ଜୟପୁର,୨୯।୮: ଦେଶରେ ଡିଜିଟାଲ ଇଣ୍ଡିଆ, ଆତ୍ୟାଧୁନିକ ଜ୍ଞାନ କୌଶଳ, ନୂଆ ନୂଆ ଟେକ୍ନୋଲୋଜି ଓ ଆତ୍ମନିର୍ଭରଶୀଳ କଥା ନେଇ ସରକାର ଡିଣ୍ଡିମ ପିଟୁଛନ୍ତି। ହେଲେ ଆଜି ବି ଏମିତି କିଛି ଗାଁ ଅଛି ଯେଉଁଠି ଟେକ୍ନୋଲୋଜିର କୌଣସି ଗନ୍ଧବାସ ନାହିଁ। ଯେଉଁଠି ଦେଶକୁ ଡିଜିଟାଲ ଇଣ୍ଡିଆ କରିବାରେ ସରକାର ଲାଗିପଡ଼ିଛନ୍ତି ସେଠାରେ ରାଜସ୍ଥାନର ଏମିତି କେତେକ ଗାଁ ଅଛି ଯେଉଁଠାରେ ଆଜିବି ଟୋକ୍ନୋଲୋଜିରୁ ବହୁ ଦୂରରେ। ରାଜସ୍ଥାନର ଦୋସା ମୁଖ୍ୟାଳୟରୁ ମାତ୍ର ୩୦ କିଲୋମିଟରେ ଦୂରରେ ଥିବା ରାନୋଲି ନିକଟସ୍ଥ ସାର, ଧୋଣ ଗାଁ ଭଳି ପ୍ରାୟ ଏକ ଡର୍ଜନରୁ ଊର୍ଦ୍ଧ୍ୱ ଗାଁ ଅଛି ଯେଉଁଠାରେ ଆଜିବି ମୋବାଇଲ ନେଟଓ୍ବାର୍କ ପହଞ୍ଚିପାରିନି। ଯଦି ଏହି ଗାଁର ଲୋକଙ୍କୁ ମୋବାଇଲରେ କଥା ହେବାକୁ ଥାଏ ତେବେ ସେମାନେ ଗାଁର ପାହାଡ଼ ଉପରେ ଚଢ଼ିଥାନ୍ତି ନଚେତ୍ ଗାଁରୁ ୧୦ କିଲୋମିଟର ଦୂରକୁ ଯାଇ କଥା ହୋଇଥାନ୍ତି।
ତେବେ ନେଟଓ୍ବାର୍କ ଆସୁଥିବା ଗାଁର କିଛି ସ୍ଥାନକୁ ଚିହ୍ନଟ କରାଯାଇଛି। ହେଲେ ସେଠାରେ ବି ସବୁବେଳେ ନେଟଓ୍ବାର୍କ ରହିବ ତାହା କୌଣସିି ଗାରାଣ୍ଟି ନାହିଁ। ମୋବାଇଲ ନେଟଓ୍ବାର୍କ ନ ଥିବାରୁ ସ୍ବାସ୍ଥ୍ୟ ବିଭାଗ ଓ ସ୍କୁଲ ପରିଚାଳକଙ୍କୁ ସୂଚନା ଦେବାରେ ବହୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ଯଦି ଗାଁରେ କୌଣସି ଦୁର୍ଘଟଣା ବା ଘଟଣା ଘଟେ ତେବେ ତୁରନ୍ତ ପୋଲିସକୁ ଖବର ଦେବା ମଧ୍ୟ ଅସମ୍ଭବ। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବର୍ତ୍ତମାନ କରୋନା ଲକ୍ଡାଉନ ଯୋଗୁ ସମସ୍ତ ସ୍କୁଲ ଓ କଲେଜ ବନ୍ଦ ରହିଛି।
ମୋବାଇଲ ନେଟଓ୍ବାର୍କ ନ ଥିବାରୁ ପିଲାମାନେ ଅନ୍ଲାଇନ ପାଠପଢ଼ାରୁ ବଞ୍ଚିତ ହେଉଛନ୍ତି। ଏନେଇ ପ୍ରଶାସନିକ ଅଧିକାରୀଙ୍କଠାରୁ ଆରମ୍ଭ କରି ନେତାମନ୍ତ୍ରୀଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିପାରୁନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏହି ଅଞ୍ଚଳ ରାଜସ୍ଥାନ ସରକାରେ ମହିଳା ଓ ଶିଶୁ ବିକାଶ ମନ୍ତ୍ରୀ ଥିବା ମମତା ଭୁପେଶ ଓ ଶିଳ୍ପମନ୍ତ୍ରୀ ପରସାଦି ଲାଲ ମିଣାଙ୍କ ବିଧାନସଭା ନିର୍ବାଚନମଣ୍ଡଳୀ ହୋଇଥିଲେ ମଧ୍ୟ ଏଠାରେ ବିକାଶର ଅଭାବ ରହିଛି।