ବ୍ରହ୍ମପୁର,୧୬ା୧୦(ସୁବାସ ଚନ୍ଦ୍ର ପାଢ଼ୀ): ଏମକେସିଜ ମେଡିକାଲର ପୁରୁଣା ଇନଡୋର୍ କୋଠାକୁ ଫାଇଲିନ୍ ମହାବାତ୍ୟା ପରଠାରୁ ଅସୁରକ୍ଷିତ ଘୋଷଣା କରାଯାଇଛି। ଦୀର୍ଘ ୧୧ବର୍ଷ ମଧ୍ୟରେ ବିଭିନ୍ନ କୋଠାରୁ ପଲସ୍ତରା ଖସିବା ସହ ଛାତ ଭାଙ୍ଗି ଗଲାଣି। ସେଠାରେ ଏମକେସିଜି ଅଧିକ୍ଷକଙ୍କ କାର୍ଯ୍ୟାଳୟ ଓ କେତେକ ବିଭାଗ କାର୍ଯ୍ୟାଳୟ ରହିଛି। ଏଥିପାଇଁ ପୂର୍ତ୍ତ ବିଭାଗ ତରଫରୁ କୋଠାର ଚାରି ପଟେ ସୂଚନା ଫଳକ ଲଗାଯାଇଛି। ଖୁବଶୀଘ୍ର କୋଠା ଭଙ୍ଗାଯିବ ବୋଲି ସୂଚନା ଦିଆଯାଇଛି। ଏହି କୋଠା ସଂଲଗ୍ନ ରହିଥିବା ଅଧୀକ୍ଷକଙ୍କ କାର୍ଯ୍ୟାଳୟ ମଧ୍ୟ ସ୍ଥାନାନ୍ତର କରାଯିବ। ଅଧୀକ୍ଷକଙ୍କ କାର୍ଯ୍ୟାଳୟ କୋଠା ମଧ୍ୟ ପୁରୁଣା ହୋଇ ସାରିଲାଣି। ମେଡିକାଲ ପରିସରରେ ଥିବା ନର୍ସିଂ ସ୍କୁଲର କୋଠାକୁ ଅଧୀକ୍ଷକଙ୍କ କାର୍ଯ୍ୟାଳୟ ସ୍ଥାନାନ୍ତର କରାଯିବ। ପ୍ରାଥମିକ ପର୍ଯ୍ୟାୟରେ ରେକର୍ଡ଼ ସେକ୍ସନକୁ ସେଠାକୁ ଘୁଞ୍ଚାଯାଇଛି। ପର୍ଯ୍ୟାୟ କ୍ରମେ ଅଧୀକ୍ଷକଙ୍କ କାର୍ଯ୍ୟାଳୟ ସହିତ ଅନ୍ୟ ସମସ୍ତ ବିଭାଗ ସେଠାକୁ ସ୍ଥାନାନ୍ତର କରାଯିବ ବୋଲି ନିଷ୍ପତ୍ତି ହୋଇଛି। ଏମକେସିଜିର ପୁରୁଣା ଇନଡୋର୍ କୋଠାକୁ ଗତ ଫାଇଲିନ୍ ବାତ୍ୟା ପରେ ପୂର୍ତ୍ତ ବିଭାଗ ତରଫରୁ ଅସୁରକ୍ଷିତ ଘୋଷଣା କରାଯାଇଥିଲା। ସେହି କୋଠାରେ ସମସ୍ତ ଇନଡୋର୍ ବିଭାଗ ଚାଲିଥିଲା। ପର୍ଯ୍ୟାୟ କ୍ରମେ ନୂତନ କୋଠା ତିଆରି ହେବା ପରେ ସେଠାରୁ ସମସ୍ତ ବିଭାଗକୁ ସ୍ଥାନାନ୍ତର କରି ଦିଆଯାଇଛି। ସେହି ପୁରୁଣା କୋଠାରେ ଆଉ କୌଣସି ବିଭାଗ ନାହିଁ। ଶିଶୁରୋଗ ବିଭାଗ, ପ୍ରସୂତି ବିଭାଗ, ସର୍ଜରି ବିଭାଗ ସହିତ ମେଡିସିନ୍ ବିଭାଗ ପାଇଁ ସ୍ବତନ୍ତ୍ର କୋଠା ରହିଛି। ପୁରୁଣା ଇନଡୋର୍ କୋଠା ବର୍ତ୍ତମାନ ପରିତ୍ୟକ୍ତ ଅବସ୍ଥାରେ ରହିଛି। କୋଠାର ବିଭିନ୍ନ ସ୍ଥାନରୁ ସିମେଣ୍ଟ ପଲସ୍ତରା ଖସୁଥିବା ବେଳେ ଚାରିପଟେ ଗଛ ଉଠିଗଲାଣି। ବିଭିନ୍ନ ସ୍ଥାନରେ ଫାଟ ସୃଷ୍ଟି ହୋଇଥିବାରୁ ତାହା ଯେ କେଣସି ମୁହୂର୍ତ୍ତରେ ଭୁଶୁଡ଼ି ପଡ଼ିବ ବୋଲି ଆଶଙ୍କା କରାଯାଉଛି। ଏଣୁ ସେଠାରୁ ସମସ୍ତ ବିଭାଗକୁ ସ୍ଥାନାନ୍ତର କରି ଦିଆଯାଇଛି। ସେହି କୋଠା ଚାରିପଟେ ବାଡ଼ ଦିଆଯାଇଛି। କୋଠା ପାଖକୁ ଯିବା ପାଇଁ ଜନସାଧାରଣଙ୍କୁ ବାରଣ କରାଯାଇଛି। ଏହି କୋଠା ସଂଲଗ୍ନ ରହିଥିବା ଅଧୀକ୍ଷକଙ୍କ କାର୍ଯ୍ୟାଳୟକୁ ନର୍ସିଂ ସ୍କୁଲ କୋଠାକୁ ସ୍ଥାନାନ୍ତର କରାଯିବ। କିଛି କାମ ବାକି ରହିଥିବାରୁ ଏହି ପ୍ରକ୍ରିୟା ଆରମ୍ଭ ହୋଇ ନାହିଁ। କାମ ସରିବା ପରେ ଅଧୀକ୍ଷକଙ୍କ କାର୍ଯ୍ୟାଳୟ ଅଧୀନରେ ରହିଥିବା ସମସ୍ତ ବିଭାଗ ସେଠାକୁ ସ୍ଥାନାନ୍ତର କରି ଦିଆଯିବ।