ବାଲେଶ୍ୱର,୨୧।୪(ମାନସ ବିଶ୍ୱାଳ)ବାଲେଶ୍ୱର ଜିଲାର ଦୁଇଟି ବିଧାନସଭା ଆସନର ପ୍ରାର୍ଥୀଙ୍କ ନାମ ବିଜେଡି ଷଷ୍ଠ ପର୍ଯ୍ୟାୟ ପ୍ରାର୍ଥୀ ତାଲିକାରେ ଘୋଷଣା କରିଛି। ରେମୁଣା ବିଧାନସଭା କ୍ଷେତ୍ରରୁ ବିଦ୍ୟାସ୍ମିତା ମହାଳିକ ଓ ସିମୁଳିଆ ବିଧାନସଭା କ୍ଷେତ୍ରରୁ ସୁବାସିନୀ ସାହୁଙ୍କ ନାମ ଘୋଷଣା କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ଏହି ଦୁଇ ମହିଳାଙ୍କ ସମେତ ଜିଲାରେ ପୂର୍ବରୁ ବସ୍ତା ନିର୍ବାଚନମଣ୍ଡଳୀରୁ ପ୍ରାର୍ଥିନୀ ଭାବେ ସୁବାସିନୀ ଜେନାଙ୍କ ନାମ ଘୋଷଣା କରାଯାଇଥିଲା। ଜିଲାର ମୋଟ୍ ୮ଟି ନିର୍ବାଚନମଣ୍ଡଳୀ (ସିମୁଳିଆ, ସୋର, ନୀଳଗିରି, ରେମୁଣା, ବାଲେଶ୍ୱର, ବସ୍ତା, ଭୋଗରାଇ ଓ ଜଳେଶ୍ୱର) ମଧ୍ୟରୁ ୬ଟି ନିର୍ବାଚନମଣ୍ଡଳୀରେ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିବା ବେଳେ ସେଥିମଧ୍ୟରୁ ୩ବିଧାନସଭା କ୍ଷେତ୍ରରେ ବିଜେଡି ମହିଳା ପ୍ରାର୍ଥୀ ଦେଇଛି।
ବିଧାନସଭା ଆସନ ଲାଗି ପ୍ରାର୍ଥତ୍ନୀ ଭାବେ ବିଦ୍ୟାସ୍ମିତା ମହାଳିକଙ୍କ ନାମ ଘୋଷଣା ପରେ ସେ କନକଦୁର୍ଗା ମନ୍ଦିରରେ ପହଞ୍ଚତ୍ ମା’ଙ୍କ ଆଶୀର୍ବାଦ ନେଇଥିଲେ। ପରେ କର୍ମୀମାନେ ଏକଜୁଟ ହୋଇ ବିଦ୍ୟାସ୍ମିତାଙ୍କୁ ଶୁଭେଚ୍ଛା ଜଣାଇଥିଲେ। ବିଦ୍ୟାସ୍ମିତା ଜଣେ ସ୍ବୟଂ ସହାୟିକା ଗୋଷ୍ଠୀର ସଦସ୍ୟାରୁ ପତ୍ରିପାଳ ପଞ୍ଚାୟତର ସରପଞ୍ଚ ଭାବେ ନିର୍ବାଚିତ ହୋଇଥିଲେ। ଏବେ ପୁଣି ବିଧାୟିକା ପ୍ରାର୍ଥୀ ଭାବେ ବିଦ୍ୟାସ୍ମିତାଙ୍କ ନାମ ଘୋଷଣା ପରେ କର୍ମୀଙ୍କ ମହଲରେ ଉତ୍ସାହ ବୃଦ୍ଧି ପାଇଛି। ନିଜ ନାମ ବିଧାୟିକା ପ୍ରାର୍ଥୀ ଭାବେ ଘୋଷଣା ପରେ ବିଦ୍ୟାସ୍ମିତା ଭାବବିହ୍ବଳ ହୋଇ ପଡ଼ିଥିଲେ। ଏଥିପାଇଁ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜ୍ଞାପନ କରିବା ସହ ରେମୁଣା ଅଞ୍ଚଳବାସୀଙ୍କଠାରୁ ସେ ଆଶୀର୍ବାଦ ଭିକ୍ଷା କରିଛନ୍ତି। ଏହାସହ ରେମୁଣାବାସୀ ସୁଯୋଗ ଦେଲେ ଅଞ୍ଚଳରେ କୃଷି କ୍ଷେତ୍ରରେ ବିକାଶ କରାଯିବ ବୋଲି ବିଦ୍ୟାସ୍ମିତା କହିଛନ୍ତି। ଅନ୍ୟପଟେ ଏହି ଆସନ ପାଇଁ ଭାଜପାର ପ୍ରାର୍ଥୀ ଭାବେ ଗୋବିନ୍ଦ ଦାସ ଏବଂ କଂଗ୍ରେସ ପ୍ରାର୍ଥୀ ଭାବେ ସୁଦର୍ଶନ ଜେନା ନିର୍ବାଚନ ମଇଦାନରେ ଥିବା ବେଳେ ବିଦ୍ୟାସ୍ମିତାଙ୍କ ନାମ ଘୋଷଣା ପରେ ଏହି ନିର୍ବାଚନମଣ୍ଡଳରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେବା ନେଇ ରାଜନୈତିକ ମହଲରେ ଚର୍ଚ୍ଚା ହେଉଛି।