ଭଦ୍ରକ ଅଫିସ, ୨୩ା୬: ଭଦ୍ରକ ଜିଲାର ଚାନ୍ଦବାଲି ବିଧାୟକ ତଥା ଯୁବ ବିଜେଡି ସଭାପତି ବ୍ୟୋମକେଶ ରାୟ ଦ୍ୱିତୀୟ ଥର ପାଇଁ ବିବାହ କରିବେ। ଜୁଲାଇ ପ୍ରଥମ ସପ୍ତାହରେ ସେ ପାରମ୍ପାରିକ ରୀତିନୀତିରେ ରାଜ୍ୟର ଏକ ପ୍ରସିଦ୍ଧ ତାରକା ହୋଟେଲରେ ବିବାହ କରିବେ ବୋଲି ତାଙ୍କ ନିକଟତମ ମହଲରୁ ଜଣାପଡ଼ିଛି।
ସୂଚନା ମୁତାବକ, ପୁରୀ ଜିଲାର ଏକ ପ୍ରମୁଖ ତାରକା ହୋଟେଲରେ ବିଧାୟକ ବ୍ୟୋମକେଶଙ୍କ ବିବାହ ସମାରୋହ ୨ ଦିନ ଧରି ଅନୁଷ୍ଠିତ ହେବ। ଉଭୟ ପରିବାରର ସଦସ୍ୟ ଓ କିଛି ରାଜନେତାଙ୍କ ଉପସ୍ଥିତିରେ ବିବାହ କାର୍ଯ୍ୟକ୍ରମ ହେବ। ଇତି ମଧ୍ୟରେ ତାଙ୍କର ନିର୍ବନ୍ଧ ଶେଷ ହୋଇଛି। ସୂଚନାଯୋଗ୍ୟ, ବିଧାୟକ ରାୟଙ୍କ ପ୍ରଥମ ସ୍ତ୍ରୀ ନୀଳିମା ପ୍ରଧାନଙ୍କ ୨୦୨୦ ଫେବୃୟାରୀ ୩ ତାରିଖରେ ମୃତ୍ୟୁ ଘଟିଥିଲା। ବ୍ୟୋମକେଶ ଓ ନୀଳିମାଙ୍କର ଏକମାତ୍ର ଝିଅ ଅଛି। ଯାହାଙ୍କ ବୟସ ଏବେ ୫ ବର୍ଷ ବୋଲି ଜଣାପଡ଼ିଛି।