ବେଙ୍ଗାଲୁରୁ,୨୯।୩ : କର୍ନାଟକ ବିଧାନସଭା ନିର୍ବାଚନ ତାରିଖ ଘୋଷଣା କରାଯାଇଛି। ମେ ୧୦ ରେ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ ଏବଂ ମେ ୧୩ ରେ ଭୋଟ ଗଣନା କରାଯିବ। ରାଜ୍ୟରେ ନିର୍ବାଚନ ପୂର୍ବରୁ କଂଗ୍ରେସ ବିବାଦ ଘେରକୁ ଆସିଥିବା ଜଣାପଡିଛି। କର୍ନାଟକରେ କଂଗ୍ରେସ ଅଧ୍ୟକ୍ଷ ଡି.କେ ଶିବକୁମାରଙ୍କର ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି।
ଯେଉଁଥିରେ ସେ ନୋଟ ଉଡାଉଥିବାର ନଜର ଆସିଛନ୍ତି। ଡି.କେ ଶିବକୁମାରଙ୍କ ଏହି ଭିଡିଓକୁ ମଙ୍ଗଳବାରର ମାଣ୍ଡ୍ୟା ରାଲିର ବୋଲି କୁହାଯାଉଛି। ଏହି ରାଲିରେ ସେ ଲୋକଙ୍କ ଉପରେ ୫୦୦-୫୦୦ ଟଙ୍କା ନୋଟ ଉଡ଼ାଉଥିବାର ନଜର ଆସିଛନ୍ତି। ଡି.କେ ଶିବକୁମାର କଂଗ୍ରେସର ‘ପ୍ରଜା ଧ୍ୱନୀ ଯାତ୍ରା’ରେ ଭାଗ ନେଇଥିଲେ। ଏହି ସମୟରେ ସେ ବେବିନାହଲ୍ଲୀରେ ବସ ଉପରୁ କଳାକାରମାନଙ୍କ ଉପରେ ଟଙ୍କା ବର୍ଷା କରିଥିଲେ।
କଂଗ୍ରେସର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ଦେଖାଯାଉଥିବା ଶିବକୁମାର ଶକ୍ତିଶାଳୀ ଭୋକାଲିଗା ସମ୍ପ୍ରଦାୟର ଏକ ଗଡ଼ ବୋଲି କୁହାଯାଉଥିବା ମାଣ୍ଡ୍ୟାରେ ବ୍ୟାପକ ପ୍ରଚାର ଚଳାଇଛନ୍ତି।