ନୂଆଦିଲ୍ଲୀ, ୨୬।୫ : ଆଗାମୀ ୨୦୨୪ ଲୋକସଭା ନିର୍ବାଚନ ପାର୍ଇ ଭାଜପା ପକ୍ଷରୁ ୧୪୪ ଫର୍ମୂଲା ପ୍ରସ୍ତୁତ କରାଯାଇଛି। ଦେଶରେ ୧୪୪ ଲୋକ ସଭା ଆସନ ଯେଉଁଠାରେ ୨୦୧୯ ଲୋକ ସଭା ନିର୍ବାଚନରେ ଭାଜପା ପରାଜିତ ହୋଇଥିଲା ସେଠାରେ ନିଜର ଉପସ୍ଥିତିକୁ ମଜବୁତ କରିବା ଲାଗି ସ୍ବତନ୍ତ୍ର ପ୍ଳାନ୍ ପ୍ରସ୍ତୁତ କରାଯାଇଛି। ସଂଗଠନର ସାଧାରଣ ସମ୍ପାଦକ ବି.ଏଲ ସନ୍ତୋଷ ଏହି ଯୋଜନା ଉପରେ ଏକ ଉପସ୍ଥାପନା କରିଛନ୍ତି। ଯେଉଁଥିରେ କେନ୍ଦ୍ର ମନ୍ତ୍ରୀମାନଙ୍କ ପାଇଁ ଏକ ଜନସମ୍ପର୍କ ଅଭିଯାନ ଅନ୍ତର୍ଭୁକ୍ତ କରାଯାଇଛି।
ପ୍ରଥମ ପର୍ଯ୍ୟାୟରେ ଦଳ ଏହି ୧୪୪ ଲୋକସଭା ଆସନ ଏବଂ ସେମାନଙ୍କ ଅଧୀନରେ ଥିବା ବିଧାନସଭା ଆସନ ବିଷୟରେ ସମ୍ପୂର୍ଣ୍ଣ ତଥ୍ୟ ସଂଗ୍ରହ କରିବ। ଭାଜପା ଅନୁଯାୟୀ ଦଳ ଏହି ଆସନଗୁଡ଼ିକରେ ବୁଥକୁ ମଜବୁତ କରିବ। ଆସନ୍ତା ୧୮ ମାସ ମଧ୍ୟରେ ଏହି ଆସନରେ କାମ କରିବାକୁ ଭାଜପା ତିନି ସ୍ତରର ନେତାଙ୍କୁ ନିୟୋଜିତ କରିବ। ପ୍ରଥମେ ଜାତୀୟ ନେତୃବୃନ୍ଦଙ୍କୁ ନେଇ ଏକ କେନ୍ଦ୍ରୀୟ କମିଟି ଗଠନ ହେବ ଯେଉଁମାନେ ସମଗ୍ର କାର୍ଯ୍ୟକ୍ରମର ତଦାରଖ କରିବେ।
ଦ୍ୱିତୀୟରେ, ରାଜ୍ୟ କମିଟି ଯୋଜନାଗୁଡ଼ିକୁ ତୃଣମୂଳସ୍ତରରେ କାର୍ଯ୍ୟକାରୀ କରିବ। ତୃତୀୟରେ କେନ୍ଦ୍ର ମନ୍ତ୍ରୀମାନଙ୍କ ସହିତ ଏକ କ୍ଲଷ୍ଟର କମିଟି କାର୍ଯ୍ୟକଳାପର ତଦାରଖ କରି କେନ୍ଦ୍ରୀୟ ଏବଂ ରାଜ୍ୟ କମିଟି ମଧ୍ୟରେ ସମନ୍ବୟ ରକ୍ଷା କରିବାରେ ସିଧାସଳଖ ଜଡିତ ହେବ। ଏହି କାର୍ଯ୍ୟକ୍ରମ ଅଧୀନରେ ଦଳର ସାଂଗଠନିକ ଦାୟିତ୍ୱରେ ଥିବା ପ୍ରଭାରୀ ପ୍ରତି ୧୫ ଦିନରେ ପ୍ରତ୍ୟେକ ଲୋକସଭା ଆସନରେ ଗୋଟିଏ ରାତି ବିତାଇବେ। ପ୍ରତ୍ୟେକ ଲୋକସଭାର ଦାୟିତ୍ୱରେ ଥିବା