କୋକସରା,୩।୧୧(ଡି.ଏନ୍.ଏ.): କୋକସରା ବସ୍ଷ୍ଟାଣ୍ଡରେ ଥିବା ମହାପାତ୍ର ଫେନ୍ସି ଦୋକାନ ଆଜବେଷ୍ଟସ ଭାଙ୍ଗି ବୁଧବାର ବିଳମ୍ବିତ ରାତିରେ କଳାକନା ବୁଲାଇଛନ୍ତି ଦୁର୍ବୃତ୍ତ। ଦୁର୍ବୃତ୍ତମାନେ ଲକ୍ଷାଧିକ ଟଙ୍କାର ମୋବାଇଲ ଫୋନ ସହ ନଗଦ ଟଙ୍କା ଲୁଟି ନେଇଛନ୍ତି। ଏହି ଦୃଶ୍ୟ ସିସିଟିଭିରେ କଏଦ ହୋଇଛି।
ମିଳିଥିବା ସୂଚନା ମୁତାବକ, ୨୬ ନମ୍ବର ଜାତୀୟ ରାଜପଥ କୋକସରା ସହରର ମୁଖ୍ୟ ବସ୍ଷ୍ଟାଣ୍ଡରେ ଥିବା ତ୍ରିଲୋଚନ ମହାପାତ୍ର ବୁଧବାର ରାତିରେ ଦୋକାନ ବନ୍ଦ କରି ଘରକୁ ଯାଇଥିଲେ। ହେଲେ ବିଳମ୍ବିତ ରାତିରେ କେତେକ ମୁଖାପିନ୍ଧା ଦୁର୍ବୃତ୍ତ ଦୋକାନ ଛାତ ଆଜବେଷ୍ଟସ ଭାଙ୍ଗି ଭିତରକୁ ପଶିଥିଲେ। ପରେ ଦୋକାନରୁ ଲକ୍ଷାଧିକ ଟଙ୍କାର ମୋବାଇଲ ଫୋନ ସହ ନଗଦ ଟଙ୍କା ନେଇଯାଇଥିବା ଜଣାଡିଛି। ଏନେଇ ଦୋକାନ ମାଲିକ ମହାପାତ୍ର କୋକସରା ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗପତ୍ରରେ ସେ ଦୋକାନରୁ ୧୬ଟି ଦାମୀ ମୋବାଇଲ ଫୋନ ଯାହାର ଆନୁମାନିକ ମୂଲ୍ୟ ୨ଲକ୍ଷ ୨୦ ହଜାର ଏବଂ ନଗଦ ୫ ହଜାର ଟଙ୍କା ଚୋରି ହୋଇଥିବା ଉଲ୍ଲେଖ କରିଛନ୍ତି। ଏନେଇ କୋକସରା ଥାନା ପୋଲିସ ଏକ ମାମଲା (ନଂ.୨୬୯/ ୨୨) ରୁଜୁ କରି ସିସିଟିଭି ଫୁଟେଜ ଆଧାରରେ ତଦନ୍ତ ଆରମ୍ଭ କରିଛି। ଅନ୍ୟପକ୍ଷେ ପୋଲିସ ପାଟ୍ରୋଲିଂରେ ଢିଲା ଯୋଗୁ ଏ ଭଳି ଆପରାଧିକ କାର୍ଯ୍ୟ ଅଞ୍ଚଳରେ ବୃଦ୍ଧି ପାଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏନେଇ କୋକସରା ଥାନା ଅଧିକାରୀ ପ୍ରସନ୍ନ କୁମାର ବେହେରାଙ୍କୁ ପଚାରିବାରୁ ପୋଲିସ ଘଟଣାର ତଦନ୍ତ କରୁଥିବା କହିଛିି।