ବ୍ରହ୍ମପୁର ଅଫିସ,୯ା୭: ବ୍ରହ୍ମପୁରରେ ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲର ଡାକ୍ତର, ନର୍ସ, କର୍ମଚାରୀ ଓ ରୋଗୀ କରୋନାରେ ସଂକ୍ରମିତ ହେବା ପରେ ଗଞ୍ଜାମ ଜିଲା ପ୍ରଶାସନ ପକ୍ଷରୁ ଓପିଡି (ଅଉଟଡୋର)କୁ ଚିକିତ୍ସା ପାଇଁ ଆସୁଥିବା ରୋଗୀଙ୍କ ଉପରେ ଗୁରୁବାରଠାରୁ ରୋକ ଲଗାଯାଇଛି। ଓପିଡିରେ ରୋଗୀ ଚିକିତ୍ସା ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖାଯାଇଛି। କେବଳ ଜରୁରୀକାଳିନ ତଥା ଗୁରୁତର ରୋଗୀଙ୍କୁ ଏମ୍କେସିଜିର କାଜୁଆଲଟିରେ ଚିକିତ୍ସା କରାଯିବ ବୋଲି ବଡ଼ମେଡିକଲ ଅଧିକ୍ଷକ ପ୍ରଫେସର ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି। ଫଳରେ ଏମ୍କେସିଜିରେ ଏବେ ଆଉଟଡୋର ସେବା ବନ୍ଦ ହୋଇଯାଇଛି। ଏପରିକି ଏମ୍କେସିଜି ମେଡିକାଲକୁ ସଂଯୋଗ କରୁଥିବା ମୁଖ୍ୟ ଫଟକ, ପଛପଟ ଫାଟକ ବନ୍ଦ କରିଦିଆଯାଇଥିବା ବେଳେ ଗୋଇଲୁଣ୍ଡି ଓ ସିଦ୍ଧାର୍ଥ ନଗର ପଟୁ ଆସିଥିବା ସମସ୍ତ ରାସ୍ତାକୁ ବାଡ଼ ପକାଇ ସିଲ୍ କରିଦିଆଯାଇଛି। ଏମ୍କେସିଜି ମେଡିକାଲକୁ ସଂଯୋଗ ହୋଇଥିବା ସମସ୍ତ ରାସ୍ତାରେ ଏବେ ପୋଲିସ ମୁତୟନ ହୋଇଛି। ମୁଖ୍ୟ ଫାଟକର ଗୋଟିଏ ପଟ ସମ୍ପୂର୍ଣ ଭାବେ ସିଲ୍ କରାଯାଇଥିବା ବେଳେ ଅନ୍ୟ ଫାଟକ ଦେଇ ଡାକ୍ତର, ନର୍ସ, ମେଡିକାଲ କର୍ମଚାରୀ, ସୁରକ୍ଷାକର୍ମୀ, ଗୁରୁତର ରୋଗୀ ତଥା ଦୁର୍ଘଟଣା ଓ ମୃତ୍ୟୁସହ ସଂଗ୍ରାମ ରୋଗୀ ସରକାରୀ ଆମ୍ବୁଲାନ୍ସକୁ ମେଡିକାଲ ଭିତରକୁ ଛଡ଼ାଯିବ। ଏହାସହିତ ମେଡିକାଲରେ ବିଭିନ୍ନ ୱାର୍ଡରେ ଚିକିତ୍ସିତ ହେଉଥିବା ରୋଗୀଙ୍କ ସମ୍ପର୍କୀୟମାନେ ପାସ୍ ଦେଖାଇ ମେଡିକାଲ ଭିତରକୁ ପ୍ରବେଶ କରିପାରିବେ ବୋଲି ପ୍ରଫେସର ମିଶ୍ର କହିଛନ୍ତି।
ପ୍ରକାଶ ଯେ, ଏମ୍କେସିଜି ମେଡିକାଲର ଡାକ୍ତର, ନର୍ସ, କର୍ମଚାରୀ ଓ ରୋଗୀ କରୋନାରେ ସଂକ୍ରମିତ ହେବା ପରେ ଗଞ୍ଜାମ ଜିଲା ପ୍ରଶାସନ ପକ୍ଷରୁ ଉପରୋକ୍ତ ନିଷ୍ପତ୍ତି ନିଆଯାଇଛି। ଜନସାଧାରଣଙ୍କ ସ୍ବାର୍ଥ ଦୃଷ୍ଟିରୁ ତଥା କରୋନା ଚେନ୍ରେ ରୋକ ଲଗାଇବାକୁ ଜିଲାପାଳ ବିଜୟ ଅମୃତା କୁଲାଙ୍ଗେ ବଡ଼ମେଡିକଲର ରୁଟିନ ଓପିଡିକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖିବାକୁ ନିର୍ଦ୍ଦେଶାନାମା ଜାରି କରିଥିଲେ ବୋଲି ଅଧିକ୍ଷକ ମିଶ୍ର କହିଛନ୍ତି।