ଲାଠୋର,୯ା୧୧(ଭୁବନେଶ୍ୱର ବାରିକ): ବଲାଙ୍ଗୀର ଜିଲା ଖପ୍ରାଖୋଲ ବ୍ଳକରୁ ପ୍ରତିବର୍ଷ ହଜାର ହଜାର ଶ୍ରମିକ ରାଜ୍ୟ ବାହାରକୁ ଦାଦନ ଖଟିବାକୁ ଯାଇଥାନ୍ତି। ଅନେକ ସେଠାରେ ନିର୍ଯାତନାର ଶିକାର ହୋଇଥାନ୍ତି। ଏପରିକି କେତେକ ଅକର୍ମଣ୍ୟ ଅଥବା ଜୀବନ ହରାଇଥାନ୍ତି। ଏମ୍ଜିଏନ୍ଆର୍ଇଜିଏସ୍ ଓ ଅନ୍ୟାନ୍ୟ କର୍ମଭିତ୍ତିକ ନିଯୁକ୍ତି ଯୋଜନାରେ ଭିଟାମାଟିରେ କର୍ମ ଯୋଗାଇ ଦେବାକୁ ସରକାର ଉଦ୍ୟମ କରୁଛନ୍ତି। ହେଲେ ଏହା ପର୍ଯ୍ୟାପ୍ତ ହେଉ ନ ଥିବାରୁ ଏବେ ବି ବହୁ ସଂଖ୍ୟାରେ ଶ୍ରମିକ ଦାଦନ ଖଟିବାକୁ ଯାଉଛନ୍ତି। ଅପରପକ୍ଷରେ ଦାଦନ ଶ୍ରମିକମାନେ କିପରି ସୁରକ୍ଷିତଭାବେ ବାହାର ରାଜ୍ୟକୁ କାମ କରିବାକୁ ଯିବେ ତାକୁ ଆଖି ଆଗରେ ରଖି ଜିଲା ପ୍ରଶାସନ,ପୋଲିସ ପ୍ରଶାସନ ଏବଂ ଆଡ଼ ଏଟ ଆକ୍ସନ ସଂସ୍ଥା ମିଳିତ ଭାବେ ସଚେତନତା କାର୍ଯ୍ୟକ୍ରମ କରୁଛନ୍ତି। ଗତ ଅକ୍ଟୋବର ୧୦ତାରିଖରେ ଲାଠୋର ରାଧାକୃଷ୍ଣ ମନ୍ଦିର ପ୍ରାଙ୍ଗଣରେ ମିଶନ ଉଦ୍ଧାର-୨ ସଚେତନତା କାର୍ଯ୍ୟକ୍ରମ ସଂସ୍ଥାର ପ୍ରୋଗ୍ରାମ ଅଫିସର ସରୋଜ କୁମାର ବାରିକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ଜିଲାପାଳ ଚଞ୍ଚଳ ରାଣା, ଏସ୍ପି ଋଷିକେଷ ଖିଲାରି, ପାଟଣାଗଡ଼ ଉପଜିଲାପାଳ ଡ଼. ବୀଜୟାନନ୍ଦ ସେଠୀ, ଏସ୍ଡ଼ିପିଓ ଜ୍ୟୋତିର୍ମୟ ଭୁକ୍ତା, ଜିଲା ଶ୍ରମ ଅଧିକାରୀ ସୁକାନ୍ତ କୁମାର ସେଠୀ ଉପସ୍ଥିତ ଥିଲେ। ପ୍ରଶାସନର ନଜରରେ କାମ କରିବାକୁ ଯିବାକୁ ଜିଲାପାଳ ଅନୁରୋଧ କରିଥିଲେ। କୌଣସି ସର୍ଦ୍ଦାର ବେଆଇନ ଭାବେ ନାବାଳକ, ଗର୍ଭବତୀ ମହିଳା ଏବଂ ବୟସ୍କ ଲୋକଙ୍କୁ ବାହାର ରାଜ୍ୟକୁ ନେଉଥବା ନେଇ ସ୍ଥାନୀୟ ପିଆରଆଇ ମେମ୍ବର, ଅଙ୍ଗନୱାଡ଼ି କର୍ମୀ, ଆଶାକର୍ମୀ ଓ ସ୍ଥାନୀୟ ଥାନାକୁ ଖବର ଦେଲେ ଶ୍ରମିକମାନଙ୍କୁ ଏଠାରେ କାମ ଯୋଗାଇ ଦିଆଯିବ ବୋଲି କୁହାଯାଇଥିଲା। ହେଲେ ଏଠାରେ ଆରମ୍ଭରୁ ଶିଶୁମାନେ ସେମାନଙ୍କ ପରିବାର ବର୍ଗ ସହ ବାହାର ରାଜ୍ୟକୁ ଯାଉଥିବା ଦେଖାଯାଉଛି। ହରିଶଙ୍କର ରୋଡ଼ ରେଳ ଷ୍ଟେଶନରୁ ହଜରତ ନିଜାମୁଦ୍ଦିନ-ବିଶାଖାପାଟଣା ସମତା ଏକ୍ସପ୍ରେସ ଏବଂ ବିଳାସପୁର-ତିରୁପତି ଏକ୍ସପ୍ରେସ ଆଦି ଟ୍ରେନରେ ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି। ଏନେଇ ଜିଲା ଶ୍ରମ ଅଧିକାରୀ ସୁକାନ୍ତ କୁମାର ସେଠୀଙ୍କୁ ତାଙ୍କ ମୋବାଇଲ ନଂ ୮୩୨୮୯୨୨୯୨୭ରେ ଯୋଗାଯୋଗ କରାଯାଇଥିଲା। ରିଙ୍ଗ ହୋଇଥିଲେ ବି ସେ ରିସିଭ ନ କରିବାରୁ ତାଙ୍କ ପ୍ରତିକ୍ରିୟା ମିଳିପାରି ନାହିଁ।