ନୂଆଦିଲ୍ଲୀ,୫।୩ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ସମେତ ନଅ ବିରୋଧୀ ଦଳର ନେତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ୍ସାଇଜ ପଲିସି ପ୍ରସଙ୍ଗରେ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ଗିରଫ କରିବା ନେଇ ଏକ ଚିଠି ଲେଖିଛନ୍ତି। ଚିଠିରେ କୁହାଯାଇଛି ଯେ ଆପଣ ଏକମତ ହେବେ ଯେ ଭାରତ ଏକ ଗଣତାନ୍ତ୍ରିକ ଦେଶ। ବିରୋଧୀ ଦଳର ନେତାଙ୍କ ବିରୋଧରେ କେନ୍ଦ୍ରୀୟ ଏଜେନ୍ସିଗୁଡିକର ଯେପରି ଅପବ୍ୟବହାର କରାଯାଉଛି, ଲାଗୁଛି ଯେ ଆମେ ଗଣତନ୍ତ୍ରରୁ ଏକଛତ୍ରବାଦୀ ଶାସନକୁ ଆଡକୁ ଯାଉଛୁ।
ଏହି ଚିଠି ଲେଖିଥିବା ବିରୋଧୀଦଳ ନେତାଙ୍କ ମଧ୍ୟରେ ଅରବିନ୍ଦ କେଜରିୱାଲ (ଏଏପି), କେ.ଚନ୍ଦ୍ରଶେଖର ରାଓ (ବିଆରଏସ), ମମତା ବାନାର୍ଜୀ (ତୃଣମୂଳ କଂଗ୍ରେସ), ଭଗଓ୍ବନ୍ତ ସିଂ ମାନ (ଏଏପି), ତେଜସ୍ବୀ ଯାଦବ (ଆରଜେଡି), ଫାରୁକ ଅବଦୁଲ୍ଲା (ଜେ.କେ.ଏନ.ସି), ଶରଦ ପାୱାର (ଏନସିପି), ଉଦ୍ଧବ ଠାକରେ (ଶିବସେନା, ୟୁ.ବି.ଟି.) ପ୍ରମୁଖ ରହିଛନ୍ତି।
ଚିଠିରେ କୁହାଯାଇଛି ଯେ ମନୀଷ ସିସୋଡିଆଙ୍କୁ ୨୬ ଫେବୃଆରୀ ୨୦୨୩ରେ ଦିଲ୍ଲୀରେ ଗିରଫ କରାଯାଇଥିଲା। ଦୀର୍ଘ ଚଢ଼ାଉ ପରେ ଏବଂ କୌଣସି ପ୍ରମାଣ ବିନା ଗିରଫ କରାଯାଇଥିଲା। ସିସୋଡିଆଙ୍କ ବିରୋଧରେ ଦିଆଯାଇଥିବା ସମସ୍ତ ଅଭିଯୋଗ ଭିତ୍ତିହୀନ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ। ଏହି କାର୍ଯ୍ୟ ସମଗ୍ର ଦେଶର ଲୋକଙ୍କୁ କ୍ରୋଧିତ କରିଛି। ବିଦ୍ୟାଳୟ ଶିକ୍ଷା କ୍ଷେତ୍ରରେ ବଡ଼ ପରିବର୍ତ୍ତନ ଆଣିବା ପାଇଁ ମନୀଷ ସିସୋଡିଆ ଜଣାଶୁଣା। ଏଭଳି ପରିସ୍ଥିତିରେ ସିସୋଡିଆଙ୍କ ଗିରଫଦାରୀ ବିଶ୍ୱ ସାମ୍ନାରେ ରାଜନୈତିକ ଷଡଯନ୍ତ୍ରର ଏକ ଉଦାହରଣ ଦେଉଛି। ଏହା ମଧ୍ୟ ଏହି ପ୍ରସଙ୍ଗକୁ ଆହୁରି ଦୃଢ଼ କରୁଛି ଯେ ଭାରତରେ ଗଣତାନ୍ତ୍ରିକ ମୂଲ୍ୟବୋଧ ଭାଜପା ଶାସନରେ ବିପଦରେ ରହିଛି।
ଚିଠିରେ କୁହାଯାଇଛି ଯେ ୨୦୧୪ରେ ଭାଜପା କେନ୍ଦ୍ରରେ କ୍ଷମତାକୁ ଆସିବା ପରଠାରୁ ଯେଉଁ ନେତାଙ୍କ ବିରୋଧରେ ମାମଲା ରୁଜୁ ହୋଇଛି, ପଚରାଉଚରା କରାଯାଇଛି, ଗିରଫ କରାଯାଇଛି କିମ୍ବା ସେମାନଙ୍କ ବାସଭବନରେ କିମ୍ବା କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥା ଦ୍ୱାରା ଚଢ଼ାଉ କରାଯାଇଛି, ସେମାନେ ପ୍ରାୟତଃ ବିରୋଧୀ ଦଳର ଅଟନ୍ତି। କୌତୁହଳର ବିଷୟ, ବର୍ତ୍ତମାନ ଭାଜପାରେ ଯୋଗ ଦେଇଥିବା ସେହି ନେତାଙ୍କ ବିରୋଧରେ ଅନୁସନ୍ଧାନର ଗତି ମନ୍ଥର ହୋଇଯାଇଛି।
