ଭୁବନେଶ୍ୱର,୧।୧(ବ୍ୟୁରୋ): କ୍ଲାସରୁମରେ ଶିକ୍ଷକଙ୍କୁ ମୋବାଇଲ ମନା। ଶ୍ରେଣୀକୁ ଯିବା ସମୟରେ ଶିକ୍ଷକ ମୋବାଇଲ ନେଇପାରିବେନି। ଯଦି ନେବେ ତେବେ ଫୋନ ସୁଇଚ ଅଫ କରିବେ। ପିଲାଙ୍କ ପାଠପଢ଼ା ବେଳେ ଶିକ୍ଷକଙ୍କ ମୋବାଇଲ ଫୋନ ବନ୍ଦ ରହିବ । ପିଲାଙ୍କ ପାଠପଢ଼ାକୁ ନେଇ ଏମିତି କିଛି ନିୟମ ଆଣିବାକୁ ରାଜ୍ୟ ସରକାର ବିଚାର କରୁଛନ୍ତି । ଏ ନେଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ସୂଚନା ଦେଇଛନ୍ତି। ନୂଆବର୍ଷ ଅଭିନନ୍ଦନ ଜଣାଇବା ସହ ମନ୍ତ୍ରୀ ଶିକ୍ଷକଙ୍କୁ କ୍ଲାସରୁମକୁ ଫୋନ ନେବା ଅନୁଚିତ ବୋଲି କହିଛନ୍ତି । କ୍ଲାସରୁମକୁ ଶିକ୍ଷକ ମୋବାଇଲ ନେଇ ଯାଇପାରିବେନି ବୋଲି ସମ୍ବଲପୁର ଡିଇଓ ନିର୍ଦ୍ଦେଶ ଦେଇଛନ୍ତି । ଏହାକୁ ନେଇ ମନ୍ତ୍ରୀ କହିଛନ୍ତି, ‘ସମ୍ବଲପୁର ଡିଇଓ ଯେଉଁ ନିଷ୍ପତ୍ତି ନେଇଛନ୍ତି, ତାହା ଭଲ। ଆଗମୀ ଦିନରେ ଏହା ସାରା ରାଜ୍ୟରେ ଲାଗୁ କରିବାକୁ ବିଚାରବିମର୍ଶ ଚାଲିଛି। ବିଦ୍ୟାଳୟକୁ ଫୋନ ନେବାକୁ ମନା ନାହିଁ, ହେଲେ କ୍ଲାସରୁମକୁ ନୁହେଁ। କ୍ଲାସରୁମକୁ ଫୋନ ନେବାର କିଛି ଆବଶ୍ୟକତା ନାହିଁ। ପାଠପଢ଼ା ସମୟରେ ଫୋନ ଆସିବା ଦ୍ବାରା ଶିକ୍ଷାଦାନ ବ୍ୟାଘାତ ହେଉଛି ବୋଲି ଗଣଶିକ୍ଷା ମନ୍ତ୍ରୀ କହିଛନ୍ତି।
