ହାମିଲଟନ,୧୨।୩: ଓ୍ବେଷ୍ଟଇଣ୍ଡିଜ ବିପକ୍ଷରେ ଦମ୍ଦାର ପ୍ରଦର୍ଶନକୁ ଯୋଗୁ ଆଇସିସି ମହିଳା ବିଶ୍ୱକପ୍ର ଦ୍ୱିତୀୟ ମୁକାବିଲାରେ ବିଜେତା ହୋଇଛି ଭାରତ। ନିର୍ଧାରିତ ୫୦ ଓଭରରେ ୮ ଉଇକେଟ ହରାଇ ୩୧୭ ରନ୍ କରିଥିଲା ଦଳ। ଜବାବରେ ଓ୍ବେଷ୍ଟଇଣ୍ଡିଜ ୧୬୨ ରନ୍ରେ ଅଲଆଉଟ୍ ହୋଇଯାଇଥିଲା। ଏହି ବିଜୟ ସହ ଟୁର୍ନାମେଣ୍ଟ ଅଙ୍କ ତାଲିକାର ଶୀର୍ଷସ୍ଥାନରେ ପହଞ୍ଚିଛି ଭାରତ।
ମ୍ୟାଚ୍ ପରେ ଭାରତୀୟ ଅଧିନାୟକ ମିଥାଲି ରାଜ ଦଳର ଖେଳାଳିଙ୍କ ପ୍ରଶଂସା କରି କହିଛନ୍ତି, ଆଜିର ପ୍ରଦର୍ଶନ ପ୍ରଶଂସନୀୟ ଥିଲା। ଏହି ବିଜୟ ଯୋଗୁ ଆମେ ନକ୍ଆଉଟ୍ ଲାଗି ଟୁର୍ନାମେଣ୍ଟରେ ସ୍ଥାନ ପାଇଛୁ। ମ୍ୟାଚ୍ରେ ଉଭୟ ବ୍ୟାଟିଂ ଏବଂ ବୋଲିଂ ଭଲ ଥିଲା। ଏହାର ପ୍ରଭାବ ଆଗାମୀ ପ୍ରଦର୍ଶନ ଉପରେ ପଡ଼ିବ। କାରଣ ଏହା ସ୍ବତନ୍ତ୍ର ମ୍ୟାଚ୍ ଥିଲା। ଓ୍ବେଷ୍ଟଇଣ୍ଡିଜ ଦଳ ଦୁଇଟି ମୁକାବିଲା ଜିତି ଏହି ମ୍ୟାଚ୍ ଖେଳୁଥିଲା। ଏଣୁ ବିଜୟ ନଚେତ ପରାଜୟ କିଛି ବି ହୋଇପାରିଥାନ୍ତା। ସ୍ମୃତି ଏବଂ ହରମନ ବହୁତ ସହଜ ଭାବେ ଖେଳି ସ୍କୋରକୁ ଆଗକୁ ବଢ଼ାଇଥିଲେ। କହିବାକୁ ଗଲେ ଯୁବ ଖେଳାଳି ଆଖ ପାଖରେ ରହିବା ଭଲ। ସେ ଏବଂ ଝୁଲଣ ଦୀର୍ଘଦିନରୁ ଖେଳୁଛନ୍ତି। ଚାପ ବଢ଼ିବା ବେଳେ ଯୁବ ଖେଳାଳିମାନଙ୍କ ମଜାଳିଆ ସ୍ବଭାବ ଖୁସି ଦେଇଥାଏ। ଆମକୁ ଆଗକୁ ମଧ୍ୟ ଜିତିବାକୁ ପଡ଼ିବ। ସେଥିଲାଗି ଭିନ୍ନ ଯୋଜନା କରାଯିବ ବୋଲି ସେ କହିଛନ୍ତି।