ନୂଆଦିଲ୍ଲୀ,୨୧ ।୯: ଦେଶରେ ପ୍ରଥମଥର କରାଯାଇଥିବା ହାପିନେସ୍ ସର୍ଭେରେ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚକୁ ସାମିଲ କରାଯାଇ ର୍ୟାଙ୍କିଙ୍ଗ ଦିଆଯାଇଥିଲା । ଏହାପରେ ମିଜୋରାମ, ପଞ୍ଜାବ ଓ ଆଣ୍ଡାମାନ ନିକୋବର ଦ୍ୱୀପ ଟପ୍ ୩ରେ ରହିଛନ୍ତି । ଏଠାକାର ଲୋକ ସବୁଠାରୁ ଖୁସିରେ ରୁହନ୍ତି ବୋଲି ଉକ୍ତ ସର୍ଭେରେ କୁହାଯାଇଛି । ଛତିଶଗଡ଼, ଓଡ଼ିଶା ଓ ଉତ୍ତରାଖଣ୍ଡର ଲୋକ ସବୁଠାରୁ କମ୍ ଖୁସିରେ ରୁହନ୍ତି ବୋଲି କହିଛି ଉକ୍ତ ସର୍ଭେ । କୁହାଯାଇଛି ଖୁସିର କାରଣ ମଧ୍ୟରେ କୋଭିଡ-୧୯କୁ ସାମିଲ କରାଯାଇଛି । ସେଥିପାଇଁ ମହାରାଷ୍ଟ୍ର, ଦିଲ୍ଲୀ ଓ ହରିୟାଣା ଭଳି ରାଜ୍ୟରେ ଲୋକେ କମ୍ଖୁସି ରହିଥିବା ଦେଖାଯାଇଛି । ଜମ୍ମୁ-କଶ୍ମୀର ଲୋକେ ମଧ୍ୟ ଅଧିକ ଖୁସି ନ ଥିବା ଦେଖାଯାଇଛି । ହାପିନେସ୍ ସର୍ଭେରେ ୫ଟି ଦିଗ ପ୍ରତି ଧ୍ୟାନ ଦିଆଯାଇଥିଲା । ଏଥିରେ କାର୍ଯ୍ୟଶୈଳୀ, ସମ୍ପର୍କ, ସ୍ୱାସ୍ଥ୍ୟ, ସାମାଜିକ ସେବା, ଧାର୍ମିକ ଅଧ୍ୟାତ୍ମିକ ପକ୍ଷ, ସ୍ୱାସ୍ଥ୍ୟରେ କରୋନା ପ୍ରଭାବକୁ ସାମିଲ କରାଯାଇଥିଲା । ଏହି ସର୍ଭେରେ ସମଗ୍ର ଦେଶରୁ ୧୬,୯୫୦ ଲୋକଙ୍କଠାରୁ ମାର୍ଚ୍ଚରୁ ଜୁଲାଇ ମାସ ମଧ୍ୟରେ ରାୟ ସଂଗ୍ରହ କରାଯାଇଥିଲା । ପ୍ରଫେସର ରାଜେଶ ପିଲାନିଆ ଏହି ସର୍ଭେ କରିଥିବା ସୂଚନା ରହିଛି । ଏଥିରେ ଭାରତର ଜଣାଶୁଣା ଲୋକଙ୍କ ରାୟ ନିଆଯାଇଥିଲା । ଏହି ସର୍ଭେରେ ଜେଣ୍ଡରର କୌଣସି ସମ୍ପର୍କ ନ ଥିବା କୁହାଯାଇଛି । ହେଲେ ବୈବାହିକ ଜୀବନ, ବୟସ, ଶିକ୍ଷା ଓ ରୋଜଗାର ସହ ଖୁସିର ସମ୍ପର୍କ ରହିଥିବା କୁହାଯାଏ । ତେବେ ବିବାହିତମାନେ ଅବିବାହିତଙ୍କଠାରୁ ଅଧିକ ଖୁସିଥିବା ଦର୍ଶାଯାଇଛି । ଯେ କୌଣସି କାର୍ଯ୍ୟରେ ବ୍ୟସ୍ତଥିବା ଲୋକେ ମଧ୍ୟ ଅଧିକ ଖୁସି ରହିଥାଆନ୍ତି ବୋଲି କୁହାଯାଇଛି । ଏହି କ୍ଷେତ୍ରରେ ଆସାମ, ମିଜୋରାମ, ଆଣ୍ଡାମାନ, ପଞ୍ଜାବ ଓ ପୁଡୁଚେରୀ ଆଗରେ ରହିଥିବା ବେଳେ ସମ୍ପର୍କ ରଖିବାରେ ପଞ୍ଜାବ, କର୍ନାଟକ, ମିଜୋରାମ, ଆଣ୍ଡାମାନ ଓ ସିକ୍କିମ ଟପ୍ ୫ରେ ରହିଛି । ତେବେ ଏହି ତାଲିକାରେ ବାଜି ମାରିଛି ମିଜୋରାମ । ଏହା ସବୁଠାରୁ ସୁରକ୍ଷିତ ରାଜ୍ୟ ହୋଇଥିବା ବେଳେ ଏହା ଶାନ୍ତି ଓ ଭଲ ବାତାବରଣ ପାଇଁ ବେଶ୍ ପରିଚିତ । ଏହାର ଅର୍ଥବ୍ୟବସ୍ଥା ଗୋଟିଏ ପଟେ ପର୍ଯ୍ୟଟନ ଉପରେ ନିର୍ଭର କରୁଥିବା ବେଳେ ଅନ୍ୟପଟେ ମହିଳାମାନେ ବହୁ ପରିମାଣରେ ବ୍ୟବସାୟ କରିଥାଆନ୍ତି । ଏଠାରେ ଅପରାଧ ନାହିଁ କହିଲେ ଚଳେ । ମିଜୋରାମର ଲୋକ ଆତ୍ମନିର୍ଭରଶୀଳ । ଏଠାକୁ ଅଧିକାଂଶ ପର୍ଯ୍ୟଟକ ଆସୁଥିବାରୁ ସେମାନଙ୍କ ସହ ଭଲ ବ୍ୟବହାର ଓ ଉତ୍ତମ ଆତିଥ୍ୟ ପ୍ରଦାନ କରିବାକୁ ଏମାନେ ଏବେ ହିନ୍ଦୀ ଶିଖୁଥିବା ଦେଖାଯାଇଛି । ମିଜୋରାମ ଭଳି ସିକ୍କିମ ଓ ଅରୁଣାଚଳ ପ୍ରଦେଶ ମଧ୍ୟ ଖୁସି ତାଲିକାର ଟପ୍ ଟେନ୍ରେ ରହିଛି । ଏହାକୁ ନେଇ ହାବାର୍ଡ ବିଜନେସ୍ ସ୍କୁଲର ଆସିଷ୍ଟାଣ୍ଡ ପ୍ରଫେସର ଡା. ଏଶଲେ ୱିଲିୟମ୍ସ କହିଛନ୍ତି ଯେଉଁ ରାଜ୍ୟରେ ଲୋକେ ଅର୍ଥଠାରୁ ସମୟକୁ ଅଧିକ ଗୁରୁତ୍ୱ ଦେଇଥାଆନ୍ତି ସେମାନେ ଅଧିକ ଖୁସି ରହିଥାଆନ୍ତି । ସେହିପରି ଷ୍ଟାନଫୋର୍ଡର ଡା. ଇମା ସେପଲା କହିଛନ୍ତି ଯେଉଁ ରାଜ୍ୟର ଲୋକ ଦୟାଳୁ, ସହିଷ୍ଣୁ ଓ ଧର୍ଯ୍ୟବାନ ହୋଇଥାଆନ୍ତି ସେମାନେ ଅଧିକ ଖୁସି ରହିଥାଆନ୍ତି ।
