ସୁରଟ,୨୪ ।୧୦: ବଳାତ୍କାର ମାମଲାରେ ଜେଲରେ ସଜା କାଟୁଥିବା ନାରାୟଣ ସାଇଙ୍କ ପାଖରେ ମୋବାଇଲ ଫୋନ ମିଳିବା ଘଟଣା ଏବେ ଆସିଛି ଚର୍ଚ୍ଚାକୁ । ଏହାକୁ ନେଇ ପୋଲିସ ଉପରେ ପ୍ରଶ୍ନ ଉଠିଛି । ନାବାଳିକା ବଳାତ୍କାର ମାମଲାର ଅଭିଯୁକ୍ତ ତଥା ଅଧ୍ୟାତ୍ମିକ ଗୁରୁ କୁହାଯାଉଥିବା ଆଶାରାମ ବାପୁଙ୍କ ପୁଅ ହେଉଛନ୍ତି ନାରାୟଣ ସାଇ । ଏବେ ସେ ଜେଲରେ ଥିବା ବେଳେ ତାଙ୍କ ନିକଟରୁ ମୋବାଇଲ ଫୋନ ମିଳିବା ପରେ ନାରାୟଣଙ୍କ ନାଁରେ ଏକ ମାମଲା ରୁଜୁ କରାଯାଇଛି । ଜଣାପଡିଛି ଯେ କେବଳ ନାରାୟଣ ସାଇ ନୁହେଁ ବରଂ ସେହି ଜେଲରେ ଥିବା ଅନ୍ୟ ୪ ଜଣଙ୍କ ନିକଟରୁ ମଧ୍ୟ ମୋବାଇଲ ଫୋନ ମିଳିଛି । ସୂଚନାଯୋଗ୍ୟ, ଗୁଜୁରାଟ ସୁରଟ ସ୍ଥିତ ଆଶ୍ରମରେ ଦୁଇ ଭଉଣୀଙ୍କୁ ବଳାତ୍କାର ମାମଲାରେ ସେସନ୍ସ କୋର୍ଟ ଆଶାରାମ ବାପୁଙ୍କ ପୁଅ ନାରାୟଣ ସାଇଙ୍କୁ ଆଜୀବନ ଦଣ୍ଡାଦେଶ ଶୁଣାଇଛନ୍ତି । ଏହା ୧୯୯୭ର ଘଟଣା ହୋଇଥିବା ବେଳେ ୨୦୧୩ରେ ମାମଲା ରୁଜୁ କରାଯାଇଥିଲା । ଦୀର୍ଘ ୨୨ ବର୍ଷ ପରେ ମହିଳାଙ୍କୁ ଏହି ମାମଲାରେ ନ୍ୟାୟ ମିଳିଥିଲା ।
