ସେମିଳିଗୁଡ଼ା/ସୁନାବେଡା, ୧୬ା୩(ସ୍ବ.ପ୍ର.): ସେମିଳିଗୁଡ଼ା ବ୍ଲକ କାଣ୍ଟି ପଞ୍ଚାୟତ ଅଞ୍ଚଳରେ ମୋବାଇଲ ଟାଓ୍ବାର ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଥିଲେ। ଏ ନେଇ ‘ଧରିତ୍ରୀ’ରେ ଖବର ପ୍ରକାଶ ପାଇବା ପରେ କାମ ଆରମ୍ଭ ହୋଇଛି। ଉପର କାଣ୍ଟି ଗାଁରେ ପ୍ରାୟ ୨୦୦ ପରିବାରର ୮୦୦ ରୁ ଅଧିକ ଲୋକ ବସବାସ କରୁଛନ୍ତି। ଏଠାରେ ମୋବାଇଲ ନେଟୱାର୍କ ଆସୁ ନ ଥିବାରୁ ଲୋକେ ଜରୁରୀ ସମୟରେ ହଇରାଣ ହରକତ ହେଉଥିଲେ। ଏପରିକି ଦେଓମାଳି ବୁଲି ଆସୁଥିବା ପର୍ଯଟକମାନେ ମଧ୍ୟ ନାନା ଅସୁବିଧାର ସମ୍ମୁଖୀନ ହେଉଥିଲେ। ରାଜ୍ୟ ବାହାରର ପର୍ଯ୍ୟଟକମାନେ ଏଠାକୁ ଆସି ସମ୍ପର୍କୀୟଙ୍କ ସହ କଥାବାର୍ତ୍ତା କରିବା ସମ୍ଭବ ହେଉ ନ ଥିଲା। ସ୍ଥାନୀୟ ଅଞ୍ଚଳର ଲୋକଙ୍କୁ ଆବଶ୍ୟକସ୍ଥଳେ କଥା ହେବା ପାଇଁ ମୋବାଇଲ ଫୋନ୍ ଧରି ୩ କି.ମି.ପାହାଡ ଉପରକୁ ଯିବାକୁ ପଡୁଥିଲା। ଏହାର ସ୍ଥାୟୀ ସମାଧାନ ପାଇଁ ବିଭିନ୍ନ ସମୟରେ ଦାବି ହୋଇ ଆସୁଥିଲା। ଏହାକୁ ହୃଦବୋଧ କରି ପ୍ରଶାସନ ପକ୍ଷରୁ କାଣ୍ଟି ପଞ୍ଚାୟତ କାର୍ଯ୍ୟାଳୟ ବୋଲାଉଥିବା ରାଜୀବଗାନ୍ଧୀ ବାତ୍ୟା ଆଶ୍ରୟସ୍ଥଳୀ ପଛପଟେ ଜିଓ ଏବଂ ବିଏସ୍ଏନଏଲ ଦୁଇଟି ମୋବାଇଲ ସେବା ପ୍ରଦାନକାରୀ ସଂସ୍ଥା ପକ୍ଷରୁ୍ ଟାଓ୍ବାର ସ୍ଥାପନ ଲାଗି ପାରିପାଶର୍ବିକ ସ୍ଥିତି ଓ ମାଟି ପରୀକ୍ଷା କରାଯାଇଛି। ଆଗାମୀ ଦିନରେ ଏଠାରେ ୨ଟି ମୋବାଇଲ ଟାୱାର୍ ବସିବ ବୋଲି ସ୍ଥାନୀୟ ସରପଞ୍ଚ ସୂଚନା ଦେଇଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳବାସୀ ଖୁସି ବ୍ୟକ୍ତ କରିଛନ୍ତି।
ସୂଚନାଯୋଗ୍ୟ, କରୋନା ସମୟରେ ଅନଲାଇନ ମାଧ୍ୟମରେ ପାଠ ପଢିବାକୁ ଏଠାକାର ଛାତ୍ରୀଛାତ୍ରଙ୍କୁ ପାହାଡ଼ ଶିଖର ତଥା ଗଛ ଉପରକୁ ଚଢିବାକୁ ପଡୁଥିଲା। ଟାଓ୍ବାର ନିର୍ମାଣ ପରେ ସମସ୍ୟା ସମାଧାନ ହୋଇପାରିବ।