ମୁମ୍ବାଇ,୧ ।୫: ମହାରାଷ୍ଟ୍ର ନବ ନିର୍ମାଣ ସେନା(ଏମଏନ୍ଏସ୍)ର ଅଧ୍ୟକ୍ଷ ରାଜ ଠାକରେ ରବିବାର ସନ୍ଧ୍ୟାରେ ମହାରାଷ୍ଟ୍ରର ଔରଙ୍ଗାବାଦ ଜିଲାରେ ଏକ ଜନସଭାକୁ ସମ୍ବୋଧନ କରିବେ । ପ୍ରାୟ ଏକ ସପ୍ତାହ ପୂର୍ବରୁ ରାଜ ଠାକରେ ପୁଣେରୁ ଏହି ସଭା ସମ୍ପର୍କରେ ଘୋଷଣା କରିଥିଲେ ସେତେବେଳଠାରୁ ମହାରାଷ୍ଟ୍ର ରାଜନୀତିରେ ଆଲୋଚନା ଆରମ୍ଭ ହୋଇଯାଇଛି । ଆହୁରି ମଧ୍ୟ ଶୁକ୍ରବାର ପର୍ଯ୍ୟନ୍ତ ରାଜ ଠାକରେଙ୍କ ରାଲିକୁ ଔରଙ୍ଗାବାଦ ଜିଲା ପ୍ରଶାସନ ଅନୁମତି ଦେବ କି ନା ସେ ନେଇ ପ୍ରଶ୍ନ ଉଙ୍କି ମାରୁଥିଲା । ହେଲେ ଶୁକ୍ରବାର ଦ୍ୱିପ୍ରହର ପରେ ରାଜ ଠାକରେଙ୍କ ରାଲିକୁ ଅନୁମତି ମିଳିଗଲା ।
ଏହି ରାଲିକୁ ସଫଳ କରିବା ପାଇଁ ଏମଏନଏସ୍ କର୍ମୀ ଓ ମୁଖ୍ୟ ପୂର୍ବରୁ ପ୍ରସ୍ତୁତି ଆରମ୍ଭ କରିଦେଇଥିଲେ । ଏବେ ମହାରାଷ୍ଟ୍ରରେ ଚର୍ଚ୍ଚା ହେଉଛିକି ରାଜ ଠାକରେ ଏହି ରାଲିରେ କେଉଁ ବିଷୟକୁ ଉଠାଇବେ । ରାଜ ଠାକରେ ଶନିବାରଠାରୁ ପୁଣେରୁ ଔରଙ୍ଗାବାଦ ପହଞ୍ଚି ଯାଇଛନ୍ତି । ତେବେ ଔରଙ୍ଗାବାଦରେ ରାଲି ପାଇଁ ୧୬ ସର୍ତ୍ତ ସହ ଅନୁମତି ମିଳିଛି । ଯେମିତିକି ପୋଲିସ ସଫା ସଫା କହିଛି ରାଲିରେ ସାମିଲ ହେଉଥିବା ସମସ୍ତ ଲୋକେ କିଛି ବି ଆପତ୍ତିଜନକ ଅବା କାହା ଆତ୍ମାକୁ ଆଘାତ ଦେଲାଭଳି ଟିପ୍ପଣି ଦେବେ ନାହିଁ । ଏମିତି କିଛି ସର୍ତ୍ତକୁ ନେଇ ରାଜ ଠାକରେ ରାଲି କରିବାକୁ ଯାଉଛନ୍ତି ।