୍ଗତ ଭାରତୀୟ ଜନତା ପାର୍ଟି (ଭାଜପା) ଏବଂ କଂଗ୍ରେସ ମଧ୍ୟରେ ଅନଲାଇନ ଲଢ଼େଇ ଜୋରଦାର ହେବାରେ ଲାଗିଛି। ଭାଜପାକୁ ସମାଲୋଚନା କରି କଂଗ୍ରେସ ମଙ୍ଗଳବାର ଏକ ଆନିମେଟେଡ ଭିଡିଓ ଜାରି କରି ରାହୁଲ ଗାନ୍ଧୀ “ଶାସକ ଦଳର ଘୃଣା ବଜାର” କୁ “ପ୍ରେମ ଦୋକାନ” ରେ ବଦଳାଇଥିବାର ଦେଖାଯାଇଛି।
ଭିଡିଓରେ ରାହୁଲ ଗାନ୍ଧୀଙ୍କୁ ଦେଶବ୍ୟାପୀ ଭାରତ ଯୋଡୋ ଯାତ୍ରା ମାଧ୍ୟମରେ ଏକୀକରଣକାରୀ କାରକ ଭାବରେ ଚିତ୍ରଣ କରାଯାଇଛି। ଭାଜପା ଏକ କ୍ଷୁଦ୍ର ଆନିମେଟେଡ ଭିଡିଓ ପ୍ରକାଶ କରିବାର ମାସେ ପରେ କଂଗ୍ରେସର ଏହି ଭିଡିଓ ଆସିଛି। ଭାଜପା ଏହାର ଆନିମେଟେଡ ଭିଡିଓରେ ଦର୍ଶାଇଥିଲା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମାଜର ବିଭିନ୍ନ ବର୍ଗର ସେବା କରିବା ଏବଂ ଭାରତକୁ ପାଞ୍ଚ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବା ଦିଗରେ ଆଗେଇ ନେବାର କାର୍ଯ୍ୟ କରୁଛନ୍ତି।
ସୋସିଆଲ ମିଡିଆର ଅଫିସିଆଲ ହ୍ୟାଣ୍ଡେଲରୁ ’ମୋହବତ କି ଦୁକାନ’ ଶୀର୍ଷକ ଏହି ଭିଡିଓ କଂଗ୍ରେସ ପ୍ରକାଶ କରିଛି। ଏହା ପରେ ବିଭିନ୍ନ ଦଳର ନେତାମାନେ ଶେୟାର କରିଥିଲେ। ଏକ ମିନିଟ ୪୩ ସେକେଣ୍ଡର ଏହି ଭିଡିଓରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଅଛନ୍ତି। ଏଥିରେ ମୁଖ୍ୟ ବିରୋଧୀ ଦଳ କଂଗ୍ରେସ ଦାବି କରିଛି ଶାସକ ଦଳ ସମାଜରେ ମତଭେଦ ସୃଷ୍ଟି କରୁଛି ଏବଂ ଲୋକଙ୍କୁ ବିଭାଜନ କରୁଛି।
ଭିଡିଓରେ ପ୍ରଧାନମନ୍ତ୍ରୀ ମୋଦିଙ୍କ ଏକ ଆନିମେଟେଡ ଚରିତ୍ର ଗଣତନ୍ତ୍ର, ଗଣମାଧ୍ୟମ ଏବଂ ଅମଲାତନ୍ତ୍ର ସହିତ ଏକ ରଥ ଚଳାଉଥିବାର ନଜର ଆସିଛନ୍ତି। ଏହି ଭିଡିଓରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କର ଏକ ଆନିମେଟେଡ ଚରିତ୍ର ଦେଖାଯାଇଛି । ସେ ଜଣେ ହିନ୍ଦୁ ଏବଂ ମୁସଲମାନ ବ୍ୟକ୍ତିଙ୍କ ମଧ୍ୟରେ ମତଭେଦ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ଏହି ସମୟରେ ରାହୁଲ ଗାନ୍ଧୀ ପ୍ରବେଶ କରି ଉଭୟ ସମ୍ପ୍ରଦାୟର ଲୋକଙ୍କୁ ଏକଜୁଟ କରୁଥିବାର ଦେଖିବାକୁ ମିଳୁଛି। ଗାନ୍ଧୀ ଭାରତ ଯୋଡୋ ଯାତ୍ରା ମାଧ୍ୟମରେ ଲୋକଙ୍କୁ ଏକଜୁଟ କରି ଆଗକୁ ବଢ଼଼ିବା ସହିତ ରାଜ କପୁରଙ୍କ ଅଭିନୀତ ‘ଅନାଡି’ ଚଳଚ୍ଚିତ୍ରର ଗୀତ ‘କିସି କି ମୁସ୍କରାହଟୋଁ ପେ ହୋ ନିସାର’ର ମ୍ୟୁଜିକ ତାଳେତାଳେ ‘ସଭ ିକେ ୱାସ୍ତେ ହୋ ଜିସେ ଦିଲ ମେନ ପ୍ୟାର, ଗାନ୍ଧୀ ଉସି କା ନାମ ହୈ’।
କଂଗ୍ରେସ ଏହି ଭିଡିଓ ମାଧ୍ୟମରେ ଦର୍ଶାଇଛି ରାହୁଲ ଗାନ୍ଧୀ ଭାଜପା ଲଗାଇଥିବା ’ଘୃଣାର ବଜାର’ ହଟାଇ ଏକ ’ପ୍ରେମ ଦୋକାନ’ ଖୋଲୁଛନ୍ତି।