ସିଡନୀ,୨୧।୯: ଭାରତୀୟ ମହିଳା ଦଳର ଅଧିନାୟକ ମିଥାଲି ରାଜ ଅଷ୍ଟ୍ରେଲିଆ ବିପକ୍ଷ ପ୍ରଥମ ଦିନିକିଆରେ ଚମତ୍କାର ପ୍ରଦର୍ଶନ କରି ତାଙ୍କ କ୍ୟାରିୟରରେ ୨୦ ହଜାର ରନ ପୂରଣ କରିଛନ୍ତି। ମିଥାଲି ପ୍ରଥମ ଶ୍ରେଣୀ କ୍ରିକେଟ, ତାଲିକା ଏ ଏବଂ ଟି -୨୦ରେ ୨୦ ହଜାର ରନ ପୂରଣ କରିଥିଲେ। ଏହା ସହ ସେ ଏହି ମ୍ୟାଚରେ କ୍ରମାଗତ ପଞ୍ଚମ ଦିନିକିଆ ଅର୍ଦ୍ଧଶତକ ହାସଲ କରିଥିଲେ। ପ୍ରଥମେ ବ୍ୟାଟିଂ କରିବାକୁ ଆସିଥିବା ଟିମ ଇଣ୍ଡିଆ ନିର୍ଦ୍ଧାରିତ ଓଭରରେ ୮ ଉଇକେଟ ହରାଇ ୨୨୫ ରନ ସଂଗ୍ରହ କରିଥିଲା।
ଅଧିନାୟକ ମିଥାଲି ୧୦୭ ବଲରେ ୬୧ ରନର ଚମତ୍କାର ଇନିଂସ ଖେଳିଥିଲେ। ଦିନିକିଆ କ୍ରିକେଟ ରେ ଏହା ତାଙ୍କର କ୍ରମାଗତ ପଞ୍ଚମ ଏବଂ ୫୯ ତମ ଅର୍ଦ୍ଧଶତକ। ଶେଷ ୪ ଟି ମ୍ୟାଚରେ ସେ ଦକ୍ଷିଣ ଆଫ୍ରିକା ବିପକ୍ଷରେ ୭୯ ରନ କରିଥିଲେ ଏବଂ ପରେ ଇଂଲଣ୍ଡ ବିପକ୍ଷରେ ୩ଟି ଦିନିକିଆରେ ଯଥାକ୍ରମେ ୭୨, ୫୯ ଏବଂ ୭୫ ରନ କରିନଥିଲେ। ଏହା ଥିଲା ମିଥାଲିଙ୍କ ୨୧୮ ତମ ଦିନିକିଆ ମ୍ୟାଚ୍।
୧୯୯୯ରେ ଭାରତ ପାଇଁ ଡେବ୍ୟୁ କରିଥିବା ମିଥାଲି ରାଜଙ୍କ ଏହି ଯାତ୍ରା ଏବେ ମଧ୍ୟ ଜାରି ରହିଛି। ମ୍ୟାଚର ଗୋଟିଏ ସମୟରେ ଭାରତୀୟ ଦଳ ସଂଘର୍ଷ କରୁଥିବା ପରି ମନେ ହେଉଥିଲା ଏବଂ ୨୦୦ ରନରେ ପହଞ୍ଚିବା ମଧ୍ୟ କଷ୍ଟସାଧ୍ୟ ଦେଖାଯାଉଥିଲା, କିନ୍ତୁ ମିଥାଲିଙ୍କ ବ୍ୟତୀତ ରିଚା ଘୋଷଙ୍କ କିଛି ଶକ୍ତିଶାଳୀ ସଟ ଯୋଗୁ ଦଳ ଅଷ୍ଟ୍ରେଲିଆ ସମ୍ମୁଖରେ ଏକ ସମ୍ମାନଜନକ ସ୍କୋର ସ୍ଥାପନ କରିବାରେ ସକ୍ଷମ ହୋଇଥିଲା। ଘୋଷ ୨୯ ବଲରୁ ଅପରାଜିତ ୩୨ ଖେଳିଥିଲେ। ଝୁଲନ ଗୋସ୍ବାମୀ ମଧ୍ୟ ବ୍ୟାଟିଂରେ ଭଲ ସହଯୋଗ କରିଥିଲେ। ସେ ୨୪ ବଲରେ ୨୦ ରନ ସଂଗ୍ରହ କରିଥିଲେ। ଏମାନଙ୍କ ବ୍ୟତୀତ ୟସ୍ତିକା ଭାଟିଆ ୫୧ ବଲରେ ୩୫ ରନ ସଂଗ୍ରହ କରିଥିଲେ। ଓପନର୍ ସ୍ମୃତି ମନ୍ଧାନା କେବଳ ୧୬ ରନ କରିଥିେଲେ।
