ଖ୍ରୀଷ୍ଟଚର୍ଚ୍ଚ,୨୭।୩: ଆଇସିସି ମହିଳା ବିଶ୍ୱକପରେ ଭାରତ ଦକ୍ଷିଣ ଆଫ୍ରିକାଠାରୁ ପରାସ୍ତ ହୋଇ ବିଶ୍ୱକପ୍ ସେମିଫାଇନାଲ୍ରୁ ବାଦ୍ ପଡିଛି। ଶେଷ ଲିଗ୍ ମ୍ୟାଚରେ ଟିମ ଇଣ୍ଡିଆର ଅଧିନାୟକ ମିତାଲି ରାଜ ତାଙ୍କ ପାଇଁ ଆଉ ଏକ ସଫଳତା ହାସଲ କରିଛନ୍ତି। ଖ୍ରୀଷ୍ଟଚର୍ଚର ହାଗଲି ଓଭାଲରେ ଖେଳାଯାଉଥିବା ଏହି କର ବା ମର ମ୍ୟାଚରେ ସେ ଚମତ୍କାର ବ୍ୟାଟିଂ କରି ଅର୍ଦ୍ଧଶତକ ହାସଲ କରିଥିଲେ। ଏହାସହ ମହିଳା ବିଶ୍ୱକପରେ ସର୍ବକନିଷ୍ଠ ଏବଂ ବରିଷ୍ଠ ଖେଳାଳି ଭାବେ ଅର୍ଦ୍ଧଶତକ ହାସଲ କରିଛନ୍ତି ମିତାଲି। ୨୨ ବର୍ଷ ପୂର୍ବେ ୨୦୦୦ ନଭେମ୍ବର ୩୦ରେ ମିତାଲି ଦକ୍ଷିଣ ଆଫ୍ରିକା ବିପକ୍ଷରେ ଖ୍ରୀଷ୍ଟଚର୍ଚ୍ଚରେ ସମାନ ଗ୍ରାଉଣ୍ଡରେ ଖେଳାଯାଇଥିବା ମହିଳା ବିଶ୍ୱକପ ମ୍ୟାଚରେ ୬୯ରନର ଅପରାଜିତ ଇନିଂସ ଖେଳିଥିଲେ। ମିତାଲିଙ୍କୁ ସେତେବେଳେ ୧୭ ବର୍ଷ ବୟସ ହୋଇଥିଲା। ଅଜବ ସଂଯୋଗବଶତଃ ସେ ଚଳିତ ମହିଳା ବିଶ୍ୱକପ୍ରେ ସମାନ ଗ୍ରାଉଣ୍ଡରେ ସବୁଠୁ ବରିଷ୍ଠ ଖେଳାଳି ଭାବେ ଅର୍ଦ୍ଧଶତକ ହାସଲ କରି ଇତିହାସ ସୃଷ୍ଟି କରିଛନ୍ତି। ମିତାଲିଙ୍କ ଏବେ ୩୯ ବର୍ଷ।
ଏହି ଗୁରୁତ୍ୱପୂର୍ଣ୍ଣ ମ୍ୟାଚରେ ଇନିଂସ ଓପନ୍ କରିଥିବା ଶେଫାଳୀ ବର୍ମା ଆକ୍ରମଣାତ୍ମକ ଆରମ୍ଭ କରିଥିଲେ। ଦ୍ରୁତ ବ୍ୟାଟିଂ କରି ସେ ୪୬ ବଲରେ ୫୩ରନ ସଂଗ୍ରହ କରିଥିଲେ। ଶେଫାଳୀ ତାଙ୍କ ଇନିଂସରେ ୪ଟି ଚୌକା ମାରିଥିଲେ। ସେ ପ୍ରଥମ ଉଇକେଟ ପାଇଁ ସ୍ମୃତି ମନ୍ଧାନାଙ୍କ ସହ ୯୧ ରନ ଭାଗିଦାରୀ ବାଣ୍ଟିଥିଲେ। ୮୪ ବଲରୁ ୭୧ ରନରେ ମନ୍ଧାନା ଆଉଟ୍ ହୋଇଥିଲେ। ଏହି ସମୟ ମଧ୍ୟରେ ଟିମ ଇଣ୍ଡିଆର ଅଧିନାୟକ ମିତାଲି ମଧ୍ୟ ଏକ ଗୁରୁତ୍ୱପୂର୍ଣ୍ଣ ଇନିଂସ ଖେଳି ୮୪ ବଲରେ ୬୮ ରନ ସଂଗ୍ରହ କରିଥିଲେ। ହରମାନପ୍ରୀତ କୌର ରନ କରିଥିଲେ। ଏହି ସମସ୍ତ ବ୍ୟାଟ୍ସମ୍ୟାନଙ୍କ ଦୃଢ ବ୍ୟାଟିଂ ହେତୁ ଭାରତ ୭ ଉଇକେଟ ହରାଇ ୨୭୪ ରନ ସ୍କୋର କରିବାରେ ସଫଳ ହୋଇଥିଲା।
ଦକ୍ଷିଣ ଆଫ୍ରିକା ବିପକ୍ଷ ଭାରତୀୟ ଇନିଂସରେ ମିତାଲି ରାଜ ତାଙ୍କ ନାମରେ ଏକ ନିଆରା ସଫଳତା ହାସଲ କରିଛନ୍ତି।