ଧାମନଗର,୧୫।୧୨(ଦେବେନ୍ଦ୍ର ଆନ୍ଦିଆ): ଭଦ୍ରକ ଜିଲା ଧାମନଗରର ଯୁବ ବିଧାୟକ ସୂର୍ଯ୍ୟବଂଶୀ ସୂରଜ ହଠାତ୍ ଏକ ବିଦ୍ୟାଳୟକୁ ପଶିଯିବା ଏବଂ ସେଠାରେ ଛାତ୍ରୀଛାତ୍ରଙ୍କୁ ପାଠ ପଢ଼ାଇବା ସହ ସେମାନଙ୍କ ସମସ୍ୟା ବୁଝିବା ଓ ସମାଧାନର ପ୍ରତିଶ୍ରୁତି ଦେବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି।
ବିଧାୟକ ଅସୁରାଳି ଅଞ୍ଚଳକୁ କୌଣସି କାର୍ଯ୍ୟକ୍ରମରେ ଯୋଗଦେବାକୁ ଯାଉଥିବା ବେଳେ ହଠାତ୍ ସରପୁର ଉଚ୍ଚ ପ୍ରାଥମିକ ବିଦ୍ୟାଳୟରେ ପହଞ୍ଚି ଯାଇଥିଲେ। କୌଣସି ସୂଚନା ନ ଥିଲାବେଳେ ବିଧାୟକ ସ୍କୁଲ ଆସିବା ଦେଖି କାର୍ଯ୍ୟରତ ଶିକ୍ଷକ ଏବଂ ଛାତ୍ରୀଛାତ୍ର ଆଶ୍ଚର୍ଯ୍ୟ ହୋଇଯାଇଥିଲେ।
ବିଧାୟକ ବିଦ୍ୟାଳୟରେ ଷଷ୍ଠ ଓ ସପ୍ତମ ଶ୍ରେଣୀର ପିଲାମାନଙ୍କୁ ଇଂଲିଶ, ଗଣିତ ଏବଂ ସାହିତ୍ୟ ବିଷୟରେ ପ୍ରଶ୍ନ ପଚାରିବା ସହ କିଛି ସମୟ ପାଠ ପଢ଼ାଇଥିଲେ। ଏଥିସହ ସେମାନଙ୍କ ରୁଚି ଓ ସ୍କୁଲର ସମସ୍ୟା ସମ୍ପର୍କରେ ପଚାରି ବୁଝିଥିଲେ। ଛାତ୍ରୀଛାତ୍ର ବିଧାୟକଙ୍କୁ ପାଖରେ ପାଇ କଥା ହୋଇ ଖୁସି ହୋଇଥିଲେ।
ସ୍କୁଲ ଶ୍ରେଣୀଗୃହ ସମସ୍ୟା ଏବଂ ଶିକ୍ଷକ ନିଯୁକ୍ତି ବିଷୟରେ ପ୍ରଧାନଶିକ୍ଷକ ଅକ୍ଷୟ ମହାନ୍ତିଙ୍କଠାରୁ ଅବଗତ ହୋଇ ବିଧାୟକ ଏହାର ସମାଧାନ ପାଇଁ ଚେଷ୍ଟା କରିବେ ବୋଲି ପ୍ରତିଶ୍ରୁତି ଦେଇଥିଲେ। ପିଲାମାନଙ୍କୁ ଚକୋଲେଟ ବାଣ୍ଟିବା ସହ ନଷ୍ଟ ହୋଇଯାଇଥିବା କିଛି ପାଠ ଉପକରଣ କିଣିବାକୁ ମଧ୍ୟ ଅର୍ଥ ପ୍ରଦାନ କରିଥିଲେ। ତେବେ ବିଧାୟକ ନିଜ ଅଞ୍ଚଳର ଶିକ୍ଷାନୁଷ୍ଠାନ ପରିଦର୍ଶନ କରି ପିଲାମାନଙ୍କ ପାଠପଢ଼ା ବୁଝିବା ନେଇ ବିଭିନ୍ନ ମହଲରେ ଆଲୋଚନାର ବିଷୟ ହୋଇଥିବା ବେଳେ ବିଧାୟକ ହେବ ତ ଏମିତି ବୋଲି ଗାଁ ଗହଳି ବଜାରରେ ବେଶ୍ ଚର୍ଚ୍ଚା ହେଉଛି।