ପ୍ରଭାରୀ ପ୍ରଥମ ଦୁଇ ମାସରେ ଲୋକସଭା ଆସନ ଅନ୍ତର୍ଗତ ପ୍ରତି ବିଧାନସଭା ନିର୍ବାଚନମଣ୍ଡଳୀରେ ଗୋଟିଏ ରାତି ବିତାଇବେ। ଜାତି, ଦଳର ସପକ୍ଷରେ ତଥା ବିରୋଧର ଭିତ୍ତିରେ ତଥ୍ୟ ପ୍ରସ୍ତୁତ କରିବା ଲୋକ ସଭା ଟିମ୍ର ଦାୟିତ୍ୱ ହେବ। ଦୁର୍ବଳ ବିଧାନସଭା ନିର୍ବାଚନମଣ୍ଡଳୀ, ନିର୍ବାଚନ ପୂର୍ବାନୁମାନ ଏବଂ ଜାତି ସମୀକରଣକୁ ଆଧାର କରି ଏକ ଡୋଜିିୟର ପ୍ରସ୍ତୁତ କରାଯିବ। ଏହି ୧୪୪ଟି ଆସନ ପାଇଁ ଦଳର ପ୍ରାର୍ଥୀଙ୍କ ଉପରେ ମଧ୍ୟ ନଜର ରଖାଯିବ। ବିରୋଧୀ ଶାସିତ ରାଜ୍ୟଗୁଡ଼ିକର ନିର୍ବାଚନମଣ୍ଡଳୀରେ ଦଳ ପ୍ରତି ମାସରେ ଅଭିଯାନ ଯୋଜନା ପ୍ରସ୍ତୁତ କରିଛି।
ପ୍ରତ୍ୟେକ ଲୋକସଭା ଆସନ ପାଇଁ ସ୍ବତନ୍ତ୍ର ମିଡ଼ିଆ ପ୍ରଭାରୀ ନିଯୁକ୍ତ ହେବେ। ଭାଜପା ବିରୋଧରେ ଥିବା ସ୍ଥାନୀୟ ମିଡିଆ ହାଉସକୁ ମନାଇବା ପାଇଁ ସେ କାର୍ଯ୍ୟ କରିବେ। ଚଳିତ ବର୍ଷ ଡିସେମ୍ବର ସୁଦ୍ଧା ସୋସିଆଲ ମିଡିଆ ଦଳକୁ ଏହି ୧୪୪ ଟି ଲୋକସଭା ଆସନରେ ପ୍ରତିଟିରେ ଅତି କମରେ ୫୦ ହଜାର ଫଲୋୟର୍ସ ବୃଦ୍ଧି କରିବାର ଲକ୍ଷ୍ୟ ଦିଆଯିବ। ବିଭିନ୍ନ ସ୍ତରରେ ଯୁବକ, ହିତାଧିକାରୀ, ମହିଳା, ସଶସ୍ତ୍ର ବାହିନୀର ଲୋକ ଏବଂ କେନ୍ଦ୍ର ମନ୍ତ୍ରୀଙ୍କୁ ଟାର୍ଗେଟ କରି ବିଭିନ୍ନ ସ୍ତରରେ ଜନସମ୍ପର୍କ କାର୍ଯ୍ୟକ୍ରମ ଆରମ୍ଭ ହେବ। ସରକାରୀ କାର୍ଯ୍ୟକ୍ରମର ହିତାଧିକାରୀଙ୍କ ସହ ସେଲଫି ଅପଲୋଡ କରିବାକୁ କେନ୍ଦ୍ର ମନ୍ତ୍ରୀମାନଙ୍କୁ ମଧ୍ୟ କୁହାଯାଇଛି। ଏହି ବିସ୍ତୃତ କାର୍ଯ୍ୟକ୍ରମ ଉପରେ କାର୍ଯ୍ୟ ଜୁନ ଠାରୁ ଆରମ୍ଭ ହେବ ଏବଂ ପ୍ରଥମ ପର୍ଯ୍ୟାୟ ସମାପ୍ତ ହେବା ପରେ ମୂଲ୍ୟାଙ୍କନ କରାଯିବ। ସେହି ଅନୁଯାୟୀ, ପରବର୍ତ୍ତୀ ପର୍ଯ୍ୟାୟ ନେଇ ଯୋଜନା ପ୍ରସ୍ତୁତ କରାଯିବ।