ଅହମଦାବାଦ,୮।୧୧: ଚଳିତ ବର୍ଷ ଗୁଜୁରାଟ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ଦଳକୁ ଏକ ବଡ଼ ଝଟ୍କା ଲାଗିଛି। ଛୋଟ ଉଦୟପୁରରୁ ୧୧ ଥର ବିଧାୟକ ରହିଥିବା ମୋହନ ସିଂ ରାଠଓ୍ବା ମଙ୍ଗଳବାର କଂଗ୍ରେସରୁ ଇସ୍ତଫା ଦେଇଛନ୍ତି। ଖୁବ୍ଶୀଘ୍ର ସେ ଭାଜପାରେ ସାମିଲ ହେବେ ବୋଲି ଜଣାପଡ଼ିଛି। କୁହାଯାଉଛି, ଗତ କିଛି ଦିନ ହେବ ମୋହନ ସିଂହ ଦଳ ଉପରେ ଅସନ୍ତୋଷ ରହିଛନ୍ତି। ଏହାପୂର୍ବରୁ ସେ ମେ’ରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ କହିଥିଲେ। ବର୍ତ୍ତମାନ ସେ ବୃଦ୍ଧ ହୋଇଯାଇଛନ୍ତି ଏବେ ଯୁବକମାନଙ୍କୁ ସୁଯୋଗ ଦେବାକୁ ଚାହୁଁଛନ୍ତି ବୋଲି ସେ କହିଛନ୍ତି। ଏହା ମଧ୍ୟ କୁହାଯାଉଛି ଯେ, ମୋହନ ସିଂ ବର୍ତ୍ତମାନ କିଛି ସମୟ ରାଜନୀତିରେ ସକ୍ରିୟ ଥିବା ତାଙ୍କ ପୁଅ ରାଜେନ୍ଦ୍ର ସିଂ ରାଠଓ୍ବାଙ୍କୁ କ୍ଷମତା ହସ୍ତାନ୍ତର କରିବାକୁ ଚାହୁଁଛନ୍ତି। ଏକ ସାକ୍ଷାତକାରରେ ସେ ସ୍ପଷ୍ଟ ଭାବେ କହିଛନ୍ତି ଯେ, ଗତ ୫୫ ବର୍ଷ ଧରି ସେ କ୍ରମାଗତ ବିଧାନସଭାକୁ ପ୍ରତିନିଧିତ୍ୱ କରୁଛନ୍ତି। ଏବେ ସେମାନଙ୍କର ଅନୁଭବ ହେଉଛି ଗୁଜୁରାଟରେ ନୂଆ ଚେହେରା ଏବଂ ବିଶେଷକରି ଯୁବକମାନେ ରାଜନୀତିରେ ଆସିବା ଉଚିତ୍। ଯେଉଁମାନେ ବର୍ଷ ବର୍ଷ ଧରି ବିଧାନସଭାର ସଦସ୍ୟ ରହିଆସିଛନ୍ତି ସେମାନେ ବର୍ତ୍ତମାନ ଖୁସିରେ ଯୁବକମାନଙ୍କ ପାଇଁ ରାସ୍ତା ସଫା କରିଦେବା ଉଚିତ୍ ବୋଲି ମୋହନ ସିଂହ କହିଛନ୍ତି। ସୂଚନାଯୋଗ୍ୟ, ବରିଷ୍ଠ ନେତା ତଥା ୧୧ଥର ବିଧାୟକ ରହିଥିବା ମୋହନ ସିଂ ୨୦୧୨ଠାରୁ ଏହି ଆସନରୁ ଜିତି ଆସୁଛନ୍ତି।
