ଗଜପତି,୧୮।୩ି(ଗିରିଧାରୀ ପରିଛା): ବର୍ତ୍ତମାନ ବିଧାନସଭା ଅଧିବେଶନ ଚାଲୁ ରହିଥିବା ବେଳେ ପାରଳାଖେମୁଣ୍ଡି ବିଧାୟକ ଇଂ.ରୁପେଶ କୁମାର ପାଣିଗ୍ରାହୀ ପାରଳାଖେମୁଣ୍ଡିଠାରେ ଏକ ମେଡିକାଲ କଲେଜ ଖୋଲିବାକୁ ଦାବି ଜଣାଇଛନ୍ତି। ଏଥିସହ ଗଜପତି ଜିଲାରେ ସ୍ବାସ୍ଥ୍ୟ କର୍ମଚାରୀ ଅଭାବ ସମ୍ପର୍କରେ ପ୍ରଶ୍ନ କରିଥିଲେ। ଏହାର ଉତ୍ତର ରଖି ସ୍ବାସ୍ଥ୍ୟମନ୍ତ୍ରୀ ଡଃ. ମୁକେଶ ମହାଲିଙ୍ଗ କହିଛନ୍ତି ଯେ ଗଜପତି ଜିଲାରେ ୧୨୫ ଡାକ୍ତର ପଦବୀ ମଧ୍ୟରୁ ୨୯ଟି ରହିଛନ୍ତି। ୧୪୪ ନର୍ସ ମଧ୍ୟରୁ ୪୬ ମାତ୍ର ଜଣ ରହିଛନ୍ତି (ସେଥିମଧ୍ୟରୁ ବିଭିନ୍ନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଅବସ୍ଥାପିତ),୨୪ଟି ଫାର୍ମାସିଷ୍ଟରୁ ୯ ଜଣ କାର୍ଯ୍ୟରତ ଅଛନ୍ତି। ପରୀକ୍ଷାଗାର ଟେକ୍ନିସିୟାନ ପଦବୀରେ ୧୪ ଜଣରୁ ମାତ୍ର ୪ ଜଣ ଅବସ୍ଥାପିତ ହୋଇଛନ୍ତି ଏବଂ ରେଡିଓଗ୍ରାଫର ୫ଟି ପଦବୀ ଥିବା ବେଳେ କେବଳ ଜଣେ ଅଛନ୍ତି।
ଉପରୋକ୍ତ ପଦବୀ ପୂରଣ ପାଇଁ ନିଜ ଉତ୍ତରରେ ସାସ୍ଥ୍ୟ ମନ୍ତ୍ରୀ କହିଲେ ଓପିଏସ୍ସିକୁ ଏ ବିଷୟରେ ଅବଗତ କରାଯାଇଛି। ୫୨୪୮ ଡାକ୍ତର(ଗ୍ରୁପ ଏ-ଜେବି ପଦବୀରେ) ଆବଶ୍ୟକ ଉପରେ ଚିଠି ନଂ ୪୫୭୯ ତା-୧୨.୨.୨୫ରେ ପଠାଯାଇଛି। ଏଦିଗରେ ଓପିଏସ୍ସିର ନିଷ୍ପତ୍ତିକୁ ଅପେକ୍ଷା କରାଯାଇଛି। ଏହାଛଡା ଅନ୍ୟ ଦାବି ସଂପର୍କରେ ବିଚାର କରାଯିବ ବୋଲି ମନ୍ତ୍ରୀ ଜଣାଇଛନ୍ତି। ଏହି ଉତ୍ତରକୁ ନେଇ ବିଧାୟକ ସନ୍ତୁଷ୍ଟ ନ ଥିବା ବେଳେ ଗଜପତି ଜିଲା ସଦରମହାକୁମା ଠାରେ ଏକ ସୁପର ସ୍ପେଶାଳିଟି ହସ୍ପିଟାଲ କରିବା ସହ ମେଡ଼ିକାଲ କଲେଜ କରିବା ଦିଗରେ ସରକାର ପ୍ରାଥମିକତା ଦିଅନ୍ତୁ ବୋଲି କହିଛନ୍ତି।