କୁହାଯାଇଛି ଯେ ପୂର୍ବତନ କଂଗ୍ରେସ ନେତା ତଥା ବର୍ତ୍ତମାନ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା(ଭାଜପା)ଙ୍କ ବିରୋଧରେ ସାରଦା ଚିଟ ପାଣ୍ଠି ମାମଲାରେ ୨୦୧୪ ଏବଂ ୨୦୧୫ ରେ ଇଡି ଏବଂ ସିବିଆଇ ଦ୍ୱାରା ଯାଞ୍ଚ କରାଯାଇଥିଲା। ତେବେ ସେ ଭାଜପାରେ ଯୋଗଦେବା ପରେ ତଦନ୍ତ ବନ୍ଦ ହୋଇଯାଇଥିଲା। ଏହି ଚିଠିରେ ତୃଣମୂଳ କଂଗ୍ରେସର ପୂର୍ବତନ ନେତା ଶୁଭେନ୍ଦୁ ଅଧିକାରୀ ଏବଂ ମୁକୁଲ ରାୟଙ୍କ ବିଷୟରେ ମଧ୍ୟ ଉଲ୍ଲେଖ କରାଯାଇଛି। ଚିଠିରେ କୁହାଯାଇଛି ଯେ ମହାରାଷ୍ଟ୍ରର ନାରାୟଣ ରାଣେଙ୍କ ସମେତ ଅନେକ ନେତାଙ୍କ ନାମ ମଧ୍ୟ ସମାନ ଉଦାହରଣ ଦେଇଥାଏ।
ଚିଠିରେ ସେହି ବିରୋଧୀ ଦଳର ନେତାଙ୍କ ବିଷୟରେ ମଧ୍ୟ ଉଲ୍ଲେଖ କରାଯାଇଛି, ଯେଉଁମାନେ ବର୍ତ୍ତମାନ କେନ୍ଦ୍ରୀୟ ଏଜେନ୍ସିର ଅନୁସନ୍ଧାନର ସମ୍ମୁଖୀନ ହେଉଛନ୍ତି। ସେଥିମଧ୍ୟରେ ଲାଲୁ ପ୍ରସାଦ ଯାଦବ (ଆରଜେଡି), ସଞ୍ଜୟ ରାଉତ (ଶିବସେନା ଉଦ୍ଧବ ଦଳ), ଆଜମ ଖାନ (ଏସପି), ନବାବ ମଲିକ, ଅନିଲ ଦେଶମୁଖ (ଏନସିପି) ଏବଂ ଅଭିଷେକ ବାନାର୍ଜୀ (ତୃଣମୂଳ କଂଗ୍ରେସ)ଙ୍କ ନାମ ରହିଛି। ଏହି ଚିଠିରେ ତାମିଲନାଡୁ, ମହାରାଷ୍ଟ୍ର, ପଞ୍ଜାବ ଏବଂ ଦିଲ୍ଲୀ ଭଳି ରାଜ୍ୟରେ ରାଜ୍ୟପାଳ ଏବଂ ସରକାରଙ୍କ ମଧ୍ୟରେ ତିକ୍ତତା ବିଷୟରେ ଉଲ୍ଲେଖ କରାଯାଇଛି।
ଚିଠିରେ କୁହାଯାଇଛି ଯେ ବିରୋଧୀ ଦଳ ଦ୍ୱାରା ଶାସିତ ରାଜ୍ୟଗୁଡ଼ିକରେ ସରକାରଙ୍କ କାର୍ଯ୍ୟରେ ରାଜ୍ୟପାଳଙ୍କ ହସ୍ତକ୍ଷେପ ବୃଦ୍ଧି ପାଉଛି, ଯେଉଁଥିପାଇଁ କେନ୍ଦ୍ର ଓ ରାଜ୍ୟ ମଧ୍ୟରେ ଦୂରତା ବଢ଼ିବାରେ ଲାଗିଛି। କେତେକ ରାଜ୍ୟରେ ରାଜ୍ୟପାଳମାନେ ଜାଣିଶୁଣି ସାମ୍ବିଧାନିକ ନିୟମ ଉଲ୍ଲଂଘନ କରୁଛନ୍ତି, ଯାହା ଗଣତନ୍ତ୍ର ପାଇଁ ଭଲ ନୁହେଁ। ଚିଠି ମାଧ୍ୟମରେ ନେତାମାନେ କେନ୍ଦ୍ରୀୟ ଏଜେନ୍ସିଗୁଡ଼ିକର ଅପମାନଜନକ ଭାବମୂର୍ତ୍ତି ଉପରେ ଗଭୀର ଚିନ୍ତା ପ୍ରକଟ କରି ସେମାନଙ୍କ ସ୍ବାଧୀନତା ଏବଂ ନିରପେକ୍ଷତା ଉପରେ ପ୍ରଶ୍ନ ଉଠାଇଛନ୍ତି।