ରାଇଘର,୧୨ା୮ (ଡି.ଏନ୍.ଏ.):ନବରଙ୍ଗପୁର ଜିଲା ରାଇଘର ବ୍ଲକ ଗୋନା ପଞ୍ଚାୟତର ଭାରସୁଣ୍ଡି ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ମୋବାଇଲ ଗେମ୍ର ନିଶା ୧୪ ବର୍ଷୀୟ ବାଳକଙ୍କ ଜୀବନ ନେଇଛି। ସେ ହେଲେ ଗ୍ରାମର ବିଶ୍ୱଜିତ ମିର୍ଦ୍ଧାଙ୍କ ପୁଅ ସୁମିତ। ସୂଚନା ଅନୁଯାୟୀ, ରାଇଘର ବଜାରରେ ବିଶ୍ୱଜିତଙ୍କ ମୋବାଇଲ ଦୋକାନ ରହିଛି। ଚଳିତ ବର୍ଷ ସେ ନିଜ ଦୋକାନରେ ରାଖୀ ମଧ୍ୟ ବିକ୍ରି କରୁଥିଲେ। ବାପାଙ୍କୁ ଦୋକାନ କାମରେ ସହଯୋଗ କରିବା ପାଇଁ ବୁଧବାର ସୁମିତ ଦୋକାନକୁ ଯାଇଥିଲେ। ରାତିରେ ଘରକୁ ଫେରିବା ସମୟରେ ସୁମିତ ବାପାଙ୍କୁ ନ ଜଣାଇ ଗେମ୍ ଖେଳିବା ପାଇଁ ମୋବାଇଲ ନେଇଯାଇଥିଲେ। ମା’ ଏ ବିଷୟରେ ଜାଣିପାରି ବାପାଙ୍କୁ ଜଣାଇଛୁ କି ବୋଲି ପୁଅକୁ ପଚାରିଥିଲେ। ଦୋକାନରୁ ମୋବାଇଲ ଆଣିଥିବା ବାପା ଜାଣିଥିବେ ଭାବି ଭୟରେ ଗୁରୁବାର ସକାଳେ ସୁମିତ ଗାଧୁଆଘରେ ଗାମୁଛା ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ। ଛଟପଟ ହେଉଥିବା ଶୁଣି ପରିବାର ଲୋକେ ଗାଧୁଆଘରେ ପଶିଥିଲେ। ସୁମିତଙ୍କୁ ଉଦ୍ଧାରକରି ରାଇଘର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ରାଇଘର ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏ ନେଇ ୫୫/୨୨ ରେ ଏକ ମାମଲା ରୁଜୁକରି ପୋଲିସ ତଦନ୍ତ ଚଳାଇଛି।
