ଉତ୍ତରପଶ୍ଚିମ ଇଟାଲୀର ସାଭୋୟ ହେଉଛି ୧୧୮ ଛୋଟ ଦ୍ୱୀପପୁଞ୍ଜକୁ ନେଇ ଗଠିତ ଏକ ରାଜ୍ୟ। ଏହାର ରାଜଧାନୀ ହେଉଛି ଭେନିସ୍। ପ୍ରିନ୍ସ ଇମାନ୍ବେଲ ଫିଲିବର୍ଟୋ ଅଫ୍ ସାଭୋୟ ‘ପ୍ରିନ୍ସ ଅଫ୍ ଭେନିସ୍’ ନାମରେ ମଧ୍ୟ ପରିଚିତ। ସେ ଫରାସୀ ହାଇ ସୋସାଇଟିର ଅନ୍ୟତମ ଗ୍ଲାମରସ୍ ମହିଳା ପ୍ରିନ୍ସେସ୍ କ୍ଲୋଟିଲ୍ଡେ ମାରିଏ ପାସ୍କେଲ ଅଫ୍ ସାଭୋୟଙ୍କୁ ବିବାହ କରିଛନ୍ତି। ଭେନିସ୍ ପ୍ରିନ୍ସ ଓ ପ୍ରିନ୍ସେସ୍ଙ୍କ ୨ ଝିଅ ହେଲେ ପ୍ରିନ୍ସେସ୍ ଭିଟ୍ଟୋରିଆ ଚିଆରା ଏବଂ ପ୍ରିନ୍ସେସ୍ ଲୁଇସା ଜିଓଭାନ୍ନା। ଭେନିସ୍ ପ୍ରିନ୍ସ ନିଜ ୮୬ ବର୍ଷୀୟ ପିତା ପ୍ରିନ୍ସ ଭିଟ୍ଟୋରିଓ ଇମାନ୍ବେଲଙ୍କ ମୃତ୍ୟୁ ପରେ ଉତ୍ତରାଧିକାରୀ ସୂତ୍ରରେ ମିଳିଥିବା ଇଟାଲୀ ରାଜସିଂହାସନ ଉପରେ ଦାବି ପରିତ୍ୟାଗ କରିବାକୁ ଚାହୁଁଛନ୍ତି। ସେ ଇଟାଲୀ ରାଜସିଂହାସନ ଉପରେ ତାଙ୍କ ଅଧିକାରକୁ ନିଜ ୧୯ ବର୍ଷୀୟା ଝିଅ ପ୍ରିନ୍ସେସ୍ ଭିଟ୍ଟୋରିଆ ଚିଆରାଙ୍କୁ ପ୍ରତ୍ୟକ୍ଷ ଭାବେ ହସ୍ତାନ୍ତର କରିବାକୁ ଆଗ୍ରହୀ। କାରଣ ତାଙ୍କ ପରିବାର ଖୋଲା ଓ ପ୍ରଗତିଶୀଳ ବୋଲି ଏହି ପଦକ୍ଷେପ ଦର୍ଶାଇବ। ଝିଅ ତାଙ୍କ ତୁଳନାରେ ଅଧିକ ଭଲ କାମ କରିପାରିବେ ବୋଲି ଗଣମାଧ୍ୟମକୁ ସେ ଜଣାଇଛନ୍ତି। ପ୍ରିନ୍ସ ଆହୁରି କହିଛନ୍ତି, ଆସନ୍ତାକାଲି ହେଉ ବର୍ଷେ ପରେ ଝିଅ ରାଜି ହେଲେ ସବୁକିଛି ସମ୍ଭବ। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ଆଧୁନିକ ବିଚାରଧାରାକୁ ନେଇ ଚଳୁଥିବା ଯୁବପିଢ଼ିଙ୍କୁ ନୂଆ ସୁଯୋଗ ମିଳିବ। ସେମାନେ ବିଶ୍ୱର ଜଟିଳ ସମସ୍ୟାଗୁଡ଼ିକର ସମାଧାନ ଦିଗରେ ଆମଠାରୁ ଅଧିକ ସଚେତନ।
ଭିଟ୍ଟୋରିଆ ପେସାରେ ଜଣେ ମଡେଲ। ଇନ୍ଷ୍ଟାଗ୍ରାମ୍ରେ ତାଙ୍କର ୭୯,୦୦୦ ଅନୁଗାମୀ ଅଛନ୍ତି। ସେ ବର୍ତ୍ତମାନ ଲଣ୍ଡନ ୟୁନିଭର୍ସିଟିରେ ରାଜନୀତି ବିଜ୍ଞାନ ଓ ଇତିହାସ ବିଭାଗ ଛାତ୍ରୀ। ଇଟାଲୀ ରାଜସିଂହାସନର ଦାୟାଦ ଭାବେ ଭିଟ୍ଟୋରିଆଙ୍କ ଭୂମିକା ତାଙ୍କ ପରିବାର ଦ୍ୱାରା ପରିଚାଳିତ ଚ୍ୟାରିଟି ପାଇଁ ଲାଭଦାୟକ ହେବ। ଗତବର୍ଷ ଏହି ଚ୍ୟାରିଟିରୁ ବିଭିନ୍ନ ପ୍ରକଳ୍ପ ପାଇଁ ୧ ନିୟୁତ ଡଲାର ଖର୍ଚ୍ଚ କରାଯାଇଥିଲା।