ଉମରକୋଟ, ୧୯।୧୧(ସ୍ବ.ପ୍ର.): ଉମରକୋଟ ସହରର ୧୧ନମ୍ବର ୱାର୍ଡର ଗଣ୍ଡସାହିର ରାମଧର ହରିଜନ ଆର୍ଥିକ ଅସ୍ବଚ୍ଛଳତା କାରଣରୁ ଅଜଣା ରୋଗରେ ପୀଡ଼ିତ ଝିଅ ମାନିନୀ (୩)ଙ୍କର ଚିକିତ୍ସା କରାଇ ପାରୁ ନ ଥିଲେ। ଏହା ଜାଣି ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ ମାନିନୀଙ୍କ ଚିକିତ୍ସା ପାଇଁ ରାମଧରଙ୍କୁ ଅର୍ଥରାଶି ଦେଇଛନ୍ତି। ଏଥିସହ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଡାକ୍ତର ଶରତ ଚନ୍ଦ୍ର ସେଠୀଙ୍କ ସହ ଯୋଗାଯୋଗ କରି ମାନିନୀଙ୍କୁ ନବରଙ୍ଗପୁର ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଇଛନ୍ତି। ସେଠାରେ ଏବେ ମାନିନୀଙ୍କ ଚିକିତ୍ସା ଆରମ୍ଭ ହୋଇଛି।
ରାମଧର ଏବଂ ସ୍ତ୍ରୀ ନିଲା ହରିଜନଙ୍କ ସାନଝିଅ ମାନିନୀ। ରାମଧର ଦିନମଜୁରିଆ ଭାବେ କାମ କରି ୫ ପ୍ରାଣୀ କୁଟୁମ୍ବ ଚଳାନ୍ତି। ଏହା ମଧ୍ୟରେ ମାନିନୀଙ୍କର ୩ମାସ ତଳେ ଆଖି ଓ ଧୀରେ ଧୀରେ ପେଟ ମଧ୍ୟ ଫୁଲିବାରେ ଲାଗିଲା। ଯନ୍ତ୍ରଣାରେ ଛଟପଟ ହେଉଥିବା ମାନିନୀଙ୍କୁ ରାମଧର ପ୍ରଥମେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ନବରଙ୍ଗପୁରର ଏକ ଡାକ୍ତରଖାନାରେ ଦେଖାଇଥିଲେ। ଚିକିତ୍ସା ପରେ କିଛି ଦିନ ସୁସ୍ଥ ଥିଲେ ମାନିନୀ। ୧୦ ଦିନରେ ପୁଣି ଥରେ ତାଙ୍କ ପେଟ ଫୁଲିବାରେ ଲାଗିଲା। ଆର୍ଥିକ ଅସ୍ବଚ୍ଛଳତା କାରଣରୁ ରାମଧର ତାଙ୍କୁ ଆଉ ଡାକ୍ତରଖାନାରେ ଭର୍ତ୍ତି କରିପାରି ନ ଥିଲେ। ସ୍ବାସ୍ଥ୍ୟବୀମା କାର୍ଡ ଥରେ ବ୍ୟବହାରକରି ସାରିଥିବାରୁ ଆଉ ଥରେ ସମ୍ଭବ ନୁହେଁ କହି ରାମଧରଙ୍କୁ ଡାକ୍ତରଖାନା କର୍ତ୍ତୃପକ୍ଷ ଫେରାଇ ଦେଇଥିଲେ। ଏହି ଖବର ପାଇ ଉମରକୋଟ ବିଧାୟକ ରାମଧରଙ୍କୁ ସହାୟତାର ହାତ ବଢ଼ାଇଛନ୍ତି।