ବାଲେଶ୍ୱର ଅଫିସ, ୭ା୧ ବାଲେଶ୍ୱର ସଦର ବ୍ଲକ ସମ୍ମିଳନୀ କକ୍ଷରେ ଗୁରୁବାର ନୂତନ ଭତ୍ତା ବଣ୍ଟନ କାର୍ଯ୍ୟକ୍ରମ ଅନୁଷ୍ଠିତ ହେଉଥିଲା। ଏଥିରେ ବିଧାୟକ ଉପସ୍ଥିତ ରହି ଭତ୍ତା ବଣ୍ଟନ କରୁଥିବା ବେଳେ କସିପଦା ଓ ବାହାବଳପୁର ସରପଞ୍ଚ ପହଞ୍ଚତ୍ ସେମାନଙ୍କୁ ନିମନ୍ତ୍ରଣ ଦେଇ ନ ଥିବା ଅଭିଯୋଗ କରିଥିଲେ। ଏହାକୁ ନେଇ ବିଧାୟକ ଓ ସରପଞ୍ଚଙ୍କ ସମର୍ଥକଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ପରେ ଘଟଣାସ୍ଥଳରେ ପୋଲିସ ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିଲା।
ଘଟଣାରୁ ପ୍ରକାଶ, ସଦର ବ୍ଲକର ୩୭ ପଞ୍ଚାୟତର ୬୬୬ ଜଣ ହିତାଧିକାରୀଙ୍କୁ ନୂଆ ଭତ୍ତା ପ୍ରଦାନ ପାଇଁ ପ୍ରଶାସନ ପକ୍ଷରୁ ସିଦ୍ଧାନ୍ତ କରାଯାଇଛି। କୋଭିଡ୍ ନିୟମକୁ ପାଳନ କରି ପ୍ରତି ପଞ୍ଚାୟତରେ ୧୫ଜଣ ଲେଖାଏଁ ହିତାଧିକାରୀଙ୍କୁ ଡକାଯାଇ ଭତ୍ତା କାର୍ଡ଼ ବଣ୍ଟନ କରାଯାଉଥିଲା। ଏହି କାର୍ଯ୍ୟକ୍ରମରେ ବାଲେଶ୍ୱର ବିଧାୟକ ସ୍ବରୂପ କୁମାର ଦାସ ଓ ରେମୁଣା ବିଧାୟକ ସୁଧାଂଶୁ ଶେଖର ପରିଡ଼ା ଉପସ୍ଥିତ ରହି ହିତାଧିକାରୀଙ୍କୁ ଭତ୍ତା ବଣ୍ଟନ କରୁଥିଲେ। ଏହି ସମୟରେ କସିପଦା ସରପଞ୍ଚ ଅନିତା ବେହେରା ଓ ବାହାବଳପୁର ପଞ୍ଚାୟତର ସରପଞ୍ଚ ରଶ୍ମିତା ମଣ୍ଡଳ ଉକ୍ତ ସ୍ଥାନରେ ପହଞ୍ଚତ୍ ତାଙ୍କ ପଞ୍ଚାୟତର ହିତାଧିକାରୀଙ୍କୁ ସୂଚନା ଦିଆଯାଇ ନ ଥିବା ଅଭିଯୋଗ କରିଥିଲେ। ପରେ ବ୍ଲକ ସୋସିଆଲ ସିକ୍ୟୁରିଟି ଅଫିସର (ବିଏସ୍ଏସ୍ଓ)ଙ୍କୁ ପଚାରିଥିଲେ। ବିଡିଓ ତାଙ୍କୁ ଯେଉଁ ନିର୍ଦ୍ଦେଶ ଦେଇଛନ୍ତି ତାହା ପାଳନ କରିଛନ୍ତି ବୋଲି କହି ସେ ଖସିଯିବା ପରେ ବିଡିଓଙ୍କ ପାଖକୁ ଯାଇ ପଚାରିବାରୁ ଗଣ୍ଡଗୋଳ ପରିସ୍ଥିତି ସୃଷ୍ଟି ହୋଇଥିଲା। ଉକ୍ତ କାରଣରୁ ଉଭୟ ବିଧାୟକ ଓ ସରପଞ୍ଚଙ୍କ ସମର୍ଥକମାନେ ଠେଲାପେଲା ଓ ପାଟିତୁଣ୍ଡ ଲାଗି ୨ଘଣ୍ଟା ଧରି ଉଭୟ ପକ୍ଷ ଧାରଣାରେ ବସିଥିଲେ। ଘଟଣାସ୍ଥଳରେ ପୋଲିସ ପହଞ୍ଚତ୍ ଶାନ୍ତିଶୃଙ୍ଖଳା ରକ୍ଷା ପାଇଁ ଚେଷ୍ଟା କରିଥିଲା। ଶେଷରେ ବ୍ଲକ ଚେୟାରମ୍ୟାନ୍ ନାରାୟଣ ପ୍ରଧାନ ଉଭୟ ପକ୍ଷଙ୍କୁ ଡାକି ଆଲୋଚନା କରିଥିଲେ। ପରସ୍ପର ନିଜର ଭୁଲ୍ ସ୍ବୀକାର କରି ହିତାଧିକାରୀମାନେ କିପରି ଭାବେ ଭତ୍ତା ପାଇବେ ସହଯୋଗରେ କାମ କରିବେ ବୋଲି ସିଦ୍ଧାନ୍ତ ନେଇ ଧାରଣାରୁ ଓହରିଥିଲେ।