ଲକ୍ଷ୍ନୌ, ୧୫ା୩ (ପି.ଟି.)- ଭାରତର ଭେଟେରାନ ବ୍ୟାଟ୍ସଓମ୍ୟାନ ମିଥାଲି ରାଜ ଆଉ ଏକ କୀର୍ତ୍ତିମାନ ଅର୍ଜନ କରିଛନ୍ତି। ଅନ୍ତର୍ଜାତୀୟ ଦିନିକିଆ କ୍ରିକେଟରେ ୭,୦୦୦ ରନ ପୂରଣ କରିବାରେ ସେ ପ୍ରଥମ ମହିଳା କ୍ରିକେଟର ହୋଇଛନ୍ତି। ରବିବାର ଦକ୍ଷିଣ ଆଫ୍ରିକା ବିପକ୍ଷ ଚତୁର୍ଥ ଅନ୍ତର୍ଜାତୀୟ ଦିନିକିଆରେ ସେ ଏହି ସଫଳତା ହାସଲ କରିଛନ୍ତି। ଭାରତୀୟ ଅଧିନାୟିକା ତାଙ୍କ ୨୧୩ତମ ମ୍ୟାଚରେ ୭,୦୦୦ରନ ମାଇଲଖୁଣ୍ଟ ହାସଲ କରିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଟୁଇଟ କରି ମିଥାଲିଙ୍କର ଉଚ୍ଚପ୍ରଶଂସା କରିଛି। ୩୮ ବର୍ଷୀୟା ବ୍ୟାଟ୍ସଓମ୍ୟାନ ୧୯୯୯ରେ ତାଙ୍କ ଅନ୍ତର୍ଜାତୀୟ ପଦାର୍ପଣ କରିଥିଲେ। ମହିଳା ଅନ୍ତର୍ଜାତୀୟ ଦିନିକିଆରେ ୬,୦୦୦ ରନ ପୂରଣ କରିବାରେ ମଧ୍ୟ ସେ ପ୍ରଥମ ଖେଳାଳି। ଦିନିକିଆରେ ସର୍ବାଧିକ ରନ ସଂଗ୍ରହ କରିବା ତାଲିକାରେ ଇଂଲଣ୍ଡର ଚାର୍ଲୋଟ ଏଡଓ୍ବାଡର୍ସ ମିଥାଲିଙ୍କ ପଛକୁ ଦ୍ୱିତୀୟ ସ୍ଥାନରେ ରହିଛନ୍ତି। ସେ ୫,୯୯୨ ରନ ସଂଗ୍ରହ କରିଛନ୍ତି। ରବିବାର ଅନୁଷ୍ଠିତ ଦକ୍ଷିଣ ଆଫ୍ରିକା ବିପକ୍ଷ ଚତୁର୍ଥ ଦିନିକିଆର ୩୮ତମ ଓଭରରେ ମିଡିୟମ ପେସର ଟୁମି ଶେଖୁହୁନେଙ୍କ ଦ୍ୱାରା ଆଉଟ ହେବା ପୂର୍ବରୁ ସେ ୭୧ ବଲ୍ରେ ୪୫ ରନ କରିସାରିଥିଲେ। ଏହାମଧ୍ୟରେ ତାଙ୍କର ୪ଟି ଚୌକା ସାମିଲ। ଶୁକ୍ରବାର ଅନୁଷ୍ଠିତ ତୃତୀୟ ମ୍ୟାଚରେ ମିଥାଲି ପ୍ରଥମ ଭାରତୀୟ ଏବଂ ଅନ୍ତର୍ଜାତୀୟସ୍ତରରେ ଦ୍ୱିତୀୟ ଖେଳାଳି ହିସାବରେ ଖେଳର ସମସ୍ତ ଫର୍ମାଟରେ ୧୦,୦୦୦ ରନ ପୂରଣ କରିଥିଲେ।